27/12/2025
Wali waxaa lagu dhagan yahay aqoonsigii. Somaliland oo ay kasoo hor jeesten Ra’iisul Wasaarihii h**e ee Turkiga, Ahmet Davutoglu ayaa si adag uga digay in aqoonsiga ay ISR siisay Somaliland uu khatar iyo halis ku yahay midnimada dhuleed ee Soomaaliya iyo xasilloonida Gobolka, isagoo intaasi raaciyay in ISR ay ku dhaqaaqdo talaabadan iyadoo wali xasuuqaysa shacabka Q/--sa iney tahay bahdil cad oo ka dhana Dunida Islaamka, taasoo aan marnaba la aqbali karin.
Wuxuu xusey in talaabadani ay qayb ka tahay istaraatijiyad lagu kala qaybinayo dalalka Muslimka, isla markaana lagu wiiqayo dalalka Masar, Boqortooyada Sucuudiga iyo Turkiga isaga oo tilmaamay in ISR ay doonayso inay gaadho Dekedda Berbera oo ah dekad istaraatiji ah oo ku taala gacanka cadmeed iyo albaabka laga galo badda-cas.
Davutoglu wuxuu sheegay in sanadihii 2012-2013 ay dalal reer galbeeda isku dayeen iney kala qaybiyaan Soomaaliya Isla markaana ay aqoonsadaan Somaliland balse isago oo xiligaas Ra'iisal Wasaare ka ah Turkiga uu qaaday talaabooyin degdega Isla markaana uu Madaxweyneyaasha Soomaaliya iyo Somaliland uu iskugu keenay magalada Ankara 11-13 bishii April ee sanadkii 2013, halkaasna laga soo saaray bayaan wadajira oo uu meesha uga saaray qorshihii lagu aqoonsan lahaa Somaliland.
Ra'iisal Wasaarihii h**e ee Turkigu wuxuu sheegay in hadana la joogo wakhtigii markale talaabo la qaadi lahaa isagoo ugu baaqay Madaxweynaha Turkiga Erdogan inuu si degdega u qaado talaabooyinkan.
1. In si toos ah loola xidhiidho Madaxweynayaasha Soomaaliya iyo Somaliland, laguna casuumo Turkiga si ay ugu yeeshaan wadahadal fool ka foola.
2. In la magacaabo Ergay gaar ah loona diro gobolka.
3. In si degdeg ah loola tashado hogaamiyeyaasha dalalka Masar iyo Sucuudiga, Isla markaana Muqdisho iyo Hargeysa loo diro wafti wadajira oo ka kooban Wasiirada Arrimaha Dibada ee dalalka Turkiga, Masar iyo Sucuudiga si ay ula kulmayaan labada dhinac.
4. In lala xidhiidho Imaaraadka Carabta oo maamula Dekedda Berbera Isla markaana looga digo, loogalana tashado in ku lug lahaanshiyaha siyaasadaha ISR ay keeni karto dagaal wakaaladeed ka dhaca Soomaaliya si lamid ah Suudaan.
5. In hogaamiyeyaasha dalalka Masar, Boqortooyada Sucuudiga iyo Turkiga ay si wadajira ula kulmaan Madaxweynaha Mareykanka iyo Ra'iisal Wasaaraha Ingiriiska si looga hortago in lakala qaybiyo Soomaaliya.
6. In si degdeg ah loola xidhiidho maamul goboleedka waqooyi bari oo diiday gooni isku taaga Somaliland Isla markaana muujiyay daacadnimadooda Muqdisho.
7. Iyo ugu dambeyn inta xaaladu ay meel halisa gaadhin in la hawlgaliyo Midowga Afrika, Ururka Iskaashiga Wadamada Islaamka iyo Jaamicada Carabta si loo qaado talaabo degdega oo diblomaasiyadeed oo lagu ilaalinayo midnimada Soomaaliya.
