01/12/2025
د کندز ځوان شاعر او نومیالي شخصیت احسان الله آقتاش لنډه پېژندنه!
ښاغلی احسان الله آقتاش محمدخېل د رئیس ضیاالحق آقتاش زوی او د شهید ارباب عبدالحق لمسی، په ۱۳۷۷م لمریز کال د کندز ولایت د آقتاش ولسوالۍ د کابلیو په کلي کې، په یوه شهید پاله او علمدوسته کورنۍ کې نړۍ ته سترګې وغړولې،
نوموړي د اقتصاد په برخه کې تر لیسانس پورې زده کړې کړې دي،ښاغلی آقتاش د ښې شاعرۍ تر څنګ د لوړ اخلاقو ژور فکر او بېسارې استعداد څښتن دی له ماشومتوبه یې له شعر او ادب سره ژوره مینه درلوده او د وطن ناخوالو او د ملت دردونو یې ذهن او زړه دومره راونغښت چې قلم یې په لاس کړ، او د شعر ژبه یې د خپل پیغام د رسولو وسیله وګرځوله اوس مهال په کندز راډیو کې د افغانستان د پښتو او دري ادبیاتو د ودې او روڼتیا په پار او د یاد شوي ژبي شاعرانو ملاتړ او هڅونې په موخه فرهنګي چارې پرمخ وړي نرم مزاجي، سخاوت، او صداقت یې د ژوند تګلاره ده د آقتاش ستر آرمان د ګران هېواد پرمختګ،د ځوان نسل لپاره د علم اسانه لاسرسی او تلپاتې سوله ده،
د شعر بیلګې یې په لاندې ډول دي
غزل!
چې ډاډه یم ستا په مینه مې باور دی
خدای درکړی د ښایست څنګ کې هنر دی
که راګورې نه رژېږمه لالیه!
ستا نظر لکه د ژمي موسم لمر دی
توره شپه ده، ستا یادونه، له خولې وینې
ټوټې شوی مې په تاپسې ځیګر دی
نور څه نشته خو بس دا به درته وایم
{(صدقه مې درنه دا شیندلی سر)} دی
زه یې څارمه آقتاشه ستا لپاره
دغه لاره که سهار که مازدیګر دی
**********************************
غزل !
ما لیدلي دي ډیر څه په دې وطن کې
هیر به نشی تر څو ساه مې وي په تن کې
اخ د مور وطن سلګۍ چې را په یاد کړم
شدید درد راته پیدا شي ټول بدن کې
د خیانت محفل ډیر ګرم ، د دې ښار و
بې تمرینه هر سړی ګډ وه آټن کې
با وجود د دومره زیاتو نعمتونو
خوشحالی نه وه،د ګران وطن چمن کې
ټول بچیان یې ترینه تیښتی ته مجبور ول
ښکاریدل په ژوندانه ټول زنکدن کې
چې پیـــدا له زرو پــلاره وي آقتاشه
هوم هغه کوي خیانت په دې ختن کې.
----------------------------------------------
نظم!
ژوند د وطن خوږ دی که هرڅومره وي دلتنګ
زړونه پيونـــد شوي دلتـه نـه غواړو نور جنګ
خير که نن غربت دی د سبا په طمعه يو
هيلې مو تړلي د الله په طمعه يو
وړانګې د سهار ته د رڼا په طمعه يو
خدای به کړي راپيښه عاقبت زمونږ په رنګ
زړونه پيوند شوي دلته نه غواړو نور جنګ
ورک مو نفرتونه کړل، بخشش د زنده ګۍ
غيږه مو ورکړې ښه صفا د ورورولۍ
سترګې مو کړې ټيټې د مغرورې دنياګۍ
دواړه د يوه خاورې بچي به يو ترڅنګ
زړونه پيوند شوي دلته نه غواړو نور جنګ
خوارو زار وطنه تابه سيال کړو د جهان
ستا په آبادۍ کې به کړو ټول افغانستان
جوړه به ټاپي کړو قوشتيپه به کړو ودان
سترې پروژې به رغوو لکه سالنګ
زړونه پيوند شوي دلته نه غواړو نور جنګ
ځار دې شم يعقوبه لا اوچت دې شه جلال
خدای درته درکړی د يوسف غوندې جمال
تت مه شه عمره ستا د زوی صورت حال
دی د غليمانو سترګو خار د خطر زنګ
زړونه پيوند شوي دلته نه غواړو نور جنګ
هر يو غوښتنه د ولس به پوره کيږي
پوهې ته به کار کيږي مينه به خپريږي
پيغله به ډاکتره وي ځوان به تکړه کيږي
زړه به د غليم آقتاشه کړو دننه ړنګ
زړونه پيوند شوي دلته نه غواړو نور جنګ.
"""""""""""""""""""""""""""""""""""""""""""""""""
غزل!
په یار مې رحم کړه خالقه خدایه
د زړه له کور یې خبر شوی یمه
زما راستي دې ورته وښودله
له خطا ګانو یې تېر شوی یمه
تاچې د کوم دوزخ کیسې راوړي
زه ډېر پخوا ترې بهر شوی یمه
چې سپوږمۍ،ستوري په کې نه ځایږي
له خپل وطن څخه سیر شوی یمه
زه به یې څه کوم آقتاشه ګله
دیار له سترګؤ چې هېر شوی یمه.
صفحه درسره لایک او فالو کړې ملګرو 😘
د نورو شاعرانو پيژند ګلوي لپاره موږ و څاري
Rana mushaira رڼا مشاعره
