Taha - WordPress Developer

09/03/2026

تم بحمد الله تصميم وإنشاء الموقع الإلكتروني ل شركة بناء جروب للتطوير العقاري ✨
ل زيارة الموقع الإلكتروني : binaa-development.com
لتصميم موقع إلكتروني تواصل معي علي واتساب : https://wa.me/message/QD6MSMTCRX75C1

الرقم للتواصل : 01060510936

02/02/2026

A website for agricultural shop ✨

02/02/2026

متجر المنصور في رداءه الجديد ✨
اللينك ل المتجر : https://almansouragri.com/

19/04/2025

الثيم Theme هو التصميم بتاع الويب سايت هو الشكل الخارجي للموقع الإلكتروني
يعني ؟
يعني الصفحات والازرار و الألوان و النصوص وكل الحاجات دي
ممكن تعملها إنت من الصفر
زي اتنين من الناس
المبرمج اللي بيبدا من اول ال HTML و ال CSS وبيصمم الموقع من الصفر ودول اتكلمنا عنهم من كذا بوست من البوستات اللي فاتت
أو مطور الووردبريس اللي بيصمم custome website أو بردو ويب سايت من الصفر
أما بقا عن الثيم ف دا واحد من أكبر ميزات الووردبريس وهو أن فيه مبرمجين هم بالفعل صمموا ثيمات جاهزه بنقدر نستخدمها ونعدل عليها أو نستغل المواصفات والامكانيات اللي المصمم وفره في الووردبريس
طيب ممكن تشرح أكتر ؟
حاضر
الأمر بكل بساطه أن فيه ثيم بيبقي جاهز
إحنا بنستخدمه و نعمل حاجه من اتنين
يا إما نخلي كل حاجه زي ما هي ونرفع بياناتنا بس عليه (و دا شغل مبتدأ جداً واللي في الغالب بيعملوا كل اللي بيعرض ويب سايت بالف و الفين جنيه وهكذا ) ونغير بس النصوص و الالوان ونضيف بيانات موقعنا أو موقع العميل اللي شغالين عليه ودا الاوبشن الأول
أو أننا نستغل بقا الميزات اللي وفرها المصمم في الثيم بتاعه و الخبرات اللي حطها ونستخدمه ك حجر أساس نبدا بيه بدل ما نبدا من الصفر زي مبرمج البرمجه الخاصه
ونبدأ نحذف كل الصفحات وكل البوستات الموجوده ونبدا تصميمه مره تانيه ولكن بقا عندنا حاجات كتيره جاهزه و templates متوفره مع الثيم دا
و دا الاوبشن التاني و دا اللي بيعملوا أصحاب الخبرات في مجال الووردبريس وخصوصاً أن لازم مع الشغل بناخد بالنا من ال SEO و الامان في الموقع وهكذا
طيب بنشتريه إزاي ؟ وبكام ؟ وهل غالي ؟ أو لازم اشتري مينفعش يكون فيه مجاني ؟
في الحقيقه
آه فيه ثيمات مجانيه
ومش ثيم أو اتنين ولا حتي عشره ولا حتي الف
دا في الآلاف الثيمات حرفياً متوفره مجاني تماماً ودا متوفر مع الووردبريس لو دخلت علي appearance في الداشبورد ثم themes ثم add new theme
هيتفتح عليك بوابات جحيم وهيظهرلك عدد من الثيمات لدرجة هتتوه ومش هتبقي عارف تختار أنهي لذالك
وإن شاء الله في بوست لوحده هنتكلم عن إزاي أختار أكتر ثيم مناسب ليا وللموقع اللي حابب اصممه
المهم
طيب لما هو مجاني ليه عملوا مدفوع و اي يخليني اشتري حاجه متوفر منها المجاني ؟
طبعاً عزيزي المتابع الاجابه بسيطه جداً
وهي بكل بساطه أن دي سنه الكون و أن مستحيل تلاقي اي حاجه في الدنيا fully functional مجانيه
ومستحيل تلاقي أفضل حاجه وتكون بشكل مجاني
ولذالك هتكلم عن الثيمات المدفوعه
ودي فيه منها نوعين
حاجه إسمها GPL ودي هتحتاج بوست لوحده ولكن هتكلم عنها باختصار بس في البوست دا
و فيه الثيمات المدفوعه اللي بنشتريها من مطورها و صاحبها مباشرةً
طيب إي الفرق بردو ؟
في الأول خليني أتكلم عن الثيمات المدفوعه بشكل عام ولكن في سكرين بس
الثيم المدفوع بيكون فيه حدود من اول 50 دولار لحد 100 وطالع
طيب بيكون بالسعر دا ليه
لأنه بيكون فعلاً يستاهل السعر دا وكل ما تختار ثيم غالي هيكون أفضل لموقعك ودا لأنه بيحتوي علي جوانب كتيره ابسطها واللي هو أهمها
Responsiveness
SEO
Security
طبعاً كل شيئ نسبي ولكن الثيم المدفوع هيكون أفضل بكتير أكيد عن المجاني في الحاجات دي (طبعاً لا أعني إن الثيم المجاني غير مفيد بل بالعكس فيه مواقع كتيره متصممه ب ثيمات مجانيه و شغاله تمام التمام وميت فل وأربعتاشر)
ومش بقول المدفوع أفضل لمجرد إنه بفلوس ولكن لأن دا الواقع فعلاً
المهم
بيتوفر كمان مع التلات حاجات دي في الثيم المدفوع
الاهتمام بالتصميم و الالوان والخطوط و النصوص و البلاجينز المدفوعه اللي بتكون متوفره مجاني مع الثيم و ال templates أو ال demos اللي بتكون معاه وحاجات تانيه كتير
طيب اي هو ال GPL
هو ببساطه بيكون نسخه من الثيم ولكن معدله
و لا تحتوي علي حاجه مهمه وهي التحديث المجاني عكس الثيم المدفوع من مطوره
وبيكون في حدود 10 دولار
و فيه مواقع كتيره بنشتري منها النسخ ال GPL اللي بالمناسبه بتوفر نسخ GPL من ال plugins كمان
وتقدر تبحث وهتلاقي كتير
و دا موقع ممتاز الحقيقه وبيوفر كاش باك وشوية حاجات تحفه
https://wordpresslicenses.com/
(ملحوظه : اللينك ليس affiliate ولا يوجد به اي خصومات)
أما عن الثيمات المدفوعه ف بيكون في حدود 50-100 دولار
و بنشتريه من موقع theme forest المعتمد ل شراء الثيمات هسيب اللينك في التعليقات

