16/04/2026
التعلق وما ادراك ما التعلق ...
خليني أقولك إيه ممكن يحصلك لو اتعلّقت بحاجة أكتر من تعلّقك بربنا، وضمنت وجودها بينك وبين نفسك…
أول وأفضل احتمال: إنك هتخسرها فجأه بلا مقدمات.
هتقولي: إزاي أفضل احتمال وانت بتقولي اني هخسرها؟
هقولك: اصبر واقرا للاخر وانت تفهم…
ثانيًا ممكن…
إن الحاجة دي تفضل موجودة، بس تتغيّر.
تبقى نفس الشخص أو نفس الشيء… بس مش نفس الإحساس،
ولا نفس الأمان اللي كنت حاسس بيه.
وساعتها هتتعب أكتر، لأنك هتفضل متمسّك بصورة قديمة مش موجودة خلاص.
ثالثًا…
إنك تفضل معاها، بس قلبك يفضل قلقان طول الوقت.
خايف تخسرها، خايف تتغيّر، خايف تبعد…
فتبقى بدل ما بقت نعمة، بقت مصدر خوف وتعب.
رابعًا…
إنك تفضل متعلّق بيها لدرجة تنسيك نفسك.
تبدأ تتنازل عن حاجات من مبادئك،
وتعدّي على حاجات كنت زمان ما تقبلهاش،
بس علشان تحافظ عليها أو تفضل موجودة في حياتك.
وساعتها الخسارة مش هتبقى بس فيها…
هتبقى فيك إنت كمان.
وعشان كدا قولتلك خسارتها بلا مقدمات هي افضل احتمال
التعلّق الزيادة مش حب…
ده ضعف بيستنزفك واحدة واحدة،
لحد ما تفوق وتلاقي إنك محتاج ترجع لنفسك قبل أي حاجة.
عشان كده…
ربنا بيقولك بطريقة غير مباشرة:
ما تربطش قلبك بحاجة زائلة، مهما كانت حلوة.
اربطه بيا أنا… لأن أنا الوحيد اللي لا بيتغيّر ولا بيبعد.
وأي حاجة غير كده، يا إما هتروح منك…
يا إما هتتعبك…
يا إما هتعلّمك الدرس بالطريقة الصعبة.
فاللي قلبك متعلّق بيه زيادة…
راجع مكانه في قلبك.
وخلي دايمًا ربنا هو الأول… والباقي كله ييجي بعده.
واحب ابشرك لو حقيقي اتعلمت الدرس وخليت تعلقك بربنا.. ربنا هيرزقك بكل اللي يتمناه قلبك وان شاء الله مش هيؤذيك فيه🤍.
