22/12/2022
လုပ်သက် မန်နေဂျာ
▪️▪️▪️▪️▪️▪️▪️
လူတစ်ယောက်မှာ လုပ်ငန်းအတွက် အရည်အချင်း
က တကယ် အရေးပါဆုံးအရာဖြစ်ပါတယ်။
အဲ့ဒီ အရည်အချင်းက ပဲ လူအပေါ်ကို တန်ဖိုးသတ်မှတ်သလို ၊ ရှေ့ဆောင် လမ်းပြဖြစ်စေပါတယ်။ ကုန်ပစ္စည်းအနေနဲ့ပြောရရင် အရည်အသွေး ပေါ့ ။
Quality နဲ့ပတ်သက်ပြီး အဓိပ္ပါယ်ဖွင့်ထားတဲ့ အထဲမှာ အကြိုက်ဆုံးက စကားစုက ‘Quality is Customer Satisfaction ’ တနည်းအားဖြင့် သုံးစွဲသူရဲ့ စိတ်ကျေနပ်မှုလို့ဆိုတာပါ။
ဒါက ကုန်ပစ္စည်းတစ်ခုရဲ့ အရည်အသွေးအပေါ် သတ်မှတ်ဖွင့်ဆိုချက်တစ်ခုဖြစ်ပါတယ်။ လူတွေဖြစ်တဲ့ ကျွန်မတို့ရဲ့ အရည်အချင်းက ဘာတွေဖြစ်မလဲ?
အရည်အချင်းရှိတဲ့ ၀န်ထမ်းတိုင်းကို အလုပ်ရှင်တွေက လက်လွတ်မခံချင်ကြပါဘူး ၊ သူတို့တတ်နိုင်တဲ့ အနေအထား အခြေအနေ တစ်ခုအတွင်းမှာတော့ ရအောင် ထိန်းသိမ်းကြပါတယ်။ ဒီအပိုင်းကတော့
ကျွန်မတို့ HR တွေနဲ့ပိုသက်ဆိုင်လာပါပြီ။
ဒီအပိုင်းမှာ ခက်တာတစ်ခုက အရည်အချင်းကို
တိုင်းတာဖို့ ခက်ခဲတယ်ဆိုတာပါပဲ။ တိကျတဲ့ စံနှုန်းသတ်မှတ်ချက်တွေ ကွဲပြားစွာမရှိသေးရင်တော့ ဒီတိုင်းတာချက်ကလည်း မှားယွင်းနိုင်ပါတယ်။ နောက်တစ်ခုက အလုပ်ပြီးမြောက်မှုနဲ့ချည်းပဲလည်း တိုင်းတာလို့မရနိုင်သေးပါဘူး။
တစ်ခါတစ်လေမှာ အလွန်တော်တဲ့ လူတစ်ယောက်က လုပ်ငန်းဆောင်ရွက်ချက်တွေမှာ မအောင်မြင် နိုင်တဲ့ အခါ အရည်အချင်းမရှိဘူးလို့ သုံးသပ်လို့ရနိုင်မလား ? လူမှန် ၊နေရာမှန် မဖြစ်တာ တွေ ကြောင့်လည်း စွမ်းဆောင်ရည်ပြသလို့ မရနိုင်တဲ့ အခြေအနေတွေကြောင့် အရည်အချင်း အတွက် စွမ်းဆောင်ရည်ကောင်းတွေပြသလို့မရနိုင်တာလည်းဖြစ်နိုင်ပါတယ်။
အရည်အချင်းအကြောင်း ပြန်ဆက်သွားရရင်
HR နဲ့သက်ဆိုင်တဲ့ အပိုင်းကို ပြောချင်ပါတယ်။
ကျွန်မတို့ ၀န်ထမ်းတွေရွေးချယ်ရတယ်၊ ၀န်ထမ်းတွေကို အလုပ်နေရာမှန်ဖြစ်အောင် တာ၀န်ချ ပေးရတယ်။
ဒီတော့ အမှန်တကယ်အရည်အချင်းရှိတဲ့သူကို ရွေးချယ်ဖို့နဲ့ အဲ့ဒိအရည်အချင်းကို အလုပ်နေရာမှန်အောင် တာ၀န်ပေးထားနိုင်အောင် ဆောင်ရွက်ရတယ် အရမ်းအရေးကြီးပါတယ်။
၀န်ထမ်းရွေးချယ်ခြင်းဟာ မိမိအဖွဲ့အစည်းရဲ့