اكيد دا مش كل حاجه واكيد الكلام مش هيخلص و إختيار ثيم مناسب لموقعك بيوفر عليك شغل كتير جداً ولذالك خد وقتك و كن دقيق في اختيار الثيم علي قد ما تقدر
و اول حاجه تفكر فيها
الموقع اللي بعمله بعمله ل اي ؟
المجال بتاعه اي ؟
و اي اللي انا محتاجه فيه ؟
اي اللي محتاج يكون الثيم موفره ؟
وعموما زي ما قولت في أول المقال هتكلم عن الثيمات وازاي أختار أكتر ثيم مناسب لموقعي في بوست تاني لوحده
وكالعاده الكلام مش هيخلص ودا كان
نبذه مختصره عن الثيمات
أنا خلصت
يا تراا بعد ما اشترينا الثيم هنعمل إي ؟
نتقابل الجمعه الجايه في بوست جديد ✨
سلااام ........! ✨☕

17/04/2025

هنبدأ في تصميم الويب سايت
واول حاجه هنعملها هي الثيم
إي هو الثيم Theme ؟
وبنشتريه إزاي ؟ وبكام ؟ وهل فيه منه مجاني ؟
علي ميعادنا كل جمعه الساعه 6 مساءاً ✨☕

11/04/2025

اشترينا الإستضافة وخلاص هنعمل الويب سايت
في بوست انهارده هنتشري الدومين
الدومين دا هو إسم الشركه أو المتجر أو حتي اسمك لو بتعمل بورتفوليو لنفسك أو لعميل مثلاً ف هيبقي اسم العميل
يعني لو عندنا مثلاً
facebook.com
youtube.com
google.com
وهكذا
ف دا هو الدومين بتاع فيسبوك أو جوجل أو يوتيوب وغيرهم
ودا بنشتريه مع الهوست أو الإستضافة يعني وبنرجع نصمم عليهم الموقع بتاعنا بعد كدا
وفيه حاجتين بُساط اوي ولكن مهمين محتاج تعرفهم
الدومين كل الحروف بتاعته بتكون small
و تاني حاجه فيه شركات استضافه بتوفر الدومين مجاني ل اول سنه زي شركة هوستنجر اللي وفرنا خصم 20% في البوست اللي فات اللي بيتكلم عن شركات الاستضافة المختلفه وكل ما يخص الاستضافات وهسيب اللينك في التعليقات بردو
بيوفر خصم 20% + دومين مجاني ل اول سنه

