Creatova

09/07/2024

تابعوا صفحة كرياتوفا أكاديمي 💛

سنة 2005 وفي عز توهج سكايب Skype، شركة eBay اشترته بمبلغ 2.6 مليار دولار، الهدف الوحيد من الصفقة هو دمج خدمات سكايب مع منصة eBay للتجارة الالكترونية علشان تمكن المشتري والبائع من التواصل بسهولة أكبر، عن طريق انها تعمل دمج بين البرنامج وبين المنصة وبكدة هتستفيد بالقاعدة الضخمة بتاعة سكايب.

المفروض دي واحدة من أقوى استراتيجيات الاستحواذ اللي بتقوم على الاستحواذ على شركة ودمجها بهدف تحسين كفاءة الخدمة الأصلية والسيطرة على حصص أكبر من السوق وتحسين تجربة المستخدم، وده هدف استراتيجية ال Horizontal Integration او التكامل الأفقي أو التوسع الافقي.

اللي حصل بقى انه على مدار 4 سنين بعد الاستحواذ عملية الدمج دي فشلت تماماً، وفشلت eBay في السيطرة على ادارة سكايب، الفشل ده كان بسبب 3 حاجات رئيسية..

- أولاً مكنش في أي توافق نهائياً بين الادارتين، يعني على الرغم من انهم شركة واحدة لكن سكايب باداراتها والـ Operations بتاعها مختلفة كلياً عن eBay لأن مجال سكايب اصلاً خاص بالاتصالات وده مجال مختلف تماماً عن eBay وهو مجال التجارة الاكترونية، فالادارتين كانوا على طول في خلاف مع بعض.

لأن ادارة سكايب كانت شايفه ان البرنامج أكبر بكتير من انه يتحول لمجرد أداة جوه منصة تجارة الكترونية للتواصل، وانه المفروض كيان مستقل، واللي بتعمله eBay ده هو قتل سكايب ببطئ، وادارة eBay شايفه انه اصلاً عملية الاستحواذ دي تمت علشان سكايب يكون خاضع للمنصة.

- ثانياً: كان في مشاكل تقنية كتير بين سكايب و eBay، لأن المنصتين كانوا مختلفية 180 درجة في تقنيات البرمجة والتكنولوجيا المعتمدة عليها كل منصة، فعملية الدمج مكنتش بالسهولة دي خالص وكان في وقت ومجهود وتكاليف اضافية كبيرة جداً هتتسبب في اعادة برمجة المنصتين وتوحيد التكنولوجيا بتاعتهم.

- ثالثاً: بسبب الحاجتين دول الصراعات الداخلية بين الاداراتين بدأت تتطور وتكبر وتعطل الشغل أكتر، واستمرت لمدة 4 سنين لحد سنة 2009.

شركة eBay ادركت بعد 4 سنين ان العملية دي فاشلة وكل اللي خدوه من الصفقة دي وجع دماغ وخسائر فلوس كتير جداً ده غير قيمة سكايب السوقية اللي عمالة تنزل والبرنامج بيقع ببطئ، لحد ماخدوا قرار ببيع سكايب ووقف النزيف ده.

في 2009 قدروا يبيعوا 65% من أسهم سكايب لمجموعة من المستثمرين بقيمة 1.9 مليار دولار، لحد ماجت مايكروسوفت في 2011 وقررت تشتري البرنامج في أغرب وأغلى صفقة في الوقت ده بقيمة 8.5 مليار دولار، وده كان رقم ضخم جداً ومحدش كان عارف ليه مايكروسوفت دفعت الرقم ده في سكايب، اللي اصلاً فشل بعد كام سنة.

eBay فشلت في الـ Horizontal Integration باختصار لأنها استحوذت على خدمة بعيدة كل البعد عن تخصصها ومتفهمش فيه اي شئ على عكس مثلاً شركات تانية قدرت تطبق استراتيجية الاستحواذ دي بكفاءة عالية..

زي مثلاً فيس بوك لما استحوذت على انستجرام سنة 2012 وواتس اب سنة 2016، وكذلك شركة ديزني لما استحوذت على Pixar في 2006، وكذلك جوجل لما استحوذت على يوتيوب سنة 2006.. العامل المشترك بين كل دول ان كل شركة كانت بتستحوذ على شركة في نفس مجالها تقريباً وفاهمين في ادارة و Operations بعض علشان يحصل التكامل بشكل جيد.

#كرياتوفا

23/06/2024

الراجل ده اسمه دان برايس صاحب شركة Gravity Payments مقرها في سياتل، الولايات المتحدة واللي اتأسست سنة 2004، الشركة دي شغالة في الـ Fintech او التكنولوجيا المالية.

دان برايس مليونير وأرباحه الشخصية في السنة بتوصل لمليون دولار، في 2019 كان بيحتفل مع موظفيه ال 120 بفتح مقر جديد للشركة واعلن عن اعلان صدم الكل.

الراجل قال انه هيقص مرتبه السنوي بنسبة 90% من مليون دولار ل 100 الف دولار بس ، وقصاد ده هيعلي جميع مرتبات موظفينه ال 120 لحد أدنى 70 الف دولار في السنة، في حين ان المرتبات في وقتها عنده كان لا تتعدى ال 30 الف دولار.

يعني أقل موظف في الشركة هيكون راتبه 70 ألف دولار في السنة

في لقاء مع CNN المذيعة بتسأله انت ليه عملت كده؟

قالها انه بيدرس القرار ده بقاله سنين، وان ال 70 الف دولار دول هما الحد الأدنى للحياة الكريمة من وجهة نظره اللي مفهومها مبيقفش بس عند توفير الاساسيات، الحياة اللي تتيح لشخص بيت وعربية وتعليم جيد لأولاده ورصيد في البنك وسفر، والمبلغ ده كمان مينمم ان الشخص يبقى مبسوط في حياته.

