21/07/2026
حنان بلوبلو.. القنبلة التي هزت بخصرها قوانين سبتمبر الشوهاء
___________
سنة 1984، انفجرت في سما الغُنا السوداني قنبلة اسمها حنان بلوبلو بدون منافس، قعدت في كرسي المطربة الأولى والأكثر شعبية، وكسرت الدنيا في الحفلات وشرايط الكاسيت.
زمن العز والشهرة:
- في الشهر كانت بتعمل 20 حفلة عديل.
- أجرها في حفلة العرس 1500 جنيه، وفي الحفلات الكبيرة من 6 لـ 10 مليون، ده غير النقطة والهدايا والدهب والساعات.
- غناها اكتسح الأعراس والمسارح ودور السينما والحافلات والتكاسي في الخرطوم والأقاليم، ولحدي المغتربين بره السودان.
حاجات ما بتتنسي:
في معرض الخرطوم، صالة الهابي لاند اتملت للنخرة، والناس البرة كسروا السور من الزحمة، لامن جابوا الاحتياطي المركزي عشان الحفلة تستمر. وفي مدني، حفلتها في دار السينما اتلغت بعد الشرطة فرقت الناس بالبمبان، عشان مافي محلات والخلق دايرين يشوفوها بأي طريقة.
بدت من وين؟
حنان مواليد 1966 من حي العباسية أم درمان. وهي شافعة غنت في برنامج الأطفال في التلفزيون، وبعداك واصلت في مركز شباب أم درمان. قرت لحدي الثانوي. بتغني غنا البنات والحقيبة وحسن عطية، والناس كلها تشهد ليها إنها عندها لونية براها. فوق ده كانت سمحة وبتطلع المسرح بلبس متحرر، والحاجات دي شدت الشباب البيفتش للترفيه والبسطة.
الناس قالوا شنو؟ غُنا البوب السوداني
الناقد عيسى الحلو قال غناها ده اسمه "بوب آرت سوداني"، يعني:
- ما شغال بالشعر والمعاني الكتيرة، كله إيقاع صاخب والكلام بس يملا الفراغ بين المزيكا.
- غنا بيشغل الجسم، يخليك تهز وترقص طوالي، ما زي غنا أم كلثوم البتخاطب العقل بالراحة.
- الفرق بينها وبين الكابلي: هي بتغني للحاجة المحسوسة، وهو للحاجة الما محسوسة، والاتنين بكملوا الحياة.
- لكن قال ليها: البوب ده لازم يلقى ليهو عمق عشان يعيش.
الموسيقار الماحي سليمان قال:
- صوتها "سوبرانو" لكن مساحته ضيقة، بتغني في مقامات معينة.
- بتعتمد على ألحان الناس التانين، وكلامها دارجي ساهل عشان يصل للنسوان بالذات، وهم البشهروا الفنان في الأعراس.
- عندها حضور في المسرح، ودخلت الرقص واللبس الغريب زي الفنانين الخواجات عشان تشد الشباب.
- قال: "فن الرقص ده المتنفس الطبيعي في زمن الكبت والقهر. الستينات كان زمن الرومانسية، وده زمن الكسب السريع والفن القلق".
حنان قالت عن نفسها:
"شهرتي بدت مع أول شريط كاسيت، وأغنيتي _قسيم ريدي_ و_حمادة مع السلامة_ كسروا الدنيا. ما سجلت رسمي في الإذاعة. سجلت 4 غناوي للتلفزيون وما عرضوهن. عدلت الغنا القالوا عليهو هابط. دايرة أطور نفسي لكن بلقى المحاربة بدل المساعدة. عندي 8 ألحان خاصة: 5 من عوض جبريل، واحد من عبد اللطيف خضر، واحد من أسامة بريش، والأخير شعر عز الدين هلالي ومزيكا الماحي سليمان".
سؤال لناس الزمن داك:
الناس الحضروا الزمن داك، بتتذكروا شنو عن حنان بلوبلو وانتو بتسمعوها في الكاسيت في الدكاكين والعربات والحفلات؟
