21/06/2026
රුපියල් මිලියන 1950ක වියදමින්
රෝහල් පද්ධතියට
අධි තාක්ෂණික CT ස්කෑනර් යන්ත්ර 11ක්
ආඝාත, පිළිකා, හෘද හා රුධිර නාල රෝග ඇතුළු බරපතළ රෝග තත්ත්වයන් කඩිනමින් හා නිවැරදිව හඳුනාගැනීම සඳහා රුපියල් මිලියන 1950ක වියදමින් අධි තාක්ෂණික නවීන CT ස්කෑනර් යන්ත්ර 11ක් මෙරට රෝහල් පද්ධතියට එක් කිරීමට සෞඛ්ය හා ජනමාධ්ය අමාත්යාංශය කටයුතු කර තිබෙනවා.
සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ උපදෙස් හා මඟපෙන්වීම යටතේ ක්රියාත්මක මෙම වැඩසටහනේ අරමුණ වන්නේ රෝග විනිශ්චය සේවා නවීකරණය කර ජනතාවට වඩාත් ගුණාත්මක සෞඛ්ය සේවාවක් ලබාදීමයි.
ඒ අනුව කළුතර ශික්ෂණ රෝහල සඳහා රුපියල් මිලියන 200කට අධික වටිනාකමකින් යුත් 128-Slice CT ස්කෑනර් යන්ත්රයක් සහ කුරුණෑගල ශික්ෂණ රෝහල සඳහා රුපියල් මිලියන 160ක වටිනාකමකින් යුත් CT ස්කෑනර් යන්ත්රයක් මේ වනවිටත් ස්ථාපිත කර අවසන් කර ඇති බව සඳහන්.
එමෙන්ම ආසියානු සංවර්ධන බැංකුවේ (ADB) ආධාර යටතේ ශ්රී ලංකා ජාතික රෝහල, මහනුවර ජාතික රෝහල, ගාල්ල ජාතික රෝහල සහ කොළඹ දකුණු ශික්ෂණ රෝහල සඳහා රුපියල් මිලියන 640ක පමණ වටිනාකමකින් යුත් නවීන CT ස්කෑනර් යන්ත්ර හතරක් ලබාදී ඇති අතර, ඒවායේ ස්ථාපන කටයුතු මේ වනවිට සිදු කෙරෙමින් පවතිනවා.
තවද කුලියාපිටිය ශික්ෂණ රෝහල සහ දඹුල්ල, නාවලපිටිය, හලාවත හා මන්නාරම දිස්ත්රික් මහ රෝහල් සඳහා රුපියල් මිලියන 950ක වටිනාකමකින් යුත් අති නවීන CT ස්කෑනර් යන්ත්ර මිලදී ගැනීමේ කටයුතු ද මේ වනවිට ක්රියාත්මක වනවා.
දීර්ඝ කාලයක් තිස්සේ බොහෝ රජයේ රෝහල්වල භාවිතයට ගෙන තිබුණේ 16-Slice CT ස්කෑනර් යන්ත්ර වන අතර, වර්තමාන වෛද්ය තාක්ෂණයේ දියුණුවත් සමඟ 64-Slice සහ 128-Slice CT ස්කෑනර් මඟින් ඉතා කෙටි කාලයක් තුළ ඉහළ ගුණාත්මකභාවයකින් යුත් රූප සහ වඩාත් නිවැරදි රෝග විනිශ්චයන් ලබාගත හැකි වී තිබෙනවා.
සෞඛ්ය අමාත්යාංශය පෙන්වා දෙන්නේ මෙම නව පද්ධති මඟින් ආඝාත, හදිසි අනතුරු, පිළිකා, හෘද රෝග සහ රුධිර නාල ආශ්රිත රෝග තත්ත්වයන් කඩිනමින් හඳුනාගැනීමට හැකි වන අතර, හදිසි ප්රතිකාර සේවාවල කාර්යක්ෂමතාව ද සැලකිය යුතු ලෙස ඉහළ යනු ඇති බවයි.
මෙම වැඩසටහනේ විශේෂත්වය වන්නේ අමාත්යාංශය යටතේ පවතින රෝහල්වලට පමණක් නොව පළාත් සභා රෝහල් ද ආවරණය වන පරිදි එය ක්රියාත්මක කිරීමයි.
ඒ හරහා දුරබැහැර ප්රදේශවල ජනතාවට ද ප්රධාන නගරවලට සීමා වී තිබූ උසස් රෝග විනිශ්චය පහසුකම් තම ප්රදේශයන්හිදී ම ලබාගැනීමේ අවස්ථාව උදා වනවා.
මෙය නව උපකරණ මිලදී ගැනීමකට පමණක් සීමා නොවන අතර, කඩිනම් රෝග විනිශ්චය, ප්රතිකාර ප්රමාද අවම කිරීම, වෛද්ය තීරණ ගැනීමේ ගුණාත්මකභාවය ඉහළ නැංවීම සහ ජීවිත ආරක්ෂා කිරීම අරමුණු කරගත් පුළුල් සෞඛ්ය ප්රතිසංස්කරණ වැඩසටහනක වැදගත් පියවරක් ලෙස ද සැලකෙනවා.
මෙසේ නවීන CT ස්කෑනර් සේවා ජාලය පුළුල් කිරීම, මෙරට වැඩිවෙමින් පවතින බෝ නොවන රෝග, මාර්ග අනතුරු සහ වයස්ගත ජනගහනය ඉහළ යාමෙන් මතුවන සෞඛ්ය අභියෝගවලට සාර්ථකව මුහුණ දීම සඳහා ද වැදගත් දායකත්වයක් සපයනු ඇතැයි සෞඛ්ය අමාත්යාංශය විශ්වාසය පළ කරනවා .