دان برايس قال ان الموظفين دول بيشتغلوا في المقام الاول علشان الفلوس والحياة الكريمة، فمجرد ماتوفرلهم ده هيبدعوا بشكل اكبر بكتير لأن المكان ده بقى بالنسبالهم الأمان، ودي مش اول مرة يعملها، عملها مرة في 2015 بس كان المبلغ اقل من كدة بكتير.

قال كمان انه مليونير ومش هيفرق معاه المبلغ ده دلوقتي، في حين انه هيفرق جامد مع الموظفين، وانه بيستعد للوصول للحظة دي من سنين.
دان بيدعوا جميع الشركات في امريكا انها تعمل زيه ويخلوا مينمم الرواتب 70 الف دولار في السنة.

#كرياتوفا

**اعادة نشر

22/06/2024

جيل التمانينات والتسعينات هما اللي عارفين شركة Compaq كويس اوي، الشركة اللي كانت بتصنع واحد من أقوى لاب توبات العالم وقتها اللي بيتميز بقوته وسرعته واعتماديته..

شركة كومباك اتأسست سنة 1982 وتم الاستحواذ عليها سنة 2002 من شركة HP بعد ماسقطت سقوط مدوي، بهبوط في قيمة السهم من 51 دولار لـ 12 دولار، وديون تقدر بـ 2 مليار دولار، وللأسف HP مقدرتش ترجع اسم كومباك للمنافسة تاني بعد سنين من المحاولة، لحد ماتم قتل البراند تماماً.

ايه اللي حصل؟

كومباك بعد مابقت متربعة على عرش أجهزة الكمبيوتر في التمانينات ونص التسعينات، الإدارة طمعت وحبت تسيطر على كل السوق، في ظل وجود منافسة من شركات ضخمة زي مايكروسوفت و IBM وديل، كل شركة فيهم متخصصة في حتة ومسيطرة عليها.

الشركة وصل قيمتها لـ 100 مليون دولار في السنة التانية بس من تأسيسها كأسرع ستارت اب يوصل للقيمة دي في وقتها، وفي 1986، يعني بعد 4 سنين من التأسيس وصلت لمبيعات تاريخية تقدر بـ 329 مليون دولار.. الأرقام دي كانت أرقام كبيرة في التمانينات.

الشركة كانت رائدة في تصنيع أجهزة الكمبيوتر واللاب توب، وبعد التطور السريع ده، الشركة حبت يبقى ليها كيانها المنفصل، فقررت تدخل في مجالات تصنيع جميع مكونات الكمبيوتر الداخلية، زي المعالج وكارت الشاشة، وكل قطعة داخل الجهاز.. يعني كانت عاوزة تعمل زي آبل ماعملت كدة في معالجات الـ M1 والـ M2.

لكن آبل علشان تعمل ده قعدت سنين طويلة تطور وتخطط علشان تقدر تاخد خطوة خطيرة زي دي مش بالسرعة والاستعجال بتاع كومباك.
مش بس كدة..

دي كمان دخلت في عالم السوفت وير علشان تنافس مايكروسوفت وتعمل نظام تشغيل خاص بيها يكون حصري لأجهزة كومباك، زي الماكنتوش كدة.

من سنة 95 لسنة 98 الشركة استحوذت على كم كبير من الشركات الناشئة المتخصصة في المجالات دي، منهم شركة اسمها Tandem Computers وشركة Digital Equipment Company (DEC) وغيرهم.

الإدارة كان عندها خطة واستراتيجية محكمة من الاستحواذات والتوسعات دي، لكنهم للأسف أغفلوا تقلبات السوق اللي بيحتاج وجود سيولة ضخمة، وأغفلوا كمان ان المنافسين مش هيسمحوا ليهم بالسيطرة على السوق بالشكل ده، خاصة لما يكونوا منافسين زي مايكروسوفت و IBM مثلاً.

كومباك ضيعوا كل السيولة بتاعتهم في الاستحواذات والتطويرات معتمدين على معدلات الدخل والأرباح اللي بتزيد بمرور الوقت، واللي المفروض على الورق هتغطي كل ده.

لكن بعد عمليات الاستحواذ دي وضياع السيولة النقدية، الاقتصاد العالمي دخل في أزمة كبيرة وتراجعت حركة التجارة بشكل كبير جداً وكل الشركات اتاثرت بده، اللي عدى من الأزمة فقط هو اللي كان عنده سيولة ومخطط لحدوث أزمات مفاجئة.. أما كومباك كان مصيرها الديون والبيع لشركة HP.

#كرياتوفا

**اعادة نشر

22/06/2024

في أواخر القرن التاسع عشر وفي بدايات القرن العشرين هنري فورد كان شغال عند توماس اديسون علشان يطور محركات الجازولين وكان كبير المهندسين هناك، محركات الجازولين في الوقت ده كانت عبارة عن ثورة صناعية جديدة والمفروض انها المستقبل بعد المحركات البخارية، زي دلوقتي مابيتم استبدال محركات الجازولين بالمحركات الكهربائية.

في الوقت ده العربيات مكنتش لسة موجودة والاعتماد كله كان على "العربات" اللي هي العربيات باحصنة، فورد كان عنده رؤية وحلم وحولهم لمهمة وهي صناعة سيارات بتمشي بمحركات الجازولين، لحد ماقدر يصنع أول نموذج لعربية بمحرك سنة 1896 وكان قوتها حوالي 26 حصان، لكنا كانت فاشلة جداً.

