http://gsmaf.gov.mn/, https://youtube.com/channel/UCWzzv5WNaWax7FUKSAJ7yGw?si=FBac8UWjkrmw1dSf

Зэвсэгт хүчний Агаарын цэрэг Mongolian Air Force, Монгол Улс, Ulaanbaatar (2026)

15/06/2026

ЭРСДЭЛИЙН ХЯНАЛТ, ШАЛГАЛТ ЯВАГДАЖ БАЙНА

🔹️Зэвсэгт хүчний Агаарын цэргийн командлагчийн тушаалаар байгуулагдсан ажлын хэсэг Зэвсэгт хүчний 325 дугаар ангид эрсдэлийн хяналт, шалгалтыг зохион байгуулж байна.

🔹️Шалгалтын хүрээнд бие бүрэлдэхүүний аюулгүй байдал, зэвсэглэл техник, сум галт хэрэглэл, материаллаг нөөц, барилга байгууламж, инженерийн дэд бүтэц, гал болон хөдөлмөрийн аюулгүй байдал, мэдээллийн аюулгүй байдлын чиглэлээр үүсэж болзошгүй эрсдэлийг үнэлж байна.

🔹️Энэхүү хяналт, шалгалт нь эрсдэлийг урьдчилан илрүүлэх, бууруулах, аюулгүй ажиллагааны соёлыг төлөвшүүлэх, цэргийн ангийн бэлэн байдал, үйл ажиллагааны тогтвортой байдлыг дээшлүүлэхэд чиглэж байна.

14/06/2026

ТӨРСӨН ӨДРИЙН МЭНД ХҮРГЭЕ!

🇲🇳 Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүх танд төрсөн өдрийн халуун мэндчилгээ өргөн дэвшүүлье!

🇲🇳 Танд Монгол Улсын тусгаар тогтнол, үндэсний аюулгүй байдал, ард түмнийхээ сайн сайхны төлөө хийж бүтээж буй эрхэм үйл хэрэгт тань өндөр амжилт, эрүүл энх, аз жаргал, сайн сайхан бүхнийг хүсэн ерөөе.

🇲🇳 Төрийн сүлд өршөөж, түмэн олон түшиж, үйл хэрэг бүхэн тань өөдрөг бүтэмжтэй байхын өлзийтэй ерөөлийг өргөн дэвшүүлье.

14/06/2026

ЗЭВСЭГТ ХҮЧНИЙ 303 ДУГААР АНГИ ЭРСДЭЛИЙН ХЯНАЛТ, ШАЛГАЛТАД ХАМРАГДЛАА

🔹️ Зэвсэгт хүчний Жанжин штабын даргын тушаалаар байгуулагдсан, бригадын генерал С.Баяр-Очироор ахлуулсан дэд ажлын хэсэг 2026 оны 06 дугаар сарын 12-ны өдөр Зэвсэгт хүчний 303 дугаар ангид ажиллаж, эрсдэлийн хяналт, шалгалтыг зохион байгууллаа.

🔹️ Тус шалгалтын хүрээнд бие бүрэлдэхүүний амь нас, эрүүл мэндийн аюулгүй байдал, зэвсэглэл, цэргийн техник хэрэгсэл, сум галт хэрэглэл, материаллаг нөөц, барилга байгууламж, инженерийн дэд бүтэц, галын болон хөдөлмөрийн аюулгүй байдал, мэдээллийн аюулгүй байдлын чиглэлээр үүсэж болзошгүй эрсдэлийг цогцоор нь үнэлэн дүгнэв.

🔹️ Мөн шалгалтын үеэр бие бүрэлдэхүүнтэй нээлттэй санал солилцож, тулгамдсан асуудал, санал хүсэлтийг сонссон нь эрсдэлийг бууруулах, осол зөрчлөөс урьдчилан сэргийлэх, аюулгүй ажиллах орчныг бүрдүүлэхэд чухал ач холбогдолтой арга хэмжээ боллоо.

12/06/2026

УЛСЫН ИХ ХУРЛЫН ҮЙЛ АЖИЛЛАГААТАЙ ТАНИЛЦЛАА

🇲🇳 Улсын Их Хурлын гишүүн, Засгийн газрын гишүүн, Батлан хамгаалахын сайд Д.Батлутын урилгаар Зэвсэгт хүчний Агаарын цэргийн командлалын бүрэлдэхүүн УИХ-ын үйл ажиллагаа болон Төрийн ордонтой танилцлаа.
🔹️ Танилцах арга хэмжээний үеэр "Улсын нисэхийн тухай хуулийн шинэчилсэн найруулгын төсөл"-ийн эцсийн хэлэлцүүлэг явагдаж таарсан ховор тохиолдол боллоо.
🔹️ Энэхүү хуулийн шинэчлэл нь улсын нисэхийн эрх зүйн орчныг боловсронгуй болгох, нислэгийн аюулгүй байдал, хяналтын зохицуулалтыг өнөөгийн нөхцөл байдалтай уялдуулан сайжруулах чухал ач холбогдолтой юм.
🔹️ Мөн үеэр УИХ-ын дарга С.Бямбацогт Агаарын цэргийн командлалын бие бүрэлдэхүүнд ажлын амжилт хүсэж, Засгийн газраас өргөн мэдүүлсэн хуулийн төсөлд идэвхтэй ажилласан АБГББХ-ны гишүүд болон БХЯ, ЗХЖШ-аас томилогдсон ажлын хэсэгт талархал илэрхийлсэн юм.

12/06/2026

ЗЭВСЭГТ ХҮЧНИЙ 065 ДУГААР АНГИЙН ХАРЬЯА ТУСГАЙ САЛБАРУУДЫН ЗАХИРАГЧ НАРЫН ЦУГЛАРАЛТ АМЖИЛТТАЙ ӨНДӨРЛӨЛӨӨ

🔹Зэвсэгт хүчний 065 дугаар ангийн харьяа тусгай салбаруудын захирагч нарын цугларалт 2026 оны 06 дугаар сарын 08-11-ний өдрүүдэд амжилттай зохион байгуулагдаж өндөрлөлөө.

🔹Цугларалтын онцлох үйл ажиллагаа нь “Радиотехникийн цэрэг, агаарын орон зайн хяналт” сэдэвт эрдэм шинжилгээний бага хурал байв. Мөн захирагч, офицеруудын мэргэжлийн мэдлэг, ур чадварыг нэмэгдүүлэх зорилгоор удирдлагын гар нийлэмжтэй ажиллагаа, төлөвлөлт, шийдвэр гаргалт, харилцан ажиллагааны чиглэлээр нэгдсэн сургалтууд зохион байгуулагдлаа.

🔹Түүнчлэн удирдах ажилтнуудын манлайлал, ёс зүй, гэр бүлийн хүчирхийллээс урьдчилан сэргийлэх, жендэрийн эрх тэгш байдал, мансууруулах эм, сэтгэцэд нөлөөт бодистой холбоотой гэмт хэргээс урьдчилан сэргийлэх чиглэлээр сургалт, