02/06/2024
في جميع مسلسلات البيئة الشامية المشوهة ..لابد من أن يقوم الكاتب العظيم بعمل مشهد العرس و الزواج ..المكرر دائما" . بيصير عمره 18 سنة و بيبدأ يتنرفز و يعصب و يصبح سريع الغضب , فتكتشف والدته بسرعة بديهتها بأنه صار لازم يتزوز ( يتزوج )
تجتمع مساء" , مع زوجها البطل اللي دائما معصب ع الفاضي و شايل هموم الحارة اللي لحد الآن ماعرفت شو هي الهموم و المشاكل , و تقول له : ابنك صار لازم يتزوج ...
الأب بيسحب نفس اركيلة عميق و بيطلع ع الأرض و بيقول : اي مزبوط .. شوفي له شي بنت من بنات الحارة ( اجباري من نفس الحارة من شان مورثة الذكاء ماتطلع لبرا )
طبعا هنا الأم .. بتصفن و بتقول لزوجها ( ابن عمها يقبر قلبها و يكفنها الهي ) : في بنت ابو عبدو العنفة ( نسبة الى المحطة الحرارية ) ..
تاني يوم .. بيفيق عريس الغفلة معصب , و بتقول له أمه : هات البشارة ..
بيقول لها : شو في ؟
بتقول له : بدي أخطبلك بنت ابو عبدو عنفة .. رمزية
و هون بيبتسم العريس مع موسيقى تصويرية و بيطلع في السما .. و بتبلش هرمونات الحب تسري في عروقه ..( خلص حبها ووقع في حبها من دون ما يعرف شكلها ولك بيجوز مثلا يكون الها ريحة فم, ريحة خمة مو مهم المهم رح يصير عنده حرمة....
أصلا الشكل مو مهم لأنه اسمها كافي بأنه يحبها و يصير مخلص الها لأنه اسم رمزية كله مشاعر و احاسيس و اثارة ...يعني أي اسم رح يحبه
بتطلب أم العريس ايد البنت و بيوافقوا ..
و بتبدأ تجهزيات العرس المتمثلة بغرفة نوم
و الخياطة دائما هي الحكم الوحيد و هي من يقرر موعد العرس لحتى يخلصوا الفساتين
و يبدأ العرس الجميل ..مشهد من عرس النسوان و طبالة على أغنية ( عودوني ) لعمرو دياب , تليها الأغنية الاجبارية ( يا قضامة ناعمة يا قضامة مغبرة )..و الرقص الابداعي كل وحدة بالتناوب بتقوم بالشحاطة و بتعمل زوايا قائمة بايدها و كأنها ماسكة طابة ..من ثم تجلس لتقوم الحسناء اللي بعدها و هكذا ...
ويأتي المشهد الرجالي .. حمام السوق و الأجسام اللي بتاخد العقل ..كله شعر من الظهر و حتى شعر بالصرة و القصبات الصدرية طالعة و الكرش المدلوق و بطاط الرجلين المدعبلين .. و العريس فرحان فرحان فرحان ...
بلا طول سيرة .. بيجي المشهد الاخير( غرفة النوم )
بيدخل العريس على الغرفة و بيسكر الباب , و بتكون العروس قاعدة ظهرها اله و منزلة الطرحة على وجها ..
بيجي روميو .. و بيقلها بكل رومانسية : مسا الخير ..
و هي بتقول له بكل خجل : مسا النور ابن عمي..
كلمة ابن عمي ..بتخليه يشعر بأنه ملك الكون صار اوباما ..و كأنه صار عنده اي فون 6 بلس ..
بيرفع الطرحة من ع خلقتها ( مع موسيقى تصويرية اغنية بالي معاك بالي بالي بالي بالي ..ع العود ) و لسه ما بيعرف هو مع مين عم يحكي و كأنه في مسابقة (حك و اربح ) .و يا حظي !!!
و بتطلع العروس متمكيجة بألوان الدنيا كلها على وجهها مع ضحكة كلها خجل ..
و بيصرخ : يالله يالله شو هاااد ؟
كلمة ( شو هاد ) كلمة سحرية للبنت الشرقية و ماتزال مستخدمة حتى يومنا هذا , بتخلي المرأة تنبسط و تكيف على حالها مع أنه الكلمة مافي شي و لا وفيها وصف لأي شي .. بس ( شووو هاد ؟ )
و بيكمّل : سبحان الله ..معقول هالجمال كله .. ( على اساس هو داير الدنيا كلها و مسافر و بيعرف بنات كتير .. ) يعني هو مو شايف غير أمه و أخته و عمته و خالته .. فأي كائن بشري أو فضائي على شكل أنثى رح تعجبه..
و بيقرب عليها و بيخلص المشهد ...
منقول