၀င်ပေါက်ဖြစ်တဲ့အတွက် HR function တွေထဲမှာ အရေးကြီးတဲ့ အပိုင်းဖြစ်ပါတယ်။ဒီအပိုင်းမှာ သေသေချာချာဆောင်ရွက်ထားနိုင်မှ သာ ကျန်တဲ့ အပိုင်းတွေကို ဆောင်ရွက်တဲ့အခါ အဆင်ပြေစေမှာဖြစ်ပါတယ်။
အရည်အချင်းနဲ့ပတ်သက်လို့ ဆက်ပြောရရင် ကျွန်မတို့ဆီမှာက အရေအတွက်တွေကို အရမ်းဦးစားပေးနေတဲ့ အခြေအနေမျိုးတွေပဲရှိနေပါသေးတယ်။
အဲ့ဒါကတော့ လုပ်သက်ဆိုတဲ့ နှစ်အရေအတွက်တွေပါ။ အလုပ်ခေါ်တဲ့အခါ လူချင်းမတွေ့နိုင်သေးခင် CV ပေါ်က လုပ်သက်အရည်အတွက်တွေက တနည်းအားဖြင့် ထည့်သွင်းစဉ်းစားစရာ ဖြစ်ပါတယ်။
ဒါပေမဲ့ တကယ်တမ်း လူချင်းတွေ့တဲ့အခါ အရည်အသွေးမပါလာတဲ့ လုပ်သက်တွေကြောင့် လုပ်ငန်းနဲ့ အံ၀င်ခွင်ကျမှု မရှိတာတွေ၊ လူမှန်နေရာမှန် မဖြစ်နိုင်တာတွေကို တွေ့လာရပါတယ်။ လုပ်သက်က တော့
လိုသလားလို့မေးရင် လိုအပ်ပါတယ်လို့ ကျွန်မဖြေမိမှာပါပဲ ။
ဘာကြောင့်လဲဆိုတော့ အလုပ်တစ်ခု ၊လုပ်ငန်းနယ်ပယ် တစ်ခုမှာ ရင်းနှီးကျွမ်း၀င်မှုရှိနေခြင်းအားဖြင့် အထိုက်အလျောက် ကျွမ်းကျင်ပိုင်နိုင်မှုရှိမယ်၊
လုပ်ငန်းနဲ့သက်ဆိုင်တဲ့ ပြသာနာတွေကို တွေ့ကြုံ ဖြေရှင်းဆောင်ရွက် ဖူးနိုင်ခဲ့လိမ့်မယ်လို့ တွက်ဆလို့ရပါတယ်။ ဒါက အပေါ်ယံ တွေးခေါ်ယူဆချက်နဲ့တင် သတ်မှတ်လို့ရနိုင်ပါတယ်။ ခက်တာက အဲ့ဒိလုပ်သက်အပေါ်မှာ အရည်အချင်းမပါတဲ့ အရေအတွက် ဖြစ်ခဲ့မယ်ဆိုရင် စိန်ခေါ်မှု အသစ်အဆန်းတွေနဲ့ ရင်ဆိုင်အတွေ့မှာ ပြိုလဲပျက်စီးသွားနိုင်ပါတယ်။
ဒီတော့ ကျွန်မတို့ဆီမှာ လုပ်သက်ဦးစားပေး ခေတ်ကုန်သွားပြီဆိုတာ တဖြည်းဖြည်းနဲ့ နားလည်
စေချင်ပါတယ်။
မြန်မာစကား မှာ အနေကြာလို့ မေဂျာဖြစ်တယ် ဆိုတဲ့စကားလို လုပ်သက် အတွေ့အကြုံကြောင့်ဖြစ်ဖြစ်
လုပ်ငန်းတစ်ခုမှာ ကြာလာလို့ပဲဖြစ်ဖြစ် စီမံခန့်ခွဲမှု နေရာကို ရောက်လာခဲ့ရင် လုပ်သက်မန်နေဂျာတွေဖြစ်လာကြတာများပါတယ်။
အဲ့လုပ်သက်နောက်မှာ ကျွမ်းကျင်မှု ၊ဦးဆောင်နိုင်စွမ်း၊ သင်ယူလေ့လာမှုတွေ မပါလာခဲ့ရင်တော့ လုပ်ငန်းခွင်