يبقي هشتري الدومين إزاي ؟
فيه اكتر من طريقه
ممكن يكون مش معايا استضافة اصلا ف بدخل اشتريها و وانا ماشي في تظبيط اعداداتها هلاقي إنه بيسالني عندك دومين ولا لسه هتشتري واحد جديد
لو هتشتري هو بيسهل عليك الإجراءات وخصوصاً لو الخطه بتوفر دومين مجاني ل اول سنه وبتكتب الدومين وهو بيسجله
وبكدا تكون اشتريت الدومين
إنما لو اخترت انك عندك واحد وعايز تربطه ب الاستضافة ف هيطلب منك بعض البيانات ودا نقاش هنتكلم عنه في يوم تاني وبوست غير دا

وفيه بعض الحاجات اللي عايز اقولها عن الدومينات
أول حاجه
أنها ممكن تروح في اي وقت عشان كدا لو فيه دومين معين عايز تشتريه ف انت متعرفش إذا كان فيه حد هيسبقك ويشتريه قبلك ولا لاء أو إذا مكان موجود اصلا ولا حد اشتراه already ف لو عايز دومين ومش عايز تفقده يفضل تشتريه وتحافظ عليه قبل ما يروح منك

تاني حاجه بقا هي
إزاي اعرف إذا كان الدومين دا موجود ولا لاء
أنا بختصر الطريق علي نفسي وبدخل علي ويب سايت شركة نيم شيب وببحث بالدومين وهو بيجيب available ولا لاء
و دا لينك الويب سايت
namecheap.com

دا تقريباً كل اللي كنت محتاج أقوله
كالعاده الكلام مش بيخلص ودا مش كل حاجه عن الدومين ولكن دا علي الأقل اللي هتحتاجه عشان تشتري أول دومين ليك
أنا خلصت
يا تراا بعد ما اشترينا الهوست والدومين هنعمل ايه تاني ؟ هل يا تراا هنبدأ في التصميم علطول ولا فيه حاجه هنتكلم عليها تاني ؟
نتقابل الجمعه الجايه في بوست جديد ✨
سلااام ......! ✨☕

10/04/2025

بعد ما عرفنا شركات ال host المختلفه ونشتريه إزاي واخدنا خصم 20% من شركة هوستنجر
الخطوه اللي بعد كدا اي ؟
الدومين ؟
طيب
إي هو الدومين ؟
و اشتريه إزاي ؟
علي ميعادنا غداً الساعه 6 مساءاً ✨☕

21/03/2025

علي مدار الفتره اللي فاتت ناقشنا تفاصيل تصميم ويب سايت أو موقع إلكتروني بالووردبريس
وقولنا الخطوات
بنشتري الهوست والدومين
بنصطب الووردبريس
بنختار الثيم ونشتريه لو هنشتري ثيم مدفوع
ثم بنصطب ال plugins وبنشوف لو فيه plugins مدفوعه هنستخدمها بنشتريها
ثم بنبدا التصميم بتصميم الصفحات
وهكذا وهكذا

في بوست النهارده هتكلم عن أول حاجه نعملها
أو خليني اقول تاني حاجه لان زي ما اتفقنا البوست اللي فات إن أول خطوه بنعملها هي التجهيز
بعد التجهيز مباشرةً

هنشتري الهوست

طيب هتكلم عن إي في البوست دا ؟؟؟
عن أي هو الهوست اصلا ؟
بنشتريه إزاي وامتي وليه ؟
اي الشركات اللي بتوفره ؟
اي أفضل شركه فيهم ؟
انا بستخدم مين ؟
وفيه هديه في آخر البوست

خلينا نبدأ ب
إي هو الهوست اصلااا ؟
What is it Host !?
لو هنترجم كلمه host ف المقصود المضيف
يعني اي مضيف ؟