حلم هنري فورد الاساسي كان تصنيع عربيات للعامة تستخدم في الشوارع وفي الحياة اليومية مش مجرد نموذج عربية يتحط في متحف، وعلشان يحقق المعادلة دي كان لازم تكون العربية بقوة معقولة والاهم سعر مناسب.

المهندسين في شركة اديسون قالوله انت بتحلم لسة بدري ع الكلام ده، ومين قالك ان الناس اصلاً محتاجة النوع ده من العربيات؟ خلينا مركزين احسن في شغلنا. اللي بيجيب فلوس.

ساعتها هنري فورد قال جملته العظيمة جداً وهي "لو سألت الناس هما محتاجين ايه هيقولوا طبعا عاوزين احصنة اسرع" واستقال بعدها من شركة اديسون وأسس شركة تانية لنفس الهدف اسمها Detroit Automobile Company لكنها فشلت برضو بعد سنة، وبعدها قدر يأسس شركة فورد سنة 1936 ومن هنا كانت الانطلاقة الحقيقية لثورة النقل في القرن العشرين.

البيزنس في الوقت ده اللي كان مسيطر عليه هما السلطات الحاكمة وكبار رجال الأعمال، حتى محركات الجازولين نفسها متمش التفكير فيها وتطويرها الا لما رجال الأعمال الكبار وأصحاب النفوذ زي جي بي مورجان وغيره بدأوا يفرضوا سيطرتهم على الثروة البترولية في العالم ..

أي حد كان بيقرب من تهديد البيزنس بتاعهم كان بيخلصوا عليه زي نيكولا تيسلا مثلاً لما كان عاوز يستبدل محركات الجازولين بالمحركات الكهربائية وقتها واتحارب من الكل وتم إخفاء جميع اختراعاته.

يمكن ده كان سبب رئيسي في نجاح هنري فورد، لأن دخول محركات الجازولين في عالم السيارات كفيل انه يفتح بيزنس وسوق مستمر ومربح لـ 100 سنة قدام. وده فعلاً اللي حصل..

لكن برضو لازم نقول ان هنري فورد مسلمش للشكل التقليدي للبيزنس في الوقت ده واللي كان مقتصر على تلبية احتياجات الناس وحل مشاكلهم، هو عمل احتياج جديد مكنش موجود قبل كدة وخلاه أساسي في حياة كل الناس.

في امور كتير جدا حاليا مشابهة لقصة فورد، زي دخول الانترنت، السوشيال ميديا، وسائل الدفع المختلفة وكلها كانت ثورات حقيقية وخلت اصحابها على عرش اثرياء العالم واسمائهم اتحفرت في التاريخ.

كل الحاجات دي احنا مكناش عارفين اننا هنبقى محتاجينها او حياتنا مش هتمشي من غيرها، لكن وجودها خلاها أساسية في حياتنا ومن منظور البيزنس فتحت فرص جديدة سواء فرص عمل او فرص تطور أكتر.

خلينا بقى نسأل نفسنا سؤال مهم دلوقتي وهو نفس السؤال اللي سألوه المهندسين اللي كانوا شغالين في شركة اديسون لفورد..

لو اتسألت انت محتاج ايه دلوقتي او ايه أقصى حلمك في العربيات؟ هتلاقي الإجابة عربيات أقوى، أسرع، عربيات بتطير او بتعوم.. ممكن نفتح الاحتمالات زي ماحنا عاوزين لأن سقف توقعاتنا حالياً عالي جداً على عكس زمان.

خلينا نقفل الموضوع بقى بسؤال أهم.. سمعت عن الهايبرلوب؟

#كرياتوفا

**اعادة نشر

21/06/2024

الراجل ده اسمه "جان بورانين" من فنلندا، في سنة 2014 أسس ستارت اب اسمه Spinnova، الستارت اب ده كان بيعتمد على تقنية جديدة عاوز يغير بيها مفهوم الغزل والنسيج في العالم.

التقنية باختصار هي انتاج قماش من نوع جديد تماماً من الخيوط، الخيوط دي بيتم تصنيعها من لب الخشب وعن طريق اعادة تصنيع النفايات الآمنة، Recycling يعني.. الخيوط دي بتتشكل وتتصنع تحت نسب ضغط معينة ومبيتمش دخول فيها أي مواد كيميائية تماماً أثناء التصنيع، يعني بتخرج طبيعية 100%.

وده بيعطي الأقمشة المصنعة من الخيوط دي خواص رهيبة زي المتانة، والراحة الشديدة وكمان ليها تأثير ايجابي على الجسم من حيث الراحة وامتصاص العرق والسوائل بشكل كبير.

في 2015 كانوا بدأوا بشكل رسمي وجاهزين تماماً لعملية الانتاج وبدأوا يدوروا على حاجتين، أولاً عقود كبيرة لتوريد الأقمشة والبدء في استخدامها، وثانياً مستثمرين يدعموا الاستارت اب مالياً.

وفعلاً بدأ يعمل تعاقدات مع شركات صغيرة وكلها تعاقدات ناجحة وبدأ يجذب مستثمرين لأن الفكرة والتقنية فعلاً مميزة، لحد في اواخر 2015 جت شركة حبت تعمل عقد مع Spinnova بتوريد النوع ده من الأقمشة بشكل حصري فقط ليها لمدة سنين طويلة، وعرضت رقم كبير مستغلة ان الشركة لسة ستارت اب ومحتاجة سيولة مادية.