ထဲမှာ လုပ်ကိုင်ရတာပိုပြီး ခက်ခဲစေပါတယ် ။ တကယ့် အရည်အချင်းပါတဲ့ လုပ်သက်ဆိုတာကတော့ ထည့်သွင်းစဉ်းစားနိုင်ပါတယ်။ အလုပ်လာလျှောက်တဲ့ သူတွေအများအပြားမှာ CV ပေါ်က လုပ်သက် ၊လုပ်ငန်းဆောင်ရွက်ချက်တွေနဲ့ ပတ်သက်ပြီး ထင်သလောက်ပါမလာဘူးဆိုတာ ကျွန်မ အင်တာဗျူးလုပ်ခဲ့တဲ့ သူတွေ တော်တော်များများမှာ တွေ့ရပါတယ်။
လွန်ခဲ့တဲ့ တစ်ပတ်က ဆရာကြီးဒေါက်တာအောင်ထွန်းသက်ပွဲ မှာ ဆရာကြီးက ပြောသွားပါတယ်။
အလုပ်ရှင်တွေက သူတို့ဆီမှာ အရည် အချင်းရှိတဲ့ ၀န်ထမ်းတွေနည်းပါးတယ်၊ အပြင်မှာက အလုပ်လိုချင်တဲ့ သူတွေက ပုံနေတယ် …..ဆိုတော့ လိုနေတဲ့သူတွေနဲ့
ပိုနေတဲ့ သူတွေကြားမှာ မမျှတမှုက HR တွေအတွက် အရေးကြီးတဲ့ ပြသာနာလို့ဆိုသွားပါတယ်။ သေချာစဉ်းစားကြည့်ရင် ကျွန်မတို့နိုင်ငံရဲ့ အနေအထားအရ အရည်အသွေးမီ ၀န်ထမ်းတွေ ရှားပါးနေတယ်ဆိုတာကို မီးမှောင်ထိုး ပြလိုက်တာပါ။
ကျွန်တော်/ကျွန်မကတော့ ဘယ်နေရာမှာ ဘယ်နှနှစ်လုပ်ခဲ့ဖူးပါတယ် ဆိုတာထက် အခုအလုပ်ကို လုပ်ကိုင်နိုင်တဲ့ အရည်အချင်းမျိုးရှိမရှိကို ဦးစားပေးရွေးချယ်ပေးရမယ့် အနေအထား ကျွန်မတို့ HR တွေ ပိုပြီးတာ၀န်ရှိလာပါပြီ။
အရည်အချင်းရှိသူကို ရွေးချယ်ရာမှာလည်း Skill ,Knowledge ရှိသူကို ရွေးချယ်ရတာလွယ်သလို Attitude ကောင်းသူကို ရွေးချယ်ဖို့တော့ခက်ခဲပါတယ်။ လုပ်ငန်းအဖွဲ့အစည်း အတွက် အစစအရာရာကောင်းမွန် သူကို ရှာဖွေရာမှာတော့ ခက်ခဲမှုတွေရှိနေဦးမှာပါပဲ ။
ဆက်ပြိးတော့ အရည်အချင်းဘက်ကိုပြန်သွားရရင် ၀န်ထမ်းတွေအနေနဲ့လည်း အရည်အချင်းကို ပိုမိုကောင်းမွန်အောင် ဆောင်ရွက်ရမယ့် အပိုင်းကို တင်ပြချင်ပါတယ်။
မိမိရဲ့ ကိုယ်ပိုင်အရည်အချင်းတွေတိုးတက်ဖို့ဆောင်ရွက် တဲ့အခါ လုပ်ဆောင်သင့်တာက
(၁) ကျွမ်းကျင်မှု
(၂) နားလည်သဘောပေါက်နိုင်မှု
(၃) တွေးဆ ဆင်ခြင်နိုင်စွမ်း
ဒီ(၃) ခုအပေါ်မှာသာ အခြေခံ ဆောင်ရွက်ရမှာဖြစ်ပါတယ်။
ဒီတော့ လူတစ်ယောက်ချင်းမှာ မတူညီတဲ့ လုပ်ငန်းတွေ ကနေ မတူညီတဲ့ အရည်အချင်း တွေရလာနိုင်ပါတယ်။ ကိုယ်ဘယ်လိုလေ့လာသင့်သလဲ ဆိုတာ ကိုပဲ စဉ်းစား ဆောင်ရွက် ရမှာ ဖြစ်ပါတယ်။
အရည်အချင်းရှိသူတစ်ယောက်ဖြစ်စေဖို့ နဲ့ လုပ်သက် မန်နေဂျာများ မဖြစ်စေဖို့..