لو جالك زائر في البيت إنت بتبقي أسمك اي ساعتها ؟
مضيف
مش كدا ؟ ليه ؟ لأنك بتضيفه وبتوفره كل شيئ
طيب هو معروف ب إسم اي
لما بنقول هوست (host) بنبقي قصدنا نقول بالعربي (الإستضافة)
طيب شركات الاستضافة بتوفر اي أو الهوست دا اللي هو اي
الهوست بيكون عباره عن سيرفر هو اللي بنخزن عليه جميع بيانات الموقع أو الداتا
صور
فديوهات
نصوص
الوان
مشاريع
كلمات سر
معلومات
بيانات متجر أو بيانات المستخدم مثلاً
وهكذا
اي كلمه تنطبق تحت كلمة بيانات أو داتا وموجوده داخل الموقع ف تخزن علي الإستضافة
بنشتريه إزاي وامتي وليه ؟
إزاي ! فيه شركات معينه بتوفر الخدمه دي ومش شركه ولا اتنين ولا تلاته
لاء
كتير
كتير قد اي ؟
كتير اوي
مش هقدر لا أنا ولا غيري يعدهم
ولكن المشهور منهم قليل
ودول اللي هذكرهم في البوست دا ومش كلهم بردو
أمتي ! اول ما انوي فعلياً في بداية التصميم
ليه ؟ طبعاً جاوبت علي السؤال دا في الكام السطر اللي فوق والاجابه بكل بساطه عشان نخزن عليه بيانات الموقع والموقع نفسه بكل ما فيه
إزاي بقااا ؟
حوار شراء الإستضافة مش كبير اوي ولكنه مهم لأن دي شركه إنت هتكمل معاها لآخر حياة الموقع بتاعك ولذالك يفضل تختارها بعنايه هو طبعا تقدر تحول من شركه ل شركه بعد كدا ولكن طبعا بيكون افضل من الأول نختار انسب حاجه لينا
ولذالك علي اساس اي بفكر وابحث واختار شركة الإستضافة بتاعت موقعي ؟
علي اساس
1. الحجم اللي بتوفره الشركه ل الخطه اللي هشتريها
٢. ال bandwidth ودا مهم للمواقع اللي بيجيلها زيارات كتير (في حالة موقعك لسه صغير او لسه في البدايه ومش هيكون عليه زيارات غير كام ألف ف انت تمام )
٣. نوع التخزين اي بتاع الشركه دي هل SSD ولا HDD وطبعاً ال SSD أفضل وأسرع
٤. كم عدد الدومينات الفرعيه اللي بتوفرها الخطه
اي هي الدومينات الفرعيه دي ؟
هنتكلم عليها في بوست لوحدها
٥. السرعه
٦. مكان السيرفر (حاول دايما تختار اقرب مكان )(غالباً يا فرنسا يا ألمانيا يا المملكه المتحده "ركز المملكه المتحده وليس الولايات المتحده الامريكيه") {طبعاً بتكلم بالنسبه ل مصر اوم الدونيا}
٧. شهادة SSL للأمان المجانيه بيوفر ؟ كام ؟ ودي مهمه جداً جداً جداً جداً
٨. هل الشركه بتوفر حمايه ضد هجمات ال DDoS ولا لاء
٩. النسخ الاحتياطي ؟ يومياً ؟ أسبوعياً ؟ شهرياً ؟ ودي من الحاجات المهمه كمان
١٠. الدعم الفني ودا مهم عشان لو احتجت ترجعلهم في اي شيئ
١١. و لوحة التحكم وهل سهله في استخدامها ولا معقده
١٢. هل الشركه دي بتوفر CDN
اي هو ال CDN دا
هنتكلم عنه في بوست لوحده لأن دا حوار ومحتاج شرح استني البوست بتاعه لو حابب تعرفه
١٣. هل الشركه بتوفر ترحيل الموقع migration يعني
١٤. واخيرا وطبعاً مفيهاش كلام التكلفه
التكلفه كام وهل غاليه ؟ وبالنسبة للشركات التانيه اي الوضع ؟
بالمناسبه هوستنجر من أفضل الشركات في الأسعار

طبعاً طبعاً دا مش كل شيئ ولكن اهم اهم الاشياء وكلهم هنتكلم عنهم في بوستات جايه كتير