المستثمرين كانوا متحمسين جداً وفجأة جه جان بورانين المؤسس رفض العقد رفضاً تاماً، المستثمرين والشركاء استغربوا جداً من قراره واتضايقوا جداً، انت ازاي ترفض عرض زي ده؟

قالهم انتوا بتبصوا تحت رجلكوا، لكن انا عندي رؤية وخطة مستقبلية ماشي عليها ولو قبلت العقد ده هبقى بقضي على الخطة دي، قالهم لو قبلت العقد ده معناها اننا هنبقى تحت رحمة الشركة دي لسنين طويلة وهتتحكم فينا وفي منتجاتنا زي ماهما عاوزين ويطوروا ويكبروا نفسهم على حساب منتجاتنا.

لكن انا خطتي الكبيرة هي التعاقد مع كبرى العلامات التجارية المشهورة في العالم، والأقمشة دي تبقى باسمنا احنا ويتم انتاجها باسمنا ونوردها لكل دول العالم.

المستثمرين سألوه سؤالين مهمين جداً، هل هتقدر توفر الفلوس الكافية لاستمرارية الستارت اب واستمرارية الانتاج لحد ماتلاقي عقد كبير مع علامة تجارية كبيرة؟

وهل تفتكر اننا هنفضل ندعمك مالياً في الخطة دي بدون معرفة جدول زمني محدد لجني ارباح؟

جان قالهم، أظن لو التقنية مكنتش مميزة وثورية كفاية مكنتوش استثمرتوا الكم ده من الأموال من البداية ولمدة سنة وانتوا برضو مكنتوش تعرفوا الموضوع هيمشي ولا لأ! وكون ان في شركة عاوزة تاخد المنتج حصري ليها ده أكبر دليل على النجاح اللي محققينه، واللي اعرفه اني هفضل وراء الستارت اب لحد ماحقق هدفي.

فبلاش نبص تحت رجلنا ونشتغل على الخطة الكبيرة، في مستثمرين معجبهمش الكلام وانسحبوا ومستثمرين تانيين قرروا يكملوا.

وبعد 6 سنين كاملة، وتحديداً السنة اللي فاتت، جان قدر يستمر ويطور في المنتج لحد ما مضى عقود مع 2 من أكبر العلامات التجارية في العالم وهما Adidas و H&M، وبدأوا يروجوا منتجاتهم الجديدة بالأقمشة الجديدة في الأسواق.

الشركة حالياً بتكبر وبتطور بشكل سريع وملحوظ وبدأوا يعملوا هيكل اداري احترافي وعينوا مدير تنفيذي جديد علشان يقود الشركة في المرحلة الجاية.

الشاهد من الكلام ده ان الطريق صعب ومليان عقبات، بس مادام عندك خطة وهدف هتوصله ولو بعد 6 سنين!

#كرياتوفا

**اعادة نشر

21/06/2024

عاوزكوا تتخيلوا ان شخص قدر يعمل ابلكيشن زي اوبر وكريم في بلد مفيهاش انترنت اصلا ! هو عمل كده فعلا 😃

الشخص ده اسمه مارتن بروينزا
والبلد دي هي "كوبا - Cupa" قبل 2016

كوبا قبل 2016 الانترنت مكنش متاح فيها نهائياً للشعب ولا ADSL ولا 3G حتى، كان متاح فقط للجامعات ومؤسسات الدولة العليا.

في كوبا شركة اتصالات واحدة فقط اسمها ETECSA، جميع المكالمات والرسائل بتمر من خلالها، الشركة كان عندها خدمة اسمها Nauta بتمكن اي حد في كوبا انه يبعت ويستقبل ايميلات على موبايلاتهم طبعا بدون وجود انترنت او الحاجة اليه، تبعت وتستقبل عن طريق الشبكة العادية فقط.

في 2014، مارتن عمل موقع اسمه YoTeLlevo، الخدمة دي بتمكن السياح الأجانب اللي بره كوبا "وعندهم انترنت عادي" انهم يحجزوا تاكسي جوه كوبا اما لوجهة معينة من مكان معين او يفضل معاهم طول فترة اقامتهم في كوبا.

بس ازاي؟ السائح عنده انترنت عادي، لكن سواق التاكسي في كوبا !؟ والعملية هتتم ازاي؟

فاكرين خدمة الايميلات اللي اتكلمنا عنها من شوية؟
السائح بيحجز التاكسي عادي، فيقوم الموقع باعت تفاصيل الحجز في ايميل للسائق المطلوب ومعاها ايميل السائح ويبدأوا الاتنين يتواصلوا مع بعض عن طريق الايميلات لحد الحجز مايتم.

في البداية، الموقع كان بيبعت للسواق ايميل السائح ويتواصلوا الاتنين مع بعض، طيب مارتن هيكسب ازاي!؟

بدأ مارتن ميبعتش ايميل السائح لسواق التاكسي ويبعتله تفاصيل بس بحيث يبقى هو الوسيط والتفاصيل معاه هو بس، وبدأ يطلب كومشن من السواق علشان ال deal يتم، وكمان بقى يحدد أسعار مناسبة ومعقولة ترضي الطرفين.

وبكده يكون حل مشكلة للسائح اللي بييجي ووفرله وسيلة مواصلاته بأسعار كويسة، وحل مشكلة لسواق التاكسي وبدأ يجيبله شغل أكتر.

مارتن بيقول على قد الموضوع مايبان ساخر شوية لأننا بنتكلم على تقنية تقريبا من سنة 1995، لكنه كان مربح جدا وطفرة في وقتها وحل مشكلة حقيقية.

الموضوع ده استمر اقل من سنتين، وبعد كده في 2017 شركة الاتصالات في كوبا اعلنت دخول الانترنت بشكل رسمي للجميع ADSL و 3G

الموقع كان شغال لحد فترة قريبة بس طبعا اتطور كتير بعد دخول الانترنت، لكن مارتن بيقول ان حتى بعد دخول الانترنت السواقين مازالوا بيستخدموا الايميلات لأنها بقت مألوفة جدا بالنسبالهم ومبسوطين بيها..

#كرياتوفا

**اعادة نشر

20/06/2024

من فترة بقى في تخوف كبير من كم الداتا الطبية الموجودة عن شركات التقنية الكبرى أمثال آبل وجوجل وفيس بوك، لأن الشركات دي أصبح عندها كم داتا كبير جداً عن حالات المستخدمين الطبية اللي جاية من الخدمات والمنتجات المختلفة اللي بيقدموها.

آبل مثلاً عندها آبل ووتش المصممة خصيصاً للغرض ده والـ Health App بتاعها اللي بتعمل عليه بروفايل طبي كامل خاص بيك، وعلى شاكلتها باقي الساعات الذكية من باقي الشركات.

وفيس بوك اهتمامه زاد بالداتا الطبية مؤخراً وده من خلال الداتا اللي بقى يجمعها من الـ COVID19 Center، ده غير انه عنده خدمات طبية تانية في الولايات المتحدة بيقدم من خلالها خدمات مواعيد الدواء وتذكيرهم بيه وعمل بروفايل طبي كامل عن كل مستخدم وهكذا باقي الشركات.

التخوف في ان الداتا دي يتم استخدامها في أغراض ربحية، وده بيتم حالياً بالمناسبة على فيس بوك، حتى لو بيتم نفيه لكن في تقارير كتير جداً بتؤكد ان البيانات الطبية بيتم استخدامها في استهداف أشخاص أصحاب أمراض معينة، أو أصحاب حالات صحية معينة لتوجيههم ناحية منتج بعينه او تغيير أفكارهم تجاه حاجة بعينها.

التخوف ده زاد أكتر لما هيئة الصحة الوطنية NHS في انجلترا أعلنت انها هتبتدي تجمع كل الداتا الطبية الموجودة في المستشفيات والعيادات في انجلترا وتحطها على سيرفر خاص عندها تمهيداً لمشاركة الداتا دي مع بعض الشركات للمساعدة في التعرف على حالات الشعب الطبية وبالتالي ايجاد علاج وحلول بشكل أسرع للأمراض والحد منها.

تم مهاجمة القرار ده بسبب ان مفيش معايير واضحة لمشاركة الداتا دي، وكمان تم رفض فكرة ان الداتا دي كلها تتجمع في مكان واحد لأن ده هيسهل الوصول ليها باي شكل من الأشكال، ولو وصلت مثلاً لشركة من شركات التقنية الكبيرة او مواقع السوشيال ميديا هيتم استخدامها في أفعال غير مشروعة قانونياً، زي استهداف أصحاب امراض معينة او اعراض معينة في الاعلانات للترويج عن منتجات تجارية بعينها زي ماقولنا.

طيب ليه شركات التقنية الكبيرة بتتقاتل على بياناتنا الطبية بالشكل ده؟ وهل فعلاً كل خدمات ومنتجات الـ Health Tracking دي هدفها الأول تحسين صحتنا ولا ليها أهداف تانية؟

القطاع الطبي هو واحد من أكبر القطاعات في عالم البيزنس، وفي مليارات الدولارات بتتصرف سنوياً من شركات الأدوية الكبيرة مقابل الوصول لبيانات المرضى الطبية لتصنيع وتسويق منتجاتهم الطبية، سواء كانت أدوية او منتجات عناية او منتجات تجميل.

بيانات المرضى دي وجودها كان مقتصر زمان على المستشفيات والعيادات الخارجية وده طبعاً بيخليها متفرقة ومشتتة بشكل كبير جداً وصعب على شركات الأدوية الوصول لكل الداتا دي.

شركات التقنية الكبيرة شافت هنا فرصة ربح كبيرة جداً، شركة زي آبل مثلاً باعت لحد دلوقتي أكتر من 170 مليون ساعة ذكية في العالم من 2015 لحد انهاردة، ده غير مبيعات الآيفون اللي معدية الـ 2 مليار من 2007 لحد انهاردة.

شوف كم الداتا الطبية اللي اللي المستخدمين بيشاركوها وهما بيستخدموا أجهزة آبل خاصة الساعة الذكية، واحنا هنا بنتكلم عن داتا طبية لكل الناس بمختلف حالاتهم ان كانوا مرضى او أصحاء، على عكس الداتا اللي بتكون موجودة في المستشفيات والعيادات بتكون خاصة بالمرضى فقط.

الداتا دي عبارة عن كنز لشركات الأدوية وكمان مصدر ربح ضخم لشركات التقنية، ومستقبلياً اللي هيمتلك أكبر كم من الداتا دي وهيسيطر عليها هيحكم كل شيء وآبل تحديداً ماشية في الاتجاه ده بخطى ثابتة.

وجود الداتا الطبية دي بالحجم ده في مكان واحد أمر مرعب جداً، لأن هيكون سهل اوي عليهم استهداف الناس والتحكم بعقولهم وأفكارهم وتوجيههم زي مابيحصل دايماً.

#كرياتوفا

**اعادة نشر

20/06/2024

جهاز الووكمان عمل ثورة في عالم الموسيقى من أول ماتم الإعلان عنه سنة 1979..

تخيل كدة انك شاب سبعيناتي وكل فكرتك عن سماع المزيكا او الأغاني هي الكاسيت الكبير ده اللي في مكتبة البيت اللي مبيتحركش من مكانه، مرة واحدة لقيت الكاسيت الكبير ده اتحول لحاجة صغيرة كدة بتحطها في جيبك وبيتحط فيه سماعة هاند فري وتقدر تاخده معاك في أي حتة وتسمع أغاني براحتك بخصوصية تامة.

توقعات سوني للجهاز كانت متواضعة جداً، كانوا حاطين تارجت انهم يبيعوا 5 آلاف جهاز بس في الشهر، اللي حصل ان الجهاز اتباع منه في أول شهرين 50 ألف نسخة، يعني 4 اضعاف التوقعات بتاعتهم، ده كمان الجهاز مكنش رخيص، كان عامل 150 دولار، اللي يعملوا حالياً حوالي 530 دولار وفقاً لمعدلات التضخم العالمية من سنة 79 لحد دلوقتي.

بعد 4 سنين بس، مبيعات الجهاز كانت وصلت لـ 100 مليون نسخة! رقم كان مرعب وقتها
سوني كانت بتطور في الجهاز بشكل دائم، أول اصدار منه مثلاً مكنتش بيدعم أي حاجة غير تشغيل المزيكا من شرائط الكاسيت فقط، الإصدار اللي بعده سوني اضافت مخرجين Audio وأضافت سماعتين علشان تقدر تسمع مع شخص تاني مع مايكروفون داخلي علشان تسمعوا بعض من السماعة.

وفي الإصدار الثالث سوني نزلت ميزة تسجيل المزيكا ونسخها من شريط لآخر..

الووكمان فضل متربع على عرش الموسيقى في العالم لمدة 22 سنة وتحديداً لحد سنة 2001، وده وقت ثورة الموسيقى الجديدة، والجهاز اللي غير شكل صناعة الموسيقى مرة تانية وهو الـ iPod من آبل.

تخيل كدة انك شاب تسعيناتي كل فكرتك عن سماع المزيكا هي الووكمان اللي بيتحط فيه شريط كاسيت فيه 10 ولا 15 اغنية واخرك مثلا تاخد شريطين تلاتة معاك وانت خارج، ومرة واحد لقيت نفسك معاك جهاز اصغر منه بكتير وفيه آلاف الأغاني المختلفة وتقدر تتنقل بينها وبراحتك وتختار أي اغنية بمزاجك، وتضيف كمان الأغاني اللي انت عاوزها براحتك وبكل سهولة.

الـ iPod كان بيدعم الأغاني بصيغة الـ mp3 وكان بيعتمد بشكل أساسي على الـ iTunes اللي بتقدر من خلاله تنقل الأغاني براحتك على الـ iPod.

سوني كانت واحدة من أكبر مهاجمين الـ iPod ورفضت تماماً انها تدخل في صناعة أغاني الـ mp3، لأن على حد وصفها ان أغاني الـ mp3 هتدخل صناعة الموسيقى في معركة خسرانة قصاد عمليات القرصنة..

لأن ملفات الـ mp3 بتتنسخ بسهولة جداً وتقدر تنقل نفس الاغنية بين ملايين الأجهزة، على عكس شرائط الكاسيت اللي بتخليك لازم تشتري الشريط.. حتى في عملية نسخ الشرائط كانت بتتم على نطاقات ضيقة.

لكن طبعاً كعادة التطور التكنولوجي، أغاني الـ mp3 كانت هي المستقبل، وفعلاً بعد سنتين كاملين سوني قررت تحدث جهاز الووكمان علشان يدعم أغاني الـ mp3 لكن كان فات الأوان والـ iPod سحب البساط من تحت الووكمان.

سنة 2006، الرئيس التنفيذي السابق لسوني هاوارد سترينجر كان في مقابلة مع BBC، اعترف فيها ان آبل قدرت تقضي على الووكمان وقال نصاً "ستيف جوبز كان أذكى مننا بمراحل"

قال ان آبل اخترعت نظام سهل وبسيط لسماع ونقل الأغاني، وفي الوقت اللي سوني فضلت تضيع وقتها في محاربة القرصنة الرقمية ومهاجمة ملفات الـ mp3 كان الـ iPod بيخلص على الووكمان يوم ورا التاني وبيكسب حصص سوقية جديدة.

سنة 2009 وفي الوقت اللي سوني كانت بتحتفل بمرور 30 سنة على الووكمان، الـ iPod كان وصل مبيعاته لـ 210 مليون جهاز في 8 سنين والووكمان ساعتها كان بدأ يبقى من الماضي.

#كرياتوفا

**اعادة نشر

19/06/2024

الجهاز ده واحد من أغبى الأفكار اللي اتطبقت على الاطلاق، والمشكلة انه كان جهاز رسمي من تويتر مش حد مثلاً بيجرب وعامله كدة، لا ده كان جهاز متكامل تويتر أعلنت عنه وعملت عليه ضجة كبيرة.. الكلام ده كان في 2009

جهاز TwitterPeek كان جهاز شبه التليفون بالظبط وتحديداً شبه موبايلات البلاك بيري بشاشة ولوحة مفاتيح كاملة ومكنش بيعمل أي حاجة غير نشر وتصفح التغريدات فقط، وكان سعره 100 دولار

تخيل تدفع 100 دولار في جهاز الميزة اللي فيه أي سمارت فون كان بيقدر يعملها وقتها، لكن تويتر كانت بتراهن على حاجتين، الحاجة الأولى هي حب الناس لتويتر وانتشاره الرهيب في الوقت ده والحاجة التانية هي بداية الدخول في عالم الأجهزة الذكية اللي كان لسة بيقول ياهادي.

وده اللي فيس بوك حاول يتعلم منه في 2012 لما أعلن عن Facebook Home اللي اتكلمنا عنه قبل كدة لكن فشل برضو.

في الحقيقة برغم ان الجهاز كانت مثير للسخرية جداً لكن الناس قررت تديله فرصة، وهنا كانت المشكلة التانية وهي ان الجهاز كان بطئ جداً جداً وبيهنج بشكل مستمر، والتغريدات مبتظهرش بشكل مظبوط على الشاشة، ده غير لما تيجي تكتب التغريدة والشاشة تتملي مبتنزلش لتحت علشان تكمل، الشاشة بس بتاخد 3 سطور وتقف!

تجربة المستخدمين للجهاز كانت واحدة من أسوأ التجارب، لدرجة ان الجهاز خد تقييم 1.5 من 10، وده بسبب أداؤه الكارثي وكمان بسبب ماهيته أصلاً، يعني كان من المنطقي ان تويتر تخليه بمميزات أكتر زي دعم الايميلات مثلاً ورسائل الـ SMS او المحادثات، كان على الأقل قدر يشد انتباه الناس أكتر.

طبعاً احنا مش محتاجين نقول ان الجهاز فشل تماماً، بس ايه اللي خلى تويتر تاخد قرار وتستثمر في جهاز غبي زي ده.. ايه اللي كانوا شايفينه ومحدش غيرهم قدر يشوفه؟

وقتها كان في شركة اسها Peek اللي الجهاز بيحمل اسمها، الشركة دي أصلأً متخصصة في الأجهزة من النوع ده لادارة الايميلات ورسائل الـ SMS والمحادثات الفورية وكانت بتستهدف بيها فئة أصحاب الأعمال، والنوع ده من الأجهزة كانت ناجحة جداً وقتها بس في نطاق الفئة المستهدفة بتاعتها، لأن قبل وجود السمارت فونز مكنتش تقدر تعمل الحاجات دي بسهولة وسرعة الا عن طريق الكمبيوتر.

لما تويتر قررت تستثمر في الجهاز ده السمارت فونز كانت لسة ظاهرة من سنتين بالظبط وتحديداً في 2007، وكانت تكلفتها مرتفعة جداً مقارنة بالتليفونات العادية، كانت بتتراوح من 300 لـ 500 دولار.

فكان هدف تويتر هو اولاً الحصول على جهاز رخيص نسبياً بسعر 100 دولار فقط جنب موبايلك العادي بدل ماتروح تجيب سمارت فون بـ 500 دولار، وثانياً وضع تويتر في مكانة او Position أكبر من مكانته أملاً في انهم يخلوا الناس ميقدروش يستغنوا عن تويتر أبداً.

خلينا نقول انها ممكن تكون أهداف منطقية شوية ومشروعة لكن تويتر أغفلت شوية حاجات كارثية قضت على الجهاز ده من قبل مايبيع حتى..

أول حاجة أغفلت عن تجربة المستخدم، لأن تويتر بالجهاز ده عاوزة تجبر الناس انهم يشيلوا جهازين في جيبهم طول الوقت وده أمر مزعج جداً جداً وصعب جداً، شركات الهواتف أصلاً بقت تنزل موبايلاتها بشريحتين علشان تريح الناس المضطرة لحمل رقمين في نفس الوقت.

تاني حاجة نزلت المنتج بدون اتباع أدنى معايير للجودة، ونتيجة لده الجهاز نزل مليان بالأخطاء التقنية، ولا منها انتظرت شوية لحد ماتصلح كل الأخطاء، ولا منها عملت زي ستيف جوبز لما أعلن عن أول آيفون وكان مليان مشاكل ومنزلوش السوق الا لما حل كل المشاكل.

تالت حاجة بقى والأهم ان مفيش أي قيمة حقيقية بيقدمها الجهاز، بغض النظر عن أهداف تويتر لكن الجهاز كان لازم يمتلك قيمة حقيقية تخلي الناس تفكر فيه وده أ ب بيزنس، لكنها اعتمدت فقط على اسم تويتر وشهرته في الوقت ده وكانوا متخيلين ان ده ممكن يكون كفيل لنجاح الجهاز.. ومقدروش حتى كمان يضيفوا مزايا علشان سعر الجهاز ميرتفعش أكتر.

في النهاية نقدر نقول ان البيزنس موديل بتاع الجهاز ده كان مليان أخطاء وكوارث وواضح ان تويتر اتعلمت ومكررتهاش تاني.

#كرياتوفا

**اعادة نشر

19/06/2024

سلسلة كافيهات Luckin Coffee كانت أكبر سلسلة كافيهات في الصين كلها، والمفاجأة ان البراند ده ظهر في السوق لأول مرة سنة 2018، وفي خلال سنة واحدة قدر يفتح 4,507 فرع في أنحاء الصين كلها، وادعى انه بيخدم أكتر من 40 مليون مستخدم في الصين، وبالأرقام دي كان عدى كل المنافسين في سنة واحدة وعلى رأسهم ستاربكس.

طبعاً توسع زي ده في سنة واحدة محتاج راس مال مرعب وإدارة غير طبيعية خاصة في أكبر سوق في العالم وهو السوق الصيني.

طب ازاي قدر يجمع 40 مليون مستخدم في سنة واحدة!؟ الرقم ده ضخم جداً وصعب جداً تحقيقه في سنة واحدة مع كم المنافسة الرهيب الموجود، الحل كان في سياسة التخفيضات والعروض عن طريق الكوبونات او الـ Vouchers.

سياسة كوبونات التخفيضات دي كانت بالنسبة للإدارة الحل الأمثل لجذب أكبر عدد من المستخدمين وده بدوره هيجذب المستثمرين علشان يستثمروا في السلسلة.

اللي كان بيحصل ان الشركة كانت بتطبع ملايين الكوبونات بتخفيضات بتوصل لـ 90% وكوبونات لمشروبات مجانية، وكانت بتعمل شراكات مع الشركات والمؤسسات والمنصات الالكترونية وخدمات الإعلانات وأي حد معدي وبتوزع عليهم الكوبونات دي علشان يوزعوها على عملاءهم وموظفيهم.

