06/07/2024
මිනී හතරක් ළඟ තියාගෙන පොල්කිරි හා උණු වතුර බිබී
තංගල්ලේ ධීවරයා ජීවිතය ගලවාගත් හැටි
🚤🚤🚤🚤🚤🚤🚤🚤🚤🚤🚤🚤🚤🚤🚤🚤
හම්බන්තොට වරායේ සිට හම්බන්තොට මහ රෝහලට සුමිත් කුමාරව රැගෙන යමින්
– එදා රෑ කට්ටියම නිදාගන්න ගියේ ඔළුව රිදෙනවා, පපුව රිදෙනවා, බඩ දැවිල්ලයි කියාගෙන.
– “වතුරට පැනල පීනල ගිහින් ඔය බෝතලේ ගෙනාවේ සුද්දා. බෝතලේ දැක්කම කට්ටියට සතුට ඉහවහ ගියා.
කළු මහත්තයාට අයත් “ඩෙවෝන් 05“ ට්රෝලරය ඈත දියඹේ මසුන් අල්ලන්නට තංගල්ල ධිවර වරායෙන් දියඹට යන්නේ පසුගිය ජූනි 04 වෙනිදාය. මාසයකට දෙකකට සරිලන වියළි ආහාර ද්රව්ය මෙන්ම ජලයද පුරවාගත් මෙම බහුදින යාත්රාව දියඹට රැගෙන යන්නේ සුපුරුදු කප්පිත්තා වූ නයන කාන්තය. තංගල්ල ගොඩැල්ල වත්තේ පදිංචිකරුවෙක්වූ ඔහු තිදරු පියෙකි. ගොඩබිමට වඩා නයන කාන්තට මහ මුහුද හොඳින් හුරු පුරුදුය. ඔහු වැඩ පෙන්වන්නට දන්නේ මහා මුහුදේය. ට්රෝලරය ඔහුට සෙල්ලම් බඩුවකි. කුඩා කල සිටම නයක කාන්ත ජීවත් වූයේද මහමුහුද සමඟිනි. මහ මුහුද ඔහුට සිය නිවස මෙන් හුරුපුරුදු තැනක් බවට පත්ව තිබුණේ එබැවිනි. ..
එදා ඔහු “ඩොවෝන් 05“ සමඟ දියඹට යන්නේ තනිවම නොව. තංගල්ල මුතුමාල වත්තේ පදිංචිකරුවෙක් වූ පී. ඩී. ජයසූරිය, වැලිගම වල්ලිවල පදිංචිකරුවෙක් වූ සංජීව කුමාර, අම්බලන්තොට බැරගම පාසල් පෙදෙසේ පදිංචිකරුවෙක් වූ ඩී. බී. එස්. කුමාර, මැද මහනුවර පුවක්වෙල පදිංචිකරුවෙක් වූ ආර්. බී. ජී. පී. නිශාන්ත සහ තංගල්ල සංඝබෝධි මාවතේ පදිංචිකරුවෙක් වූ අජිත් කුමාර යන අයද සමඟිනි. මේ හැමෝම මහ මුහුද සමඟ ඔට්ටුවන ධිවරයන්ය.
මෙවර ගමනේදී වැඩි ඈතට යන්නට මත්තෙන් ට්රෝලරය මසුන්ගෙන් පිරීයන්නට වූයේ හිතාගන්නටත් බැරි වේගයෙනි. ගැඹුරු නොවන මුහුදු තීරයේ දින දෙක තුනක් ගතකරමින් කුඩා මසුන් ද අල්ලාගනිමින් නයන කාන්ත ට්රෝලරය රැගෙන යන්නේ ජාත්යන්තර මුහුදු සීමාවටය. ඒ දින පහ හයක ගමනකින් අනතුරුවය. ඒ යන විටත් ට්රෝලරයෙන් භාගයක්ම අල්ලාගත් මසුන්ගෙන් පීරී තිබුණේය.
