05/06/2026
ဈေးကွက်ထဲမှာ ဈေးနှုန်းတွေ တစ်ယောက်နဲ့တစ်ယောက် အပြိုင်အဆိုင် ချပြီး လုပ်နေကြတာ မြင်တော့... တွေးမိတာလေးတစ်ခုရှိတယ်။ ကိုယ်တွေ ကွန်ပျူတာနဲ့ မိတ္တူကူးတဲ့ လုပ်ငန်းလောကမှာလည်း တစ်ခါတလေ ဈေးပြိုင်ချရင်းနဲ့ ဘာမှမကျန်တဲ့ အခမဲ့ ကူလီထမ်းသမားဘဝ ရောက်မှန်းမသိ ရောက်နေကြတာမျိုးတွေ ရှိတတ်ကြတယ်။
ဒီလို ဈေးနှုန်းတွေ လျှော့ချပြီး ခါးကုန်းအောင် အပြိုင်အဆိုင် လိုက်လုပ်နေကြတာကို ကြည့်ရင် သမိုင်းထဲက သင်ခန်းစာတစ်ခုကို ပြေးမြင်မိတယ်။ ဟိုးယခင်က အရင်းအနှီးရော Backing ပါ တောင့်တင်းလှပါတယ်ဆိုတဲ့ သူဌေးကြီး ဦးနာအောက်ကို အားလုံး သိကြလိမ့်မယ်။
အဲ့ဒီခေတ်က ဦးနာအောက်ဟာ ဘယ်လောက်ပဲ ငွေကြေးအင်အား တောင့်တင်းပြီး နာမည်ကြီးခဲ့ပေမဲ့၊ ဧရာဝတီသင်္ဘောကုမ္ပဏီကြီးနဲ့ အပြိုင်အဆိုင် သွားလုပ်မိတဲ့အခါမှာတော့ တကယ့်ကို ခွေးဖြစ် (ဒူးထောက်ရှုံးနိမ့်) သွားခဲ့ရတာ ရာဇဝင်ပဲ။
အင်အားကြီးတဲ့ လုပ်ငန်းစုကြီးတွေနဲ့ ဈေးနှုန်းချင်း၊ အရင်းအနှီးချင်း သွားပြိုင်တာဟာ ကိုယ့်ဘက်က ဘယ်လောက်ပဲ အားသာချက်ရှိရှိ ရေရှည်မှာ ကိုယ့်လည်ပင်းကိုယ် ကြိုးကွင်းစွပ်သလို ဖြစ်သွားတတ်တာကို အဲ့ဒီ သမိုင်းက သက်သေပြနေတာမျိုးပါ။
ဒါကြောင့်မို့လို့ လုပ်ငန်းတစ်ခုကို လုပ်တဲ့အခါ ဈေးနှုန်းတွေ သတ်ပြီး သူသေကိုယ်သေ လိုက်ပြိုင်နေမယ့် အလုပ်မျိုးကို လုံးဝ အားမပေးဘူး။ လူလည်းပင်ပန်း၊ လုပ်ငန်းလည်း ရေရှည်မရပ်တည်နိုင်ဘဲ အချည်းနှီးဖြစ်မယ့် ကူလီထမ်းတဲ့ အလုပ်မျိုးတော့ ကျနော်တို့ လုံးဝ မလုပ်သင့်ဘူးလို့တော့ ထင်ပါတယ်။
တကယ်တော့ လုပ်ငန်းတစ်ခု ရေရှည်ရပ်တည်ဖို့အတွက် ဈေးကွက်ထဲမှာ အပြိုင်အဆိုင် လုပ်ရမှာက "ဈေးနှုန်း" မဟုတ်ဘဲ ကိုယ့်ရဲ့ "ဝန်ဆောင်မှု အရည်အချင်း (Quality)" ပဲ ဖြစ်ရမယ်။ လုပ်ငန်းတစ်ခုဖြစ်တည်ဖို့ ရင်းနှီးမြှုပ်နှံထားတဲ့ ပစ္စည်းတန်ဖိုးတွေနဲ့ တတ်ကျွမ်းတဲ့ ပညာအရည်အချင်းတွေကိုတော့ လေးစားဖို့ကောင်းတယ်၊ အဲ့ဒီ တန်ဖိုးတွေကို ဈေးပေါပေါနဲ့ ဖျက်ဆီးမပစ်သင့်ဘူး။
အဲ့ဒါကြောင့် ကျနော်တို့ ကွန်ပျူတာနဲ့ မိတ္တူလုပ်ငန်းလောကမှာလည်း ဈေးပေါပေါနဲ့ အရည်အသွေးမပြည့်တဲ့ လမ်းဟောင်းကြီးအတိုင်း လိုက်မသွားကြဖို့ အကြံပြုချင်ပါတယ်။ ကိုယ်ပေးရတဲ့ တန်ဖိုးထက် ပိုကောင်းတဲ့ ဝန်ဆောင်မှု၊ ပိုစိတ်ချရတဲ့ အရည်အသွေးမျိုးနဲ့ပဲ ရေရှည်ခိုင်မြဲအောင် အတူတူ သက်သေပြသွားကြဖို့ တိုက်တွန်းချင်ပါတယ်။
