26/08/2026
الحمد للہ رب العالمین، والصلوٰۃ والسلام علیٰ سیدنا محمد ﷺ۔
12 ربیع الاول کا نام آتے ہی ہر مسلمان کے دل میں اپنے پیارے نبی، حضرت محمد مصطفیٰ ﷺ کی محبت تازہ ہو جاتی ہے۔ یہ وہ مبارک موقع ہے جس کی نسبت ہمارے آقا و مولا حضرت محمد ﷺ کی سیرتِ طیبہ اور محبتِ رسول ﷺ سے ہے۔
دنیا میں بے شمار بادشاہ آئے اور چلے گئے، بڑے بڑے لوگ گزر گئے، لیکن محمد ﷺ جیسا کوئی نہ آیا اور نہ کبھی آئے گا۔ آپ ﷺ نے انسانیت کو محبت، بھائی چارہ، سچائی، عدل اور رحمت کا درس دیا۔ اللہ تعالیٰ نے قرآنِ مجید میں فرمایا:
وَمَا أَرْسَلْنَاكَ إِلَّا رَحْمَةً لِّلْعَالَمِينَ
ترجمہ: اور ہم نے آپ کو تمام جہانوں کے لیے رحمت بنا کر بھیجا ہے۔
آج بھی جب ہم اپنے پیارے نبی ﷺ کا نام سنتے ہیں تو بے اختیار دل ادب سے جھک جاتا ہے اور آنکھیں نم ہو جاتی ہیں۔ ہماری آنکھوں نے آپ ﷺ کو نہیں دیکھا، ہمارے کانوں نے آپ کی آواز نہیں سنی، مگر پھر بھی ہمارے دل آپ ﷺ کی محبت سے بھرے ہوئے ہیں۔
یا رسول اللہ ﷺ! ہم آپ کے زمانے میں نہیں تھے، ہم آپ کے ساتھ نہیں چل سکے، ہم نے آپ کا مبارک چہرہ نہیں دیکھا، لیکن ہمیں فخر ہے کہ ہم آپ ﷺ کے امتی ہیں۔
12 ربیع الاول ہمیں صرف محبت کے اظہار کا نہیں بلکہ آپ ﷺ کی تعلیمات پر عمل کرنے کا پیغام دیتا ہے۔ سچی محبت یہ ہے کہ ہم نماز کے پابند بنیں، سچ بولیں، والدین کی خدمت کریں، غریبوں اور یتیموں سے محبت کریں اور اپنی زندگی کو سنتِ رسول ﷺ کے مطابق گزارنے کی کوشش کریں۔
آئیے! اس مبارک موقع پر ہم عہد کریں کہ ہم اپنے نبی ﷺ سے محبت کو صرف الفاظ تک محدود نہیں رکھیں گے بلکہ اپنی زندگیوں میں آپ ﷺ کی سنتوں کو اپنائیں گے۔
یا اللہ! ہمیں اپنے محبوب حضرت محمد مصطفیٰ ﷺ کی سچی محبت عطا فرما، ان کی سنتوں پر چلنے کی توفیق دے اور قیامت کے دن ہمیں ان کی شفاعت نصیب فرما۔ آمین یا رب العالمین۔
تحریر و پیشکش: حافظ معصوم اکرم
