26/11/2023
وفجأة واحنا في الجنة هنلاقي ملائكة بتنادي في طرقات الجنة "يا اهل الجنة ، ان الله يستزيركم ! فحيّ علي زيارة الرحمن "
تخيل ربنا جل جلاله يدعونا لزيارته!
يحكيلنا حبيبنا النبي ﷺ اننا ساعتها هنخرج ونلاقي قدام قصورنا حاجة اسمها النجائب ، وهي ركوبة ربنا خلقها مخصوص عشان يركبها اهل الجنة وهما رايحين يزوروه ﷻ
فنركب النجائب ، و نوصل للوادي اللي هنزور فيه رب العزة
وفجاة .. هنسمع صوت عذب يُنادي: "يا اهل الجنة سلام عليكم"
فنرد كلنا في نفس اللحظة وقلبنا طاير من الفرحة ونقول : "اللهم انت السلام ومنك السلام ، تباركت يا ذا الجلال والاكرام"
فيقول الله ﷻ : "يا اهل الجنة هل رضيتهم؟"
فنقوله يارب وكيف لا نرضي وقد غفرت ذنوبنا وادخلتنا الجنة
فيقول الرب ﷻ :" يا اهل الجنة اسألوني ما شئتم..
فنقول له يارب ارض عنا..
فيقول ﷻ : يا اهل الجنة لو لم ارض عنكم لما ادخلتكم جنتي ، فسألوني شيئا اخر..
فنجتمع علي كلمة واحدة..
يارب ارنا وجهك ننظر اليك..
فيقول سيدنا النبي ﷺ :" فتُكشف الحُجُب ، فما أُعطوا لذّة احب اليهم من النظر الي وجه الله الكريم"
كنا دايما في الدنيا لما بنشوف حاجة جميلة اوي نقول : الله ! بس يومها هتبقي اول مرة نقولها بجد .. الله!
ومن شدة سعادتنا تفضل وجوهنا ناضرة مستبشرة :
﴿ وُجُوهٌ يَوْمَئِذٍ نَاضِرَةٌ * إِلَى رَبها نَاظِرَةٌ ﴾
فاللهم ارزقنا هذه اللحظة ولا تحرمنا لذه النظر لوجهك الكريم ..
