25/05/2026
د پکتیا ولایت د اطلاعاتو او کلتور ریاست له لوري د دغه ولایت اریوب ځاځیو ولسوالۍ کې د «بهلول دانا» په نوم تاریخي او تفریحي سیمه د سیلانیانو لپاره د نوې سیاحتي سیمې په توګه تشخیص او معرفي شوه.
د یاد ریاست رئیس مـ ـولوي فیض الله جوهري په مشرۍ ځانګړي هیئت، چې د اطلاعاتو آمر اصیل ځاځي او د ګرځندوی مدیر مـ ـولوي حبیب الرحمان حامد یې ملتیا کوله د سیمې له طبیعي او تفریحي ځایونو څخه لیدنه وکړه.
دوی وایي، دغه سیمه د ښکلو منظرو، شنو غرونو او ارام چاپېریال له امله د سیلانیانو لپاره ځانګړی ارزښت لري.
ښاغلي مـ ـولوي فیض الله جوهري باختر اژانس ته وویل، چې د بهلول دانا د ناستې ځای له پخوا راهیسې د خلکو ترمنځ په روایتي ډول مشهور دی او ګڼ خلک د طبیعي ښکلاوو لیدو لپاره دغې سیمې ته ورځي.
نوموړي زیاته کړه، چې د اطلاعاتو او کلتور ریاست هڅه کوي په یادو سیمو کې د سیلانیانو لپاره لازمې اسانتیاوې رامنځته او د ګرځندوی سکتور لا پیاوړی کړي.
د پکتیا د ګرځندوی عمومي مدیر ښاغلی مـ ـولوي حبیب الرحمان حامد هم وویل، چې پکتیا د طبیعي ښکلاوو او تاریخي سیمو له پلوه د هېواد له مهمو ولایتونو څخه شمېرل کېږي او ګڼې تفریحي سیمې لري.
د نوموړي په وینا، د بهلول دانا سیمې ترڅنګ د ګردې څیړۍ ولسوالۍ «بیسوې» سیمه هم د سیلانیانو لپاره له غوره تفریحي او سیاحتي ځایونو څخه ګڼل شوې ده.
هغه د ګردیز ـ پټان لویې لارې د بیارغونې روانو چارو ته په اشارې وویل، چې اوسمهال د لارې د خرابوالي له امله سپینې شګې سیمې ته تګ راتګ له ستونزو سره مخ دی، له همدې امله یې له سیلانیانو وغوښتل، څو د راتلونکي لوی اختر پر مهال د پکتیا نورې سیاحتي سیمې هم وټاکي.
نوموړي زیاته کړه، چې د سړک د رغونې له بشپړېدو وروسته به په سپینه شګه سیمه کې د هوټلونو او نورو خدماتي اسانتیاوو د برابرولو چارې هم پیل شي.
بلخوا د اطلاعاتو آمر ښاغلی اصیل ځاځي وایي، چې په وروستیو کې پکتیا ته د کورنیو سیلانیانو ورتګ زیات شوی او د نویو تفریحي سیمو په تشخیص سره به د دغه ولایت ګرځندوی لا پراختیا ومومي.
د یادونې وړ ده، چې پکتیا د سوړ اقلیم، غرنیو سیمو او طبیعي ښکلاوو له امله هر کال ګڼ شمېر سیلانیان ځان ته راجلبوي.
#باختراژانس
