03/01/2026
فلم ديال الأعصاب
البداية: واحد النهار كحل
القصة كتدور على برادلي، واحد السيد ضخم، ملاكم قديم، خدام ديبانور (Tow truck driver). فنهار واحد، كيتجمع عليه كلشي: الخدمة جراو عليه، ورجع للدار لقى مرتو كتخونو. برادلي، اللي كيبان هادئ ولكن الداخل ديالو بركان، قرر يسامح مرتو ويفتح صفحة جديدة، ولكن باش يدير الفلوس دغيا، رجع يخدم مع واحد العصابة ديال المخدرات.
التقلابة: ملي كتمشي الأمور عوجة
برادلي كان غاد مزيان، حتى لواحد النهار طاح فـ "بيييج" (كمين) هو والشركاء ديالو. وقع تبادل إطلاق نار، وبرادلي، حيت عندو مبادئ، وقف مع البوليس ضد المجرمين اللي معاه، ولكن فالأخير تحكم عليه بـ 7 سنين ديال الحبس.
التهديد: حياة أو موت
وهو فالحبس، جاو عندو ناس ديال العصابة اللي ضاعت ليهم السلعة، وقالوا ليه: "شوف، مرتك الحاملة راهي عندنا، وإلا بغيتي تشوف ولدك حي، خاصك تقتل واحد خينا محبوس فحبس آخر سميتو (ريد ليف)".
المشكلة فين كاينة؟ هاد السيد اللي خاصو يتقتل كاين فواحد البلاصة سرية ومعزولة بزاف سميتها "الجناح 99" (Cell Block 99).
الرحلة نحو "الجحيم"
باش يوصل لهاد الحبس الجديد، برادلي كان خاصو يولي "وحش". بدا كيفرشخ فالمخازنية (الحراس) وفالمساجين باش يحولو لداك الحبس اللي فيه الحراسة مشددة.
ملي وصل تما، لقى واحد المدير سادي (كيعجبو يعذب الناس)، وبدا برادلي كيهبط من طبقة لطبقة، ومن عذاب لعذاب، وهو كيهرس فالعظام ديال أي واحد وقف قدامو، هدف واحد بين عينيه: يوصل للجناح 99 باش ينقذ عائلتو.
علاش هاد الفيلم واعر؟
فينس فون: من الكوميديا تحول لـ "ماكينة ديال الضريب"، لدرجة أنك غتخلع منو.
الضرب الصحيح: القتال فالفيلم ماشي بحال أفلام مارفل، هنا كتشوف العظام كيتفركعو والدم حقيقي (Practical effects)، داكشي تقيل ومؤلم.
الستيل: الفيلم كيبدا شوية بشوية، ولكن النص الأخير ديالو كيولي عبارة عن "مجزرة" حقيقية.
🎬 Brawl in Cell Block 99 (2017)
#أفلام
the movie
