23/05/2026
ကလေးကျန်းမာဖွံ့ဖြိုးဖို့ မဖြစ်မနေလိုအပ်တဲ့ “အဓိကအစားအစာအုပ်စု ၅ မျိုး”
ကလေးငယ်များနှင့် မတ်တပ်ပြေးစအရွယ် Toddlers များအတွက် နေ့စဉ်စားသုံးသည့် အစားအစာများသည် ခန္ဓာကိုယ်ကြီးထွားဖွံ့ဖြိုးမှုသာမက ဦးနှောက်ဖွံ့ဖြိုးမှု၊ သင်ယူနိုင်စွမ်းနှင့် ကိုယ်ခံအားကောင်းမွန်ရေးအတွက် အလွန်အရေးကြီးသည်။ ထို့ကြောင့် အာဟာရပြည့်ဝပြီး လတ်ဆတ်သန့်ရှင်းသည့် Healthy Food များကို အမျိုးမျိုး မျှတစွာ စားသုံးပေးနိုင်ရန် လိုအပ်ကြောင်း ကျန်းမာရေးပညာရှင်များက အကြံပြုထားသည်။
ကလေးများ ကျန်းမာစွာ ကြီးထွားဖို့အတွက် အဓိကလိုအပ်သည့် အစားအစာအုပ်စု ၅ မျိုးမှာ ဟင်းသီးဟင်းရွက်နှင့် ပဲမျိုးစုံ၊ အသီးအနှံများ၊ ဆန်နှင့် ဂျုံအုပ်စု၊ နို့နှင့် နို့ထွက်ပစ္စည်းများ၊ အသားနှင့် ပရိုတင်းဓာတ်ပါဝင်သည့် အစားအစာများဖြစ်ကြသည်။ အစားအစာအုပ်စုတိုင်းတွင် ကလေးခန္ဓာကိုယ်အတွက် မရှိမဖြစ်လိုအပ်သည့် Vitamins, Minerals, Protein, Fiber နှင့် စွမ်းအင်ဓာတ်များ ပါဝင်နေသည်။
အသီးအနှံများ၊ ဟင်းသီးဟင်းရွက်များနှင့် ပဲမျိုးစုံသည် Vitamins၊ Antioxidants နှင့် Fiber များကြွယ်ဝသဖြင့် ကလေးကို စွမ်းအင်ပေးနိုင်သလို အရွယ်ရောက်လာချိန်တွင် နှလုံးရောဂါ၊ Stroke နှင့် ကင်ဆာရောဂါအချို့ ဖြစ်နိုင်ခြေကိုလည်း လျော့နည်းစေရာတွင် အထောက်အကူပြုနိုင်သည်။ ထို့ကြောင့် မနက်စာ၊ နေ့လယ်စာ၊ ညစာနှင့် Snack အချိန်တိုင်းတွင် အသီးအနှံ သို့မဟုတ် ဟင်းသီးဟင်းရွက်တစ်မျိုးမျိုး ပါဝင်စေခြင်းသည် ကောင်းမွန်သော အစားအစာအလေ့အကျင့်တစ်ခုဖြစ်သည်။
ဆန်၊ ဂျုံနှင့် အစေ့အဆန်အုပ်စုတွင် ဆန်၊ ပေါင်မုန့်၊ Pasta၊ ခေါက်ဆွဲ၊ Oats နှင့် Breakfast cereals တို့ ပါဝင်ပြီး ကလေးများ၏ လှုပ်ရှားမှုနှင့် သင်ယူမှုအတွက် လိုအပ်သည့် စွမ်းအင်ကို ပေးစွမ်းနိုင်သည်။ Wholegrain အစားအစာများက စွမ်းအင်ကို ပိုမိုကြာရှည်စွာ ထိန်းပေးနိုင်သဖြင့် ကလေးကို ဗိုက်ဝလင်စေပြီး ကျန်းမာရေးအတွက်လည်း ပိုမိုသင့်တော်သည်။
နို့၊ Cheese နှင့် Yoghurt ကဲ့သို့သော နို့ထွက်ပစ္စည်းများတွင် Protein နှင့် Calcium များစွာ ပါဝင်သဖြင့် အရိုးနှင့် သွားများ ကြံ့ခိုင်ဖွံ့ဖြိုးရေးအတွက် အရေးပါသည်။ ကလေးအသက် ၆ လကျော်လာချိန်မှ စတင်မိတ်ဆက်ပေးနိုင်သော်လည်း အသက် ၁၂ လမတိုင်မီအထိ မိခင်နို့ သို့မဟုတ် Formula နို့ကိုသာ အဓိကထား တိုက်ကျွေးသင့်ကြောင်းလည်း ဖော်ပြထားသည်။
ထို့ပြင် အသား၊ ငါး၊ ကြက်ဥနှင့် ပဲအမျိုးမျိုးကဲ့သို့ Protein ကြွယ်ဝသည့် အစားအစာများသည် ကလေး၏ ကြွက်သားဖွံ့ဖြိုးမှုနှင့် ခန္ဓာကိုယ်တည်ဆောက်ရေးအတွက် အရေးကြီးသည်။ Iron၊ Zinc၊ Vitamin B12 နှင့် Omega-3 fatty acids တို့ ပါဝင်သောကြောင့် ဦးနှောက်ဖွံ့ဖြိုးမှုနှင့် မှတ်ဉာဏ်စွမ်းရည်ကောင်းမွန်စေရန်လည်း ကူညီပေးနိုင်သည်။
ကျန်းမာရေးပညာရှင်များက ကလေးများအား အရောင်၊ အရသာနှင့် texture မတူညီသည့် အစားအစာများကို မျိုးစုံစားသုံးစေသင့်ကြောင်း အကြံပြုထားပြီး အသီးအနှံနှင့် ဟင်းသီးဟင်းရွက်များကို စားသုံးမီ သန့်ရှင်းစွာ ဆေးကြောပေးရန်လည်း သတိပေးထားသည်။ အခွံစားလို့ရသည့် အသီးများကို အခွံမဖယ်ဘဲ စားသုံးခြင်းက အာဟာရပိုမိုရရှိစေနိုင်ကြောင်းလည်း သိရသည်။
BWM - Baby News