මුහුදේ පාවෙමින් තිබුණු බෝතලයක් මෙම ධිවරයින්ගේ ඇස ගැටෙන්නේ ගොඩබිමේ සිට මුහුදු සැතපුම් 350ක් පමණ වූ ගැඹුරු මුහුදු තීරයේ රැදෙමින් තලපත්, කොප්පරා, බලයා ඇතුළු ලොකු මාළු අල්ලමින් ට්රෝලරය පුරවමින් සිටියදීය. වැඩි මත්ස්ය අස්වැන්නක් ලැබීමේ ප්රීතිය සැමරීමට ක්රමයක් සොයමින් ධිවරයින් සිතන්නේ එය දෙවියන් වහන්සේ විසින් තමන් වෙත එවන ලද මත්පැන් බෝතලයක් විය හැකි බවය. මුහුදේ පාවෙමින් තිබුණු කළු පැහැයට හුරු එම බෝතලය අතට ගන්නේ එක් අයෙක් මුහුදට පැන පිහිනා ගොසිනි. බෝතලය ට්රෝලරයට රැගෙන එනතුරු පිරිසට ඉස්පාසුවක් නොවීය. පාවෙමින් තිබියදී ඈතට කළු පැහැති ලෙස පෙනුනද එය තද දුඹුරුපැහැති ලොකු වීදුරු බෝතලයකි. මුද්රා කඩා නොතිබුණු එහි ඇතුළත තිබුණේ ද්රාවණයකි. එම ද්රාවණය කුමක්දැයි හඳුනා ගැනීමට එහි කිසිදු ලේබලයක් නොවීය. මෙවැනි බෝතල්වල ඇත්තේ විදෙස් මත්පැන් බව මුහුදේ වැඩිකලක් කරක් ගසන ධිවරයින්ට අමුතුවෙන් කියා දිය යුතු නොවේ. ඒ මෙවැනි බෝතල් මහා මුහුදේදී හමුවීම අලුත් දෙයක් නොවන බැවිනි. නෞකා අනතුරුවලදී හෝ අතපසුවීම්වලින් මුහුදට වැටෙන මෙවැනි ද්රව්ය වැඩිහරියක් පරිහරණයට ගන්නේ ධිවරයින්ය. නයන කාන්ත ඇතුළු පිරිස ද සිතන්නේ මේ බෝතලයේ ඇත්තේ විස්කි යැයි කියාය. සතුටින් පිනා යන ඔවුන් බෝතලය අතින් අතට මාරුකරමින් සතුට සමරනු ලැබුවේ බෝතලය ද ලීටර් 05ක පමණ එකක් වූ බැවින් හොඳ හැටි පදම් වීමට ලැබුණු අවස්ථාව ගැන සිතාය. ඒ අතර බෝතලය අතින් ගෙන සෙල්ෆියක්ද ගත්තේ සතුට ඉයවහ ගිය තැනය. එම සෙල්ෆිය ට්රෝලරයේ ඒ වන විට සිටි ධිවරයින් හයදෙනාගෙන් පස්දෙනෙකුගේ ජීවිතයේ අවසන් ඡායාරූපය බවට ඒ කිසිවෙකුත් නොසිතන්නට ඇත. ජූනි 27 වෙනිදා ගත් එම සෙල්ෆියෙන් අනතුරුව බෝතලයේ තිබුණු ද්රාරවණය විස්කි යැයි සිතා පානය කළ 06 දෙනාගෙන් 05 දෙනෙකුම මොලොව අතහැර ගොස් සිටින බැවිනි.
වතුරට පැනල පීනල ගිහින් ඔය බෝතලේ ගෙනාවේ සුද්දා. බෝතලේ දැක්කම කට්ටියට සතුට ඉහවහ ගියා. ඊට ඉස්සරින් ආපු ගමන් දෙකේම මාළු ගොඩක් අල්ලගන්න බැරි වුණා. අපි හිස් අතින් වගෙයි එදා වරායට ගියේ. මේ පාර මාළු ගොඩ හිටපු නිසා හැමෝම හිතුවේ වාසනාවන්ත ගමනක් තමයි ආවේ කියලා. බෝතලේ හමුවුණාම කට්ටියගේ සතුට වැඩි වුණා.“ මහ මුහුද මැද සිය සඟයන්ට සිදුවූයේ කුමක්දැයි කියන්නට ඉතිරිවූ එකම පුද්ගලයා වූ සුමිත් කුමාර අමතක කරන්නට වෙර දරණ ඒ සිදුවීම මතකයට නඟන්නට වූයේ එසේය.
