03/05/2016
قرب قرب قرب موقع وعليه بطيخه هديه !! :D :D
دا فعلياً اللى المفروض بقي نعمله بعد العروض والحاجات العجيبه الي بنشوفها ..... تلاقي الي منزل اوفر بيقولك ب 500 جنية لتنفيذ الموقع شامل تصميم وبرمجه وكل حاجه ..... طيب حضرتك كل حاجه دي الي هيا ايه بالظبط !!!!
بص هوه بصراحه الحاجه الواحيده الي ناقصه انهم يكتبوا في الاوفر تشطيب ومحارة ونجارة وتوصيل لحد باب المنزل, وللأسف العملاء بتنخدع وبتصدق والعميل هوه الضحيه في الاخر, وبعدها يجيلك العميل يقولك الحقني الويب سايت مليان مشاكل ومش بيظهر في جوجل او او او او .....الخ, وبيبقي الحل اننا نقوله فكك بقي من القرف دا كله وخلينا نعمل جديد علي نضافة يقولك والي انا دفعته ده مش حرام !!!
وبيبقي الرد عليه سخيف شويتين طول ما الطماع موجود النصاب في امان .... اوعي تتخيل ان كل حاجه هتاخدها ب ٥٠٠ او الف او حتي ١٠٠ الف
الموضوع بسيط جداً, انت كعميل فكر في الموضوع ببساطه هل من المعقول ان في حد هيعملك شغل بدون مقابل او مثلا كل الشغل هيكون بنفس السعر ؟؟
طيب هل الشغل الي ينفع لشركتك او ليك ينفع لحد غيرك ؟؟؟
طيب هل لو دفعت قرش زي قرشين ؟؟ هل نفس الكواليتي ؟؟ اسئله كتير اوي محتاج تسألها لنفسك قبل ما تاخد قرار, والنصيحه الاخيره بلاش تثق في أي حد يقولك اي كلام وخلاص وكام عرض موجود علي الانترنت اسأل وافهم وشوف الشركه واسأل علي شغلها وعلي سمعتها عشان متقعش في ايد حد هاوي ويعملك ويب سايت عباره عن ثيم جاهز وشاريه ب ١٤ دولار ومركبهولك.
فكر شوف الي انت محتاجه فعلا يستاهل المبلغ البسيط ده واسأل شركه واتنين وتلاته عشان تعرف الاسعار كويس وتفهم كل تفصيله واتعامل مع الشركه الي هتفهمك وتعلمك وتساعدك مش الي هتاخد منك اي مبلغ لاي حاجه وخلاص.
إعمل الحاجة الصح وبلاش ينضحك عليك عشان مش كل يوم تهدي وتبني الويب سايت بتاعك
المصدر : IntCore
