25/05/2026
كنت بتكلم مع بنتي النهارده وحبيت الرسالة توصل للي في سنها وللمتابعين العواجيز اللي زيي 😅:
من فترة وعدتها نخرج ونتكلم بعد امتحاناتها تانية ثانوي كنوع من التغيير والفضفضة خصوصا انها فوتوجرافر وجرافيك ديزاينر شطورة الحمدلله بس واخده الموضوع علي أعصابها شوية وبكرة هنزل لكم عينة من شغلها لتهنئة العيد اللي عاملاها هدية للبيدج عندي.
الكلام بدأ بتوضيح دورها كأنثى في الحياة وهو رعاية الزوج والبيت والأولاد ومش مطلوب منها اي ضغط مادي او مصاريف، وان كان لها وظيفة فالاجر بتاعها ده لنفسها ولمصاريفها الخاصة ولو شاركت بيه في بيتها فده فضل منها ومش واجب عليها خالص لان القوامة دي للراجل وهو المسؤول عن بيته ومادياته ومصاريفه.
بعدها انتقلنا لدورة حياة اي وظيفة او شغل فريلانسر تبدأ من مرحلة بسيطة وشغف وتنمو مع اكتساب الخبرة وتصل لمرحلة البلوغ وبعدها لابد لها من النزول والهبوط التدريجي.
أخدنا امثلة كتيرة منها شغلتها كديزاينر بتعمل شغل حلو وبستخدم ال ai لكن ده مش نهاية المطاف لان معظم الناس دالوقت بقت تقدر تستخدم ال ai ويعمل لنفسه اي شغل ويمشي حاله، فاللي كان امبارح واحد او عشرين واحد بيعرفوا يعملوه بقي النهارده الالاف والملايين بيعملوه بسهوله ومابقاش حِكر علي فئة معينة.
فهمتها ان دورة حياة الشغل علي أيامنا كان من ٥-٧ الي ١٠ سنين لو زادت وبعدها تدخل في مرحلة الهبوط والاستبدال لكن النهارده الدورة دي بقت سريعة جدا وخلال شهور بيحصل تعلم شئ جديد وصعوده الي الترند ونزوله واختفاءه ويظهر غيره.
قولتلها انا مش عايزك تكبري ويكون جواكي شغف لحاجة ما قدرتيش تحقيقها وانتي صغيرة بسبب سرعة التطور الموجودة دالوقت واللي هتبقي اسرع كتير لما تكبري.
وكلمة شغف وحُب الشغل انا اكتر واحد كنت مؤمن بيها من زمان واللي يعرفني من بداياتي عارف كده عشان كتير استخدمت المصطلح ده، لكن دالوقت اللي عايز يفضل موجود ومكمل لازم يكون عنده جناحين مهمين بدونهم هيقع من سفينة تايتانك ويختفي:
الجناح الاول هو القدرة علي التعلُم: انك كل يوم تتعلم حاجه جديده واكيد الحاجه دي مش هتكون علي هواك فهنا تنسي كلمة (الشغف) والحب لشغلك وتجبر نفسك على التعلُم حتي لو شئ مُزعج بالنسبة لك ومش علي هواك ودي وراها حكاوي كتير اتكلمنا فيها ممكن بعدين اقولها.
والتاني هو المرونة والقدرة على التغيير: لانك هتقضي وقت كتير في تعلُم شئ جديد عليكي كل يوم عشان تشتغلي بيه وتعملي منه فلوس وشهرة حلوة وتلاقيه بعد كام يوم او شهور بسيطة بقي قديم ومطلوب منك تتعلمي جديد، وبردو النقطة دي كان وراها امثلة وكلام كتير بعدين لو شاء الله.
الحال اتغير ولو بتفكري تدخلي جامعة اول تفكير ليكي يكون الذكاء الاصطناعي علي رأس اولوياتك فيها، يعني لو طب (هي طبعا ادبي لكن الكلام علي العام) يبقي تدرسي مع نفسك ذكاء اصطناعي في الطب، لو هندسة لو صيدلة او تجارة او زراعة او تربية ……الخ
ذكاء اصطناعي الي ان يشاء الله
وانت بقي يا صديقي العجوز زيي الكلام ليك وليا قبل ما يكون للأجيال القادمة اللي مشفق جدا عليهم من سرعة التطور وقدرتهم علي مواكبته حاول تتعلم واجبر نفسك وخليك مرن عشان تقدر تكمل وتحافظ على بيتك ووجودك.
وللحديث بقية ان كان في العمر بقية ❤️