“හැමෝම හිතුවේ විස්කි බෝතලයක් කියලයි. බෝතලේ කැඩුවා. ඉස්සෙල්ලාම බිව්වේ ස්කීපර් නයන කාන්ත. ඊට පස්සේ අතින් අත බෝතලේ හුවමාරු වුණා. හැමෝම බොන්න ගත්තා. මටත් බොන්න කිව්වා. මට හිත දුන්නේ නැහැ බොන්න. ඒත් කට්ටියම බල කළා බොන්න කියල. ඒ නිසාම උගුරක් කටට දාගත්ත. බඩ කට පිච්චිලා ගියා. ලොකු සැරක් තිබුණේ. මම අනිත් අයට කිව්වා බොන්න එපා, ඕකේ මොනව තියෙනවද දන්නේ නැහැ කියල. ඒත් එයාලා ඇහුවේ නැහැ. ආයිත් පාරක් මට බලෙන්ම වගේ උගුරක් පෙව්වා. බෝතලේ භාගයක් විතර ඉවර වෙනකම් බොමින් කට්ටිට සිංදු කියමින් විනෝද වුණා.“ යැයිද සුමිත් කුමාර කියන්නේය.
මේ සිදුවීම වන විට ට්රෝලරයේ ස්කීපර්වරයාගේ වගකීම දරන්නේ සුමිත් කුමාරය. මේ බෝතලය ගැන ඔහුට දැනෙන්නේ අමුත්තකි. එහෙත් සෙසු කිසිවෙකුටත් ඒ බව වගේ වගත් නැත. තමන්ට ලැබුණු ඒ බෝතලය පුළුවන් තරම් හිස් කළ ඔවුන් තවත් යාත්රාවකට බෝතලය ලබා දී ඇත. ඒ ඩෙවෝන් 05 ට්රෝලරයේ හිමිකරුටම අයත් බව කියන වෙනත් ට්රෝලරයක සිටි පිරිසකටය. තංගල්ල පොලිසිය පවසන ආකාරවයට අනුව ඒ අය ද දියඹට එන්නේ තංගල්ල ධිවර වරායේ සිටය. ඩොවෝන් 05 යාත්රාව දියඹට ගොස් සතියකට පමණ පසුවය. බෝතලය එම යාත්රාවේ සිටි ධිවරයින් අතට පත්වූවත් ඔවුන් එහි රස බලන්නට ගියේ නැත. ඩෙවෝන් 05 යාත්රාවේ රැඳී සිටි ධිවරයින් එම බෝතලය පානය කර මිය ගොස් ඇති බව රේඩියෝ පණිවුඩ මඟින් දැනගත් සැණින් බෝතලය විසිකර දැමුවේ මහ මුහුදටය.
එදා රෑ කට්ටියම නිදා ගන්න ගියේ ඔලුව රිදෙනවා, පපුව රිදෙනවා, බඩ දැවිල්ලයි කියාගෙන. කෙඳිරි ගගා ඒ අය නිදාගෙන හිටියා. මගෙත් ඔලුව රිදෙන්න ගත්තා. බඩෙත් දැවිල්ලක් තිබුණා. පහුවෙනිදා උදේ නැගිටිනකොට වෙන්න තියෙන ඔක්කොම දේවල් වෙලා ඉවරයි“ යැයි සුමින් කුමාර පවසන්නේ ඒ අවස්ථාව මතකයේ නඟන්නටද බැරි බව කියමිනි.සුමිත් කුමාර එදා උදේ දකින්නේ ට්රෝලරයේ ස්කීපර් නයන කාන්ත මියගොස් ඇති ආකාරයයි. බෝතලය කටේ තියාගෙන මුලින්ම බී තිබුණේ ඔහුය. අනිත් අය ගැන සොයා බැලීමේදී තවත් දෙන්නෙක් සිටියේ මියගොසිනි. අනෙක් අය සිටියේ ජීවිතයත් මරණයත් අතර ලොකු සටනක නිරත වෙමිනි. ඒ වන විට හොඳ සිහියෙන් සිටි එකම පුද්ගලයා වූයේ සුමිත් කුමාර පමණි. බඩ පවුව දැවිල්ලෙන් සිටි ඔහුගේ සිතටද මරණයේ වේදනාව දැනෙන්නට ගත්තේය. වේදනාවෙන් ජීවිතය යදිමින් සිටි සෙසු ධිවරයින් දෙදෙනාගේ ඒ හඩ සුමිත් කුමාරගේ දෙසවන්වල ගිගුම් දෙන්නට ගත්තේය. ට්රෝලරයේ ස්කීපර්වරයාගේ කුටියට ගොස් ඔහු රේඩියෝ පණිවුඩ හුවමාරු යන්ත්රය අතට ගෙන උදව් ඉල්ලා පණිවුඩයක් ලබාදෙන්නේ ඒ වන විට කරන්නට තිබුණු එකම පියවර ගනිමිනි. අනතුරුව ඔහු දිව යන්නේ ට්රෝලරයේ මුළුතැන්ගෙය වෙතය. පොල්කිරී කෝප්පයක් උගුරට හලාගන්නා ඔහු ඒ තුළින් පණ රැක ගැනීමට උත්සහයක් ගත්තේය. ඒ මාරයා ඊළඟට හඹා එන්නේ තමාව බව දැනගෙනය. අනතුරුව උණුවතුර බොමින් උදව්වට යාත්රාවක් පැමිණෙන තෙක් ඉමක් කොනක් නොපෙනෙන මහා සයුර දෙස දෑස් අයාගෙන සිටියේය.
