08/06/2023
葡國菜定澳門土生菜 ？
以上三款餸都係澳門土生菜。
究竟咩係 「澳門土生菜」呢 ？
追溯到十五、十六世紀時期，葡萄牙人從歐洲揚帆出海，橫越非洲、亞洲、美洲、大洋洲等地。最終，係十六世紀中葉登陸澳門。
呢班離鄉別井嘅葡萄牙人，將傳統嘅葡國菜口味，融入埋澳門當地嘅中式食材同烹調技巧，再加上嚟自東南亞同印度嘅香料，漸漸演變成今日融合中西飲食文化精粹，澳門獨有嘅 「澳門土生菜」！
澳門土生菜係澳門土生葡人社群嘅家常菜，食譜通常都係家族性嘅一代傳一代，紀錄住數百年嚟澳門土生葡人嘅飲食文化，因此獲選列入為澳門非物質文化遺產。
點分 「葡國菜」/ 「澳門土生菜」？
傳統嘅葡國菜以燒烤同白烚為主，食材會有海鮮，烹調時會加入大量牛油，味道會較濃厚，連啲甜品都會偏向甜膩； 而澳門土生菜就會加入炒、炆煮等亞洲技巧，調味會有咖哩、椰汁、薑黃、肉桂、丁香等東南亞香料，食材以肉類為主。
所以，混有中式臘腸嘅大雜燴、以椰絲同咖哩調味嘅非洲雞、爆炒至乾身嘅免治豬肉，都係極具代表性嘅澳門土生菜。
-
-
-
#澳門 #澳門土生菜 #葡國菜
#澳門美食 #美食分享 #美食文化
#大雜燴 #免治豬肉