مين الشركات اللي بتوفر الاستضافة ؟
فيه شركات كتير اوي زي ما قولت وهكتبلكم كذا شركة من اشهر الشركات ولكن اكيد مش كلهم
Hostinger
HostGator
GoDaddy
Blue host
Name cheap
SiteGround

وفيه معلومه مهمه هسيبها في التعليقات لأنها مهمه جداً واحنا بنشتري الهوست

مين أفضلهم ؟
بالنسبه للسؤال دا اللي بيجاوب عليه هو كلمه ( إزاي+احتياجاتي )
بمعنى ؟
بمعني هتركز في الإجابة علي كلمة إزاي وتبحث اكتر وتقرأ أكتر وتشوف اي في الحاجات دي انت محتاجها واي اللي متوفر في الشركات تشوف هتختار اي منهم واي المهم بالنسبالك يعني فيه ميزه معينه أنت محتاجها وفيه ميزه تانيه تقدر تستغني عنها شويه مقابل الميزه الاولي دي وهكذا وبتبدا تشوف الشركات بتوفر اي في دول وبعد كدا بتشوف احتياجاتك انت اصلااا اي اللي انت محتاجه في موقعك اي اللي انت محتاج أن الاستضافة بتاعتك توفره هل محتاج CDN ولا شركتك او موقعك مش محتاج حاجه زي كدا هل محتاج ميزة ترحيل الموقع أو ال migration ؟ وهكذا وعلي الأساس دا بتبدا تختار
إنما نصيحتي متسمحش لحد يقولك هي دي الشركه المناسبه قولا واحداً

لاء

آه فيه شركات معينه معروفه أنها ثقه أو إنها بتوفر خدمات حلوه
تمام
ولكن !
هل الخدمات دي مناسبه بالنسبه ليا ؟
ف أنا بشوف المناسب بالنسبه ل احتياجاتي وابدا علي الأساس دا اختار من الاختيارات أو الخدمات اللي بتوفرها الشركات المختلفه واختار الشركه اللي هشتغل معاها
أنا بستخدم مين ؟
الحقيقه انا بستخدم شركه هوستنجر
و لم أواجه اي مشكله معهم حتي الآن
لا أزعم إنهم افضل شركه ولا اقول هذا بتاتاً ولكن حتي الآن تجربتي معاهم خاليه من التصادم أو بمعني اصح خاليه من المشاكل
ف تقدروا تشوفوا الخدمات أو الخطط اللي الشركه بتوفرها وتختاروا المناسب منها ليكم
وتقدروا تدخلوا من اللينك دا
https://hostinger.ae?REFERRALCODE=1TAHA047
طيب اي هي الهديه اللي في آخر البوست ؟
الهديه بكل بساطه هي خصم 20% علي خدمات الاستضافة من شركة هوستنجر وهسيب اللينك في التعليقات

أنا خلصت
اكيد دا مش كل حاجه عن الإستضافة واكيد دا مش كل الشركات اكيد هتبحث اكتر وتقرأ أكتر لحد ما تلاقي الحاجه المناسبه ليك ، انا بس حاولت اوفر مقال بسيط يقدر يساعدك وحاولت اسهل اللغه بحيث توصل للكل ولو استقريت علي هوستنجر متنساش تاخد الخصم ال 20% من اللينك من التعليقات
أنا خلصت

يا تراا بعد ما اشترينا الإستضافة هنعمل اي تاني
اي الخطوه اللي بعد كدا ؟
نتقابل الجمعه الجايه في بوست جديد ✨
سلااام ......!✨☕

اختر حل استضافة المواقع الإلكترونية الخاص بك وانشئ موقعك الخاص! من الاستضافة والمجالات المشتركة إلى الخادم الخاص الافتراضي - لدينا كل ما يلزمك للنجاح بالإنترنت.

