17/06/2026
ဟိုတယ်၊ ခရီးသွားလာရေးနှင့်ယဉ်ကျေးမှုဝန်ကြီးဌာနပြည်ထောင်စုဝန်ကြီး ဦးမောင်မြင့်
မြန်မာ-ကမ္ဘောဒီးယား နှစ်နိုင်ငံခရီးသွားလုပ်ငန်းပူးပေါင်းဆောင်ရွက်မှုဆိုင်ရာ နားလည်မှုစာချွန်လွှာလက်မှတ်ရေးထိုးပွဲ၊ မြန်မာ-ကမ္ဘောဒီးယား ခရီးသွားလုပ်ငန်းမြှင့်တင်ရေး Roadshow ၊ မဟာမဲခေါင်ဒေသခွဲအစားအစာပြပွဲနှင့် မဲခေါင်ခရီးသွားလုပ်ငန်းဖိုရမ်-၂၀၂၆ ကြိုဆိုညစာစားပွဲအခမ်းအနားများသို့တက်ရောက်
*********************************************
နေပြည်တော်၊ ဇွန်လ (၁၆) ရက်
မဟာမဲခေါင်ဒေသခွဲနိုင်ငံများအကြား ခရီးသွားလုပ်ငန်းပူးပေါင်းဆောင်ရွက်မှုများကို ပိုမို နီးကပ်စွာ ပူးပေါင်းဆောင်ရွက်နိုင်ရန် ရည်ရွယ်၍ မဲခေါင်ခရီးသွားလုပ်ငန်းဖိုရမ်နှင့် ဆက်စပ်အစည်း အဝေးများကို မဟာမဲခေါင်ဒေသခွဲအဖွဲ့ဝင်နိုင်ငံများတွင် အလှည့်ကျကျင်းပပြုလုပ်လျက်ရှိသည်နှင့် အညီ မဲခေါင်ခရီးသွားလုပ်ငန်းဖိုရမ်-၂၀၂၆ နှင့် ဆက်စပ်အစည်းအဝေးများကို မဟာမဲခေါင်ဒေသခွဲ အဖွဲ့ဝင်နိုင်ငံဖြစ်သည့် မြန်မာနိုင်ငံက အိမ်ရှင်အဖြစ် “Tourism for People, Travel with Purpose” ဟူသော ဦးတည်ချက်ဖြင့် ဇွန်လ ၁၄ ရက်နေ့မှ ၁၉ ရက်နေ့အထိ ရန်ကုန်မြို့၊ Pan Pacific ဟိုတယ်၌ လူကိုယ်တိုင်တက်ရောက်စနစ်ဖြင့်လက်ခံကျင်းပပြုလုပ်လျက်ရှိပါသည်။
ထိုသို့ကျင်းပပြုလုပ်လျက်ရှိရာတွင် ဟိုတယ်၊ ခရီးသွားလာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးမောင်မြင့်သည် ယနေ့ နေ့လယ်ပိုင်းက မဲခေါင်ခရီးသွားလုပ်ငန်းဖိုရမ်-၂၀၂၆ သို့ တက်ရောက်လာသည့် ကမ္ဘောဒီးယားနိုင်ငံ၊ ခရီးသွားလာရေးဝန်ကြီးဌာန ဝန်ကြီးH.E. Mr. HUOT HAK အား အလုပ်သဘောနေ့လယ်စာ(Working Lunch) ဖြင့် တည်ခင်းဧည့်ခံခဲ့ပြီး ဒေသတွင်းခရီးသွားလုပ်ငန်းဆိုင်ရာကိစ္စရပ်များကို ရင်းနှီးပွင့်လင်းစွာဆွေးနွေးခဲ့ကြပါသည်။
ဆက်လက်၍ မြန်မာ-ကမ္ဘောဒီးယား နှစ်နိုင်ငံအကြားဆန်းသစ်တီထွင်မှု၊ ဒီဂျစ်တယ် အသွင်ကူးပြောင်းမှုနှင့် ရေရှည်တည်တံ့သော စီမံခန့်ခွဲမှုဆိုင်ရာကိစ္စရပ်များကို အတူတကွ ပူးပေါင်း အကောင်အထည်ဖော်ဆောင်ရွက်ခြင်းမှတစ်ဆင့် ပိုမိုဘေးကင်းလုံခြုံ၍ ချောမွေ့သော ခရီးသွားလာမှုအတွေ့အကြုံများကို ဖန်တီးပေးနိုင်ခြင်းဖြင့် နှစ်နိုင်ငံပြည်သူများအတွက် ခရီးသွားကဏ္ဍ အပြန် အလှန် အကျိုးဖြစ်ထွန်းစေမည့်အပြင် ပိုမိုနက်ရှိုင်းသောအပြန်အလှန်နားလည်မှုနှင့် ချစ်ကြည် ရင်းနှီးမှုများကိုဆောင်ကြဉ်းပေးနိုင်မည့် ခရီးသွားလုပ်ငန်းဆိုင်ရာပူးပေါင်းဆောင်ရွက်မှုအဖြစ် မြန်မာ-ကမ္ဘောဒီးယား နှစ်နိုင်ငံခရီးသွားလုပ်ငန်းပူးပေါင်းဆောင်ရွက်မှုဆိုင်ရာ နားလည်မှုစာချွန်လွှာ (MoU) လက်မှတ်ရေးထိုးပွဲ အခမ်းအနားကိုကျင်းပပြုလုပ်ရာ ဟိုတယ်၊ ခရီးသွားလာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးမောင်မြင့်နှင့် ကမ္ဘောဒီးယားနိုင်ငံ၊ ခရီးသွားလာရေး ဝန်ကြီးဌာနဝန်ကြီး H.E. Mr. HUOT HAK တို့ တက်ရောက်၍ အမှာစကားပြောကြားကြပြီး မြန်မာ-ကမ္ဘောဒီးယား နှစ်နိုင်ငံခရီးသွားလုပ်ငန်းပူးပေါင်းဆောင်ရွက်မှုဆိုင်ရာ နားလည်မှုစာချွန်လွှာ (MoU) ကို လက်မှတ်ရေးထိုးကြပါသည်။