“ඩෙවෝන් 05“ යාත්රාවේ සහෝදර යාත්රාව වන “ඩෙවෝන් 02“යාත්රාව ඒ කිට්ටුවට එන්නේ ඔය අතර තුරදීය. ඒ වන විටත් ජීවිතයත් මරණයත් අතර සටනක නිරතව සිටි තවත් ධිවරයෙක් සිටියේ මියගොසිනි. හුස්ම පොද අල්ලාගෙන සිටියේ සුමිත් කුමාර සහ අජිත් කුමාර පමණි. ඒ වන විටත් “ඩෙවෝන් 02“ යාත්රාවෙන් ගොඩබිමට මේ ගැන දැනුම්දී තිබුණේ ඉතිරි ජීවිත ටික හෝ රැක ගන්නට උදව් ඉල්ලමිනි. ඩෙවෝන් 05 යාත්රාවේ සිටි ධිවරයන්ගේ පවුල්වල උදවිය මෙන්ම යාත්රාවේ හිමිකරුද කියන්නට හැකි හැම තැනකටම මේ ගැන කියමින් උදව් ඉල්ලන්නට වූයේ අසාධ්යව සිටින එම ධිවරයින් දෙදෙනාව හෝ ගොඩබිමට ඉක්මනින්ම ගෙන්වා දෙන ලෙස ආයාචනා කරමිනි. ඔරුවක් මහා පාරට ඇදගෙනවිත් දමා ප්රධාන මාර්ගය අවහිරකරමින් උද්ඝෝෂණයක නිරත වන්නට ගත්තේය. ඒ අය චෝදනා නගන්නට වූයේ අසාධ්යව සිටින ධිවරයින් පිරිස බේරාගන්නට බලධාරීන් නිසි මැදිහත්වීමක් නොවන බවය. ඒ වන විටත් නාවික හමුදාව විසින් එ් වන විටත් දිවි රැකගෙන සිටි ධිවරයින් දෙදෙනා නිරුපද්රිතව බේරා ගැනීමට මෙහෙයුමක් පවා දියත් කර තිබුණේය. ධිවර දෙපාර්තමේන්තුවත් ඒ වන විට බලධාරීන් දැනුවත් කරමින් ධිවරයින් බේරා ගන්නට මඟක් සොයමින් සිටියේය. ඒ හෙලිකොප්ටරයක්වත් යවන්නට ඇති හැකියාවක් තිබේ දැයි සොයා බලමිනි. යාත්රා නිරීක්ෂණ පද්ධතිය ඔස්සේ ඩෙවෝන් 05 සහ ඩෙවෝන් 02 යාත්රා ඇති ස්ථාන ගැන සොයා බැලීමේදී පෙනී ධිවර දෙපාර්තමේන්තුවට පෙනී යන්නේ නාවික සැතපුම් 400ක් පමණ ඈතක එම යාත්රා ස්ථානගතව ඇති බවය. එතරම් දුරකට මහා මුහුදේ හෙලිකොප්ටරටක් රැගෙන යාම තවත් අවධානමකි. මහා සයුරේ යාත්රාකරමින් තිබුණු නාවික හමුදාවේ විජය බාහු නෞකාව ඒ දෙසට හැරවෙන්නට වූයේ එම අවධානම පසෙකලා නෞකාය මඟින් එම ධිවරයින් බේරාගන්නටය. ඒ අතර කොළඹ සමුද්රීය සෙවීමේ හා මුදා ගැනීමේ සම්බන්ධිකරණ මධ්යස්ථානය හරහා ජාත්යන්තර මුහුදු ගමන් කරන නෞකාවලට පණිවුඩ යොමුකරන්නට වූයේ ඩොවෝන් 02 යාත්රාවේ සිටින අසාධ්ය ධිවරයින් දෙදෙනා ගැන කියමින් ඔවුන්ව බේරාගන්නා ලෙස දැනුම් දෙමිනි. එම පණිවුඩය නිකුත්වන විට එම මුහුදු සීමාවේ ඩෙවෝන් 