16/09/2026
जनकपुरमा बालिकालाई १९ दिन बन्धक बनाएर बलात्कार गरेको प्रकरण: मुख्य अभियुक्त ताहिर राइन कारागार चलान, मिलापत्र गराउने वडाध्यक्ष १ लाख धरौटीमा रिहा
जुनतारा खबर
काठमाडौं,धनुषाको जनकपुरस्थित दुईवटा होटेलमा १६ वर्षीया बालिकालाई १९ दिनसम्म बन्धक बनाएर सामूहिक बलात्कार तथा देहव्यापारमा लगाएको जघन्य अपराधका मुख्य अभियुक्त ताहिर राइन पुर्पक्षका लागि कारागार चलान भएका छन्। धनुषा जिल्ला अदालतको आदेशपछि २३ वर्षीय राइनलाई कारागार पठाइएको हो।
घटनालाई २० लाख रुपैयाँमा मिलापत्र गराउन पीडित परिवारलाई दबाब दिएको आरोपमा पक्राउ परेका धनौजी गाउँपालिका–५ का वडाध्यक्ष याकुब कवारी भने अदालतको आदेशपछि एक लाख रुपैयाँ धरौटी बुझाएर छुटेका छन्।
कतार भागेका मुख्य अभियुक्त इन्टरपोलमार्फत पक्राउ
अपराधपछि वैदेशिक रोजगारीको बहानामा कतार भागेका ताहिर राइनलाई प्रहरीले इन्टरपोलको सहयोगमा रेड नोटिस जारी गरी गत २५ साउनमा नेपाल फर्काएर पक्राउ गरेको थियो।
अनुसन्धान मिसिलअनुसार अभियुक्तहरूले बालिकालाई दुई पटकसम्म अपहरण गरी अत्याचार गरेका थिए:
पहिलो घटना (२९ चैत २०८१): विवाहको प्रलोभन देखाएर बालिकालाई जनकपुर ल्याई बलात्कार गरिएको र होटेलमा बेचबिखनको प्रयास भएको थियो। बालिका भागेर ज्यान जोगाउन सफल भई ३ जेठ २०८२ मा प्रहरीमा जाहेरी दिए पनि प्रहरीले समयमै कारबाही नगर्दा अभियुक्त विदेश भाग्न सफल भएका थिए।
दोस्रो घटना (१७ असार २०८२): घरको दैलोमा निस्किएकी बालिकालाई आँखा बाँधेर पुनः अपहरण गरी जनकपुरको पिडारीचोकस्थित होटेल सीएफसी र मुरलीचोकस्थित मधेश प्रदेश गेस्ट हाउसमा १९ दिनसम्म बन्धक बनाइयो। त्यहाँ होटेल सञ्चालकसहितका व्यक्तिहरूले बलात्कार गरेको र ग्राहकबाट पैसा लिएरसमेत करणी गर्न लगाएको खुलेको छ।
दुई प्रहरीसहित एक दर्जन अभियुक्त, अधिकांश अझै फरार
यस जघन्य अपराधमा दुई जना प्रहरी कर्मचारीसहित करिब एक दर्जन व्यक्तिहरू संलग्न रहेको खुलेको छ। उनीहरूविरुद्ध मानव बेचबिखन, अपहरण, शरीर बन्धक तथा जबरजस्ती करणीका दुई छुट्टाछुट्टै मुद्दा जिल्ला अदालत धनुषामा विचाराधीन छन्। संलग्न अधिकांश अभियुक्तहरू अझै फरार रहेकाले खोजी भइरहेको प्रहरीले जनाएको छ।
अत्यधिक असुरक्षा र सामाजिक दबाबका कारण पीडित बालिका घटनायता हालसम्म पनि सेफ हाउसकै संरक्षणमा बस्न बाध्य छिन्।