ထို့နောက် ပြည်ထောင်စုဝန်ကြီးသည် မြန်မာ-ကမ္ဘောဒီးယား နှစ်နိုင်ငံအကြား ခရီးသွား ဆွဲဆောင်မှုများကိုအပြန်အလှန်သိရှိစေရန်၊ နှစ်နိုင်ငံ ခရီးသွားလာမှုနှင့် ပူးပေါင်းဆောင်ရွက်မှု တိုးမြှင့်နိုင်မည့် ဆန်းသစ်သောဗျူဟာများ ချမှတ်နိုင်ရန်နှင့် အစိုးရ-ပုဂ္ဂလိက ခရီးသွားကဏ္ဍများ အကြား ပိုမိုထိရောက်သော ပူးပေါင်းဆောင်ရွက်မှုများ ဖော်ဆောင်နိုင်ရန် ရည်ရွယ်၍ ကျင်းပ ပြုလုပ်သည့်မြန်မာ-ကမ္ဘောဒီးယား ခရီးသွားလုပ်ငန်းမြှင့်တင်ရေးRoadshow သို့ တက်ရောက်၍ အဖွင့်အမှာစကား ပြောကြားရာ၌ မြန်မာနှင့် ကမ္ဘောဒီးယား နှစ်နိုင်ငံတို့သည် အာဆီယံနှင့် မဟာမဲခေါင်ဒေသခွဲကဲ့သို့ ဒေသတွင်းအဖွဲ့အစည်းများ၏ မူဘောင်များနှင့်အညီ ပူးပေါင်းဆောင်ရွက်လျက်ရှိပြီး နက်ရှိုင်းသော ယဉ်ကျေးမှုဆိုင်ရာဆက်နွှယ်မှုနှင့် တူညီသော ကိုးကွယ်ယုံကြည်မှု တန်ဖိုးများ ရှိကြသည့်အလျောက် ကမ္ဘောဒီးယားနိုင်ငံ၏ ကမ္ဘာကျော် အန်ကောဝတ် (Angkor Wat) နှင့် မြန်မာနိုင်ငံ၏ ပုဂံ (Bagan) ရှေးဟောင်းမြို့တော်တို့အကြား နက်ရှိုင်းသော ဆက်နွှယ်မှုအပေါ် အခြေခံကာ ပုဂံနှင့် စီယမ်ရိစ် (Siem Reap) တို့ကိုညီအစ်မမြို့တော်များ (Sister Cities) အဖြစ် ဖော်ဆောင်ရန်၊ တိုက်ရိုက်လေကြောင်းလိုင်းများ ပြေးဆွဲပျံသန်းရန်နှင့် ပူးတွဲခရီးသွားမြှင့်တင်ရေး ဗျူဟာများ ချမှတ်ရန် ပူးပေါင်းဆောင်ရွက်သွားမည်ဖြစ်ပါကြောင်း၊ ထို့ပြင် “Two Countries - One Destination” “Two Ancient Cities – One Destination” အစီအစဉ်များဖြင့် ပူးပေါင်းစျေးကွက် မြှင့်တင်ကာ နိုင်ငံတကာခရီးသွားဧည့်သည်များ အဆင်ပြေချောမွေ့စွာ လည်ပတ်နိုင်ရေးအတွက် နှစ်နိုင်ငံထိရောက်စွာပူးပေါင်းဆောင်ရွက်သွားမည်ဖြစ်ပါကြောင်း ပြောကြားခဲ့ပါသည်။
ဆက်လက်၍ ကမ္ဘောဒီးယားနိုင်ငံ ခရီးသွားလာရေးဝန်ကြီးဌာန ဝန်ကြီး H.E. Mr.HUOT HAK က အမှာစကားပြောကြားပြီး Road Show အစီအစဉ်အရကမ္ဘောဒီးယားနိုင်ငံ၏ ခရီးစဉ်ဒေသ များအကြောင်း ရိုက်ကူးထားသည့် Visit Cambodia Video နှင့် မြန်မာနိုင်ငံ၏ အထင်ကရ ခရီးစဉ် ဒေသများအကြောင်း ရိုက်ကူးထားသည့် Myanmar Beauty Video တို့အား ပြသကြပြီးကမ္ဘောဒီးယားခရီးသွားလုပ်ငန်းဘုတ်အဖွဲ့မှ တာဝန်ရှိသူများက ကမ္ဘောဒီးယားနိုင်ငံ ခရီးသွားလုပ်ငန်း အခြေအနေများကိုလည်းကောင်း၊ မြန်မာနိုင်ငံခရီးသွားလုပ်ငန်းအဖွဲ့ချုပ်မှ တာဝန်ရှိသူများက မြန်မာနိုင်ငံ၏ ခရီးသွားလုပ်ငန်းအခြေအနေများကိုလည်းကောင်း အသီးသီး ရှင်းလင်းတင်ပြခဲ့ကြောင်းသိရသည်။