02 ට්රෝලරයට ආසන්නයෙන් යාත්රා කරමින් තිබෙන්නේ සිංගප්පූරු වෙළඳ නෞකාවකි. “MV KOTA CAMIL” නැමැති එම වෙළද නෞකාව මඟින් “ඩෙවෝන් 02“ යාත්රාවේ අසාධ්යව සිටියේ යැයි කී ධිවරයින් දෙදෙනා භාර ගන්නේ 30 වෙනිදා උදෑසනය. ඒ වන විටත් සුමිත් කුමාර සිටින්නේ යහපත් සෞඛ්ය තත්ත්වයකිනි. ජීවිත අවදානමක් ඔහුට නොවීය. එහෙත් අජිත් කුමාරගේ තත්ත්වය එතරම් සුබදායි නොවීය. ඒ බව සිංගප්පූරු වෙළඳ නෞකාව මඟින් ධීවරයින් දෙදෙනාගේ ඡායාරූපද සමඟ සමුද්රීය සෙවිමේ හා මුදා ගැනීමේ මෙහෙයුම් මධ්යස්ථානයට යොමු කළේය.
ඒ වන විටත් විජයබාහු නෞකාව තිබෙන්නේ සිංගප්පූරු වෙළඳ නෞකාව දෙසට යාත්රා කරමිනි. දෙවුන්දර සිට නාවික සැතපුම් 170ක් දුරින් වූ ගැඹුරු මුහුදේදී සිංගප්පූරු වෙළඳ නෞකාව සහ විජයබාහු නෞකාව එකිනෙක මුණගැසෙන්නේ 30 වෙනිදා සවස් කාලයේදීය. අසාධ්ය තත්ත්වයෙන් සිටි අජිත් කුමාරද සිටියේ මොලොව අතහැර ගොසිනි. ඔහුගේ මළ සිරුරද සමඟ සුමිත් කුමාරව සිංගප්පූරු වෙළඳ නෞකාවෙන් භාරගත් නාවික හමුදාව ඒ වන විටත් දිවි ගලවාගෙන සිටි සුමිත් කුමාරගේ ජීවිතය රැක ගැනීමට උපරිම වෛද්ය ප්රතිකාර ලබාදෙන්නට වූයේ නාවික හමුදා වෛද්ය කණ්ඩායමක් විසිනි. විජය බාහු නෞකාව සුමිත් කුමාරව රැගෙන එන්නේ හම්බන්තොට ජාත්යන්තර වරාය වෙතය. ඒ වන විට සුමිත් කුමාරගේ ජීවිත අවධානම පහව ගොස් තිබුණද බඩ පපුව දැවිල්ලත් හිසේ රුදාවේත් අඩුවක් නොවීය. එබැවින් වැඩිදුර ප්රතිකාර ගැනීමට ඔහුව ඇතුළත් කරනු ලබන්නේ හම්බන්තොට රෝහලටය. දින කිහිපයක් හම්බන්තොට රෝහලේ ප්රතිකාර ලැබූ සුමිත් කුමාර සිය නිවස වෙත යන්නේ හැම දෙයක්ම අමකකරන්නට සිතාගෙනය. එහෙත් ඊට ඉඩක් නොලැබෙන්නේ එදා ඒ මාරක බෝතලය බොන්නට පෙර ලබාගත් සෙල්ෆිය සමාජ මාධ්ය ඔස්සේ හුවමාරුවන්නට වූ බැවිනි. එම සෙල්ෆිය ගත් දුරකතනය තිබී ඇත්තේ “ඩෙවෝන් 05“ ට්රෝලරයේය. ඒ සිව්දෙනාගේ මළ සිරුරුත් එක්කය. එම ඡායාරූපය සමාජ මාධ්යට ගියේ කෙසේදැයි සොයා යම් විමර්ශනයක් ආරම්භකර ඇත්තේ එම ඡායාරූපය ගැන පොලිසිය ද දැන ගන්නේ සමාජ මාධ්ය ඔස්සේ වූ බැවිනි.
සටහන ගයාන් කුමාර වීරසිංහ ✍️