20/03/2025

أخيراااا
بكرا هنشوف شركات ال host المختلفه و اشتري من مين فيهم وليه وازاي اختار أفضل شركة استضافة مناسبه اصلااا
واشتري ال Host إزاي
علي ميعادنا غداً الجمعه الساعه 6 مساءاً ✨☕

14/03/2025

ممكن تكون مفكر اني هتكلم انهارده عن الهوست أو الدومين أو حتي هدخل في التصميم علطول
ولكن الحقيقه فيه خطوه هي مش من أهم الخطوات في تصميم ويب سايت وانما هي اهم خطوه حرفياً
أهلاً وسهلاً أنا طه محمد وبوست انهارده هو أول بوست في خطوات تصميم المواقع الإلكترونية
أول حاجه بنعملها لما نيجي نصمم هي مرحله بحب أسميها
مرحله التجهيز
في المرحله دي والخطوه دي بالتحديد بنجهز كل حاجه هنحتاجها في التصميم مش من الالف ل الياء ولكن مع الوقت وكثرة التصميم والخبره هتدخل المشروع وإنت عندك تصور اخير ل end result وهيكون عندك توقع ل شكل التصميم الاخير بيبدا من تجهيز اللوجو و النصوص والصور والداتا كلها لحد الهويه البصريه ل الويب سايت وكمان شكل التصميم وعدد الصفحات وكمان اللينكات المطلوبه أو اللي إسمها CTA (call to actio)
يعني من الآخر كدا اي هي ال buttons اللي محتاجها العميل في الويب سايت بتاعه
طيب خلينا اقولهم بالترتيب
1. بتسأل العميل عن الغرض من الويب سايت ونوعه اي هل ويب سايت تعليمي ، هل بورتفوليو ، هل multivendor website ، هل landing page ومع اختلاف بقا انواع المواقع وعلي حسب العميل عايز نوع اي لأن علي أساسه هيختلف التصميم
2. الإسم وال tagline وال logo هم تاني حاجه بنطلبهم
و دول بالمناسبه بناخد منهم الهويه البصريه بتاعت الويب سايت
إي الهويه البصريه دي ؟؟
الصبر🤌 هتعرف في البوست دا ، خليني بس أكمل
هتطلب الإسم وال tagline واللوجو بتوع العميل
اي ال tagline دا
لو كنت فاتح ويب سايت علي لابتوب وحطيت الماوس علي الايقونه بتاعت الويب سايت فوق كدا هتظهر جمله بتكون سطر من كام كلمه وبتدل باختصار علي الموقع
هي الجمله دي ال tagline
3. تالت حاجه بنطلبها من العميل هي الداتا الخاصه بالويب سايت بتاعه اللي هو حابب يحطها زي النصوص اللي هيكتبها و الصور اللي هيضيفها وغيره
4. بتسأل العميل عايز الويب سايت من كام صفحه و اي هم الصفحات دي واي الغرض منهم (بمعني صفحة ال about Us مثلاً بنصممها عشان نكتب فيها عن الويب سايت وبيوفر اي وهكذا بقا )
5. بعد كدا بيبدأ شغلك إنت ك مصمم بقا قبل ما تبدأ في اي حاجه وقبل ما تمسك الماوس أو تفتح اللابتوب اصلا لازم تكون مجهز تصميم هتشتغل عليها من حيث ال layout ، ال design ، ال pages
وكل ما يشمله التصميم من معني
4. صممت وخلصت خلاص
هنبدأ بقا نشتغل علي اللابتوب ونطلع بشغلنا للنور

6. أخيرا هنشتري الهوست والدومين
ولكن مش انهارده هنشتريهم الجمعه الجايه
7. طيب اي هي الهوية البصريه؟
الهويه البصريه بكل بساطه هي ألوان الموقع وشكل التصميم وال buttons اللي موجوده فيه و دول بناخدهم من الألوان اللي في اللوجو

8. وآخر حاجه بنطلبها من العميل هي لو فيه مواقع مشابه أو فيها افكار هو حابب يعمل زيها
9. و اي هي الميزانية بتاعته اللي حاططها للموقع عشان علي أساسها هنختار الثيم والهوست والبلاجنز لو هنشوف هنستخدم بلاجنز مدفوعه ولا مجانيه بس
الخلاصه إي طيب ؟
الخلاصه إني قبل ما ابدا في التصميم بجهز كل حاجه بحيث بمجرد ما ابدا في التصميم مضعيش وقت في حاجات جانبيه أنا كنت في غنى عنها

أخيرا وليس آخراً
🔷 نصيحه مهمه
حاول متبدأش تصميم قبل ما تعمل دول صدقني مهمين جداً وبيوفروا وقت كتير اوي وهيوفروا عليك مجهود كبير انت في غنى عنه

أنا خلصت نتقابل في بوست جديد الجمعه الجايه
طبعاً عارفين عن إيه
سلااام .......!✨☕