07/05/2024
طب ايه الوضع الحالي ؟
كل اللي معاه شقة كان بيستنى يسمع سعرها الجديد ايه بعد كل زيادة كام جنيه في سعر دولار السوق السوداء و تيجي تكلمه ازاي السعر اللي كان من شهر زاد الزيادة دي كلها يقولك مهو شوف الدولار بكام و زينا زي السوق .. اللي حصل ان الناس وصلت سعر الشقق في السوق لأسعار غير منطقية بالمرة و غير متناسبة مع أسعار مكونات البناء و غيرها و خاصة إن المكونات دي و أهمها الحديد بيطلع و بينزل بسرعة عشان مرتبط بسعر الدولار .. و في نفس الوقت الناس كانت ناشرة اشاعات ان الدولار هيوصل 100 جنيه في نهاية السنة و الحق اشتري دلوقتي قبل ما يغلى و طبعا لما حد يشوف في سنتين دولار بيزيد من 16 في البنك ل72و أكتر كمان في السوق يقولك ايه اللي يمنع انه يوصل ل100 بس هو نسى ان الشقة دي مش دولار وانه حتى لو المضاربة على العملة وصلت للأرقام دي لكن الشقة سلعة ليها طريقة تسعير .. دلوقتي الدولار اللي كانوا بيتلككوا بيه خسر (ثلث) تمنه و يمكن أكتر على حسب انت بتحسب على سعر كام في قمة التسعير و السعر المتوقع يوصل ليه في المستقبل .. يعني الشقق اللي كانت بتتسعر عليه رخامة كدا لو هتنزل بنفس النسبة يبقى المفروض تنزل (ثلث) تمنها .. دا غير ان التسعير الحقيقي لتكلفة البناء بتاعتها ممكن تخليها تنزل أكتر و لما الشقة ترجع تتسعر عموما على قوانين العرض و الطلب الخاصة بالقدرة الشرائية بتاعت المستهلك الطبيعي تخليها تنزل أكتر و أكتر .. الزبون الرئيسي الفترة اللي فاتت اللي بيراهن عليه السوق و هو (العاملين بالخارج) انخفضت قدرتهم الشرائية بنفس نسبة نزول الدولار .. بس ده موضوع بوست تاني .. و للحديث بقية
