19/04/2026
البراندات الكبيرة مش بتعمل كامبينز ؟؟؟؟
دي جملة قالتها دكتورة ليا في الجامعة في أحد المحاضرات وطبعا عشان دي مش أول مرة الدكتورة دي تدرسنا ولا اول مرة ترزعنا هبد ملهوش كتالوج اكتفيت بالضحك انا وصاحبي ومشينا الدنيا بس تعالو نوقف هنا وقفة نصرخ فيها صرخة ألم ؟؟؟؟
الشهادة اللي بتعلقها في الصالون.. ولا الشغل اللي بيملى جيبك؟
في صراع خفي مبيحسش بيه غير اللي جرب "شيزوفرينيا" التعليم في مجال الجرافيك من حيث التعليم المؤهل الى عمل من خلال كورسات فعلا معتمدة مبنية على أبحاث وعلم للمجال ككل ولسوق العمل زي SABER GROUP Courses Academy اللي بمجرد ما اتعلمت معاهم في 2021 و 2022 بدأت أمارس التصميم كوظيفة أساسية ليا (دا اكيد مش اعلان بس دول ناس ليهم فضل وحق عليا )
ومابين التعليم الجامعي اللي بقالي فيه ثلاث سنوات وإلى الآن لا يوجد جديد سوا قليل جدا ومن دكاترة رجال وأنوه على رجال عشان انا عنصري وليا في دي نظرة
أنا واحد من الناس اللي عاشت التجربتين:
طريق الـ 3 شهور: كورس مكثف، أدوات عمل، "إزاي تطلع شغل النهاردة"، والنتيجة؟ كانت فهم حقيقي لسوق العمل وكانت بداية لبناء كارير قوي
طريق الـ 4 سنين: كلية، دكاترة، نظريات، واللي يقولك اصل الشركات الكبيرة مش بتعمل تصميمات ولا كامبين واللي يقولك معلومات هي فعلا موجودة في سوق العمل وتضارب في الآراء يخليك مش عارف تمسك الماوس بـ أنهي إيد.. والنتيجة؟
بنطلع السوق نلاقي نفسنا "تايهين" والمعلومات في وادي والواقع في وادي تاني خالص
ليه فيه فجوة مرعبة كدا؟ ودا كان السؤال اللي بيتردد على بالي من أول ما دخلت الكلية
الأكاديمي عايش في الورق: الدكتور غالباً مهتم بـ الجمال المثالي وطبعا كل دكتور أو دكتورة ماشي بدماغه وميعرفش حاجة اسمها صح وغلط لا دا بيكلمك من منطلق حلو ولا وحش بيكلمك من القواعد اللي في الكتب اللي اتكتبت من 20 سنة، وهوا معندوش ليها أي ابديت ودي كارثة والمشكلة دي بتكون موجودة عن النساء أكتر عشان مش بتهتم اصلا في دراستهم بسوق العمل ولا بيكون ليهم علاقة بيه الواحدة منهم بتطلع الاولى على دفعتها تبقى معيدة وتفضل في السلك الأكاديمي لغاية ما تبقى دكتورة ومابتكونش بنسبة كبيرة عارفة يعني ايه سوق عمل اصلا بعكس الراجل ودا بيبان في الفرق بينهم في تعريف نفسهم الدكتور الراجل بيخش عليك يقولك دا شغلي انا برا في سوق العمل ودا شغل زمايلكم اللي اتعلمو مني بس الدكتورة بتقولك دا شغل المشاريع السابقة لزمايلكم مفيش دكتورة واحدة قالتلنا دا شغلي الخاص وحط هنا الف علامة استفهام ؟؟؟؟؟
تضارب المدارس: دكتور يقولك التصميم لازم يكون كذا ، ودكتور تاني يشطب عليه ويقولك لا كذا ، وفي الآخر العميل بيجي يقولك أنا عايز اللوجو ينور!.. هنا أنت بتفقد هويتك كمصمم.
الأداة vs الفكرة: الكورسات العملية بتعلمك "إزاي" (How)، والجامعة بتحاول تعلمك "ليه" (Why)، والمشكلة إننا بنتعلم الـ "ليه" بطريقة نظرية مملة بتفصلنا عن الواقع وبتبقى غلط كمان
طيب إيه الخلاصة؟ عشان م تضيعش في النص:
خد من الأكاديميين "الأساس": افهم منهم يعني إيه اتزان، كتلة، وفراغ (Foundations).. دي "العضم" بتاعك اللي هيعيش سنين، بس متتوقعش منهم يعلموك إزاي تتعامل مع عميل "مستفز" او مراته مش عاجبها اللون الفوشيا
خد من العمليين "العضلات": اتعلم السرعة، "الزتونة"، وإزاي تطوع الأدوات والذكاء الاصطناعي عشان تنجز.. ده اللي "بيأكلك عيش"
العميل هو "الدكتور" الحقيقي: السوق هو المختبر اللي مبيجاملش لو شغلك محققش هدف العميل، يبقى شهادتك مجرد ورقة مكانها احنا عارفينه
في الآخر..
المصمم الشاطر مش هو اللي بيسمع كلام الدكتور، ولا اللي حافظ أدوات الفوتوشوب.. هو اللي بيعرف يدمج "فلسفة العلم النظري مع حداثة التكنولوجيا وصياعة سوق العمل
أنت بقى بتميل لـ أنهي مدرسة؟ مدرسة "الأساس الأكاديمي" ولا مدرسة "الخبرة في الملعب"؟ وشاركونا أكتر نصيحة سمعتوها في الكلية وطلعت "بلح" في سوق العمل!
