23/06/2026
“ӨСӨЛТТЭЙ ӨМНӨГОВЬ” ХӨТӨЛБӨРИЙН ХҮРЭЭНД ХӨГЖЛИЙН БЭРХШЭЭЛТЭЙ ИРГЭДИЙН ХӨДӨЛМӨР ЭРХЛЭЛТИЙГ ДЭМЖИВ
Өмнөговь аймгийн Засаг даргын үйл ажиллагааны хөтөлбөр болох “ӨСӨЛТТЭЙ ӨМНӨГОВЬ” хөтөлбөрийн хүрээнд Ханбогд суманд хэрэгжүүлж буй хөдөлмөр эрхлэлтийг дэмжих төслийн батламж гардуулах арга хэмжээ амжилттай зохион байгуулагдлаа. Энэхүү төсөл нь орон нутгийн иргэдийн амьжиргааг дээшлүүлэх, тогтвортой орлогын эх үүсвэр бий болгох, хөдөлмөр эрхлэлтийг нэмэгдүүлэхэд чиглэсэн чухал санаачилгын нэг юм.
Төслийн хүрээнд ахмад настны хөдөлмөр эрхлэлтийг дэмжих чиглэлээр 3 иргэн шалгарч тус бүр үйл ажиллагаагаа өргөжүүлэх, орлогоо нэмэгдүүлэх боломж бүрдсэн бол хөгжлийн бэрхшээлтэй иргэдийн хөдөлмөр эрхлэлтийг дэмжих төсөлд 2 иргэн амжилттай хамрагдан батламжаа гардан авлаа. Тус хоёр иргэн нийт 4.0 сая төгрөгийн санхүүгийн дэмжлэг авч, өөрсдийн хөдөлмөр эрхлэлтийн үйл ажиллагааг эхлүүлэх, өргөжүүлэх боломжтой болж байна.
Хөгжлийн бэрхшээлтэй иргэдийг нийгмийн амьдралд идэвхтэй оролцуулах, хөдөлмөр эрхлэх тэгш боломжийг бүрдүүлэх нь төр, орон нутгийн бодлогын чухал зорилтуудын нэг билээ. Энэхүү төслийн хүрээнд олгож буй дэмжлэг нь зөвхөн санхүүгийн туслалцаа бус, харин иргэдийн өөртөө итгэх итгэл, хөдөлмөрлөх хүсэл эрмэлзлийг нэмэгдүүлж, бие даан орлого олох нөхцөлийг бүрдүүлж буйгаараа онцлогтой.
Өнөөдөр хөгжлийн бэрхшээлтэй иргэд өөрсдийн ур чадвар, авьяас боломжоо ашиглан олон төрлийн үйлдвэрлэл, үйлчилгээ эрхэлж, өрхийн орлогоо нэмэгдүүлэн, нийгэмдээ үнэ цэн бүтээж байна. Иймд хөдөлмөр эрхлэлтийг дэмжих төсөл, хөтөлбөрүүд нь тэдний нийгмийн оролцоог нэмэгдүүлэх, амьдралын чанарыг сайжруулахад бодит хувь нэмэр оруулдаг.
“ӨСӨЛТТЭЙ ӨМНӨГОВЬ” хөтөлбөрийн хүрээнд хэрэгжиж буй энэхүү төсөл нь орон нутгийн иргэдийн хөдөлмөр эрхлэлтийг нэмэгдүүлэх, өрхийн эдийн засгийг дэмжих, ажилгүйдлийг бууруулахад чиглэсэн үр өгөөжтэй ажил болж байна. Цаашид ч иргэдийн хэрэгцээ шаардлагад нийцсэн төсөл, арга хэмжээг үе шаттайгаар хэрэгжүүлж, хөдөлмөр эрхлэлтийг бүх талаар дэмжихээр ажиллаж байна.
Төсөлд шалгарч батламжаа гардан авсан нийт иргэддээ халуун баяр хүргье.✅ Хөдөлмөрч иргэн бүрийн хичээл зүтгэл орон нутгийн хөгжил дэвшлийн үнэт хувь нэмэр билээ.
2026.06.23. ХАНБОГД.мн