فكل واحد معاه كوبون يروح يقعد بيه في الكافيه، وبيتسجل في الكافيه انه اوردر وبيسجلوا بيانات العميل، فكدة الاوردر اتحسب لكن في الحقيقة الشركة مدخلهاش أي فلوس من الاوردر ده.. وقيس على ده بقى ملايين الاوردرات وملايين المستخدمين.

اللي كان بيحصل بقى في الكواليس كان الكارثة كلها، وهي تلاعب وتزوير غير عادي في الأرقام والحسابات، يعني الاوردر اللي كان بييجي بكوبون بتتحط قيمته كاملة كأنها مدفوعة بالكامل، وكانوا فاكرين انه شبه مستحيل تتكشف لأن الاوردرات فعلاً حقيقية والمستخدمين فعلاً حقيقيين.

في يناير 2020 اتبعت تقرير مجهول المصدر لأحد المستثمرين الكبار في سلسلة Luckin Coffee، التقرير فيه أرقام واحصائيات عن التلاعب والتزوير اللي بيحصل جوه بهدف رفع قيمة الشركة خاصة كمان بعد ماعملوا اكتتاب عام في 2019 واتسجلوا في البورصة ومن ساعتها سعر السهم في الطالع بناء على الأرقام دي.

التقرير ده محدش عارف لحد دلوقتي مين اللي بعته، بس ده بيدل على حجم الفساد والتلاعب الضخم اللي كان بيحصل جوه لدرجة ان ريحته طلعت في مدة قليلة جداً.

حجم التلاعب وصل لـ 310 مليون دولار مبيعات وهمية في 2019 بس، و 140 مليون دولار عبارة عن فواتير وهمية لمواد خام كان بيتم شراءها.

الحكومة الصينية وجهت لمجلس الإدارة اتهامات كتير جداً زي التلاعب والتزوير وغسيل الأموال، وكانت واحدة من أكبر قضايا الاحتيال في الصين.

#كرياتوفا

**اعادة نشر

18/06/2024

تخيل لما يتعمل عليك براند أتاك والناس تشتم في شركتك ومنتجاتك وتنتقدها وفي نفس الوقت في طوابير على منتجاتك وتحقيق معدل مبيعات غير مسبوق.. وانت مكنتش بتبيع نص المبيعات دي اصلاً قبل البراند أتاك!

هو ده بالظبط اللي حصل مع "بياتريس ديكسون" مؤسسة شركة The Honey Pot، وهي شركة متخصصة في العناية النسائية بتقدم منتجات نظافة وعناية للسيدات في الولايات المتحدة.

اللي حصل ان سلسلة متاجر Target الأمريكية كانت بتعمل Awareness Campaign مشارك فيها مجموعة كبير من الشركات اللي بتبيع منتجاتها داخل متاجرها.. وطبعا شركة The Honey Pot كانت واحدة منهم.

جت بياتريس داخل الإعلان قالت جملة كانت السبب في البراند أتاك اللي حصل، قالت "السبب الرئيسي في نجاح وتطور شركة The Honey Pot هو فقط وجود امرأة سمراء اللون وراء تأسيس الشركة "بتقصد نفسها يعني" ، المرأة السمراء لابد أن تحصل على فرص أفضل"

الجملة دي قلبت الدنيا على السوشيال ميديا، واتهموا بياتريس انها بتعنصر على ذوي البشرة البيضاء، وان الكلام ده بيدل على تصرف عدواني.

لمدة أسبوع التعليقات والتقييمات ضربت السوشيال ميديا لدرجة ان الشركة قفلت الـ Reviews تماما على فيس بوك وعلى الموقع.. لكن في الجانب الآخر بقى كان في ناس تانية كتيير جداً بينتقدوا اللي بينتقدوا بياتريس وشايفينهم هما اللي بيعنصروا على كلامها، لأن مفيهاش حاجة انها تدي لذوي البشرة السمراء حقوقهم المسلوبة من وجهة نظرهم.

الفكرة هنا بقى أي جانب اللي فاز؟ وأي جانب اللي كان أكتر؟

طبعا الجانب الثاني اللي بينتقدوا اللي مش عاجبهم كلام بياتريس، وبالعند فيهم ودعماً لكلام الست بياتريس احنا مش هنشتري غير منتجات The Honey Pot، وده أدى لطوابير على المنتجات في متاجر تارجت وزادت المبيعات 3 أضعاف تقريباً!

القصة دي بقى فيها شاهد مميز جداً، والشاهد ده مش من أي جانب من الاتنين ولكنه هو ازاي بياتريس ديكسون اتصرفت مع البراند أتاك ده اللي أكيد مكنتش تعرف انه هيقلب لصالحها.

في بداية الأتاك متاجر تارجت كانت بتدعو بياتريس انها تطلع تصلح اللي عملته لأن في الآخر الحملة دي بتاعت تارجت مش بتاعة شركتها، بالاضافة للضغط اللي كان عليها من الادارة، لكن بياتريس فضلت مصرة انها مقالتش حاجة غلط.

بياتريس شايفة انها صاحبة حق وقضية، وقالت بعد انتهاء الأزمة انها لو كانت طلعت واعتذرت كانت هتخسر الجانبين، والأهم ان البراند أتاك اللي حصل ده خلاها تقدر تحدد بشكل أكبر من هما الفئات المستهدفة الأدق اللي تقدر تروحلهم بعد كدة.

ايه أفضل إدارة شوفتوها لبراند أتاك حصل مؤخراً من وجهة نظركم؟

#كرياتوفا

**اعادة نشر

18/06/2024

ت سيجا، والبلاي ستيشن مازال متربع على عرش سوق الألعاب الى الآن.

#كرياتوفا

**اعادة نشر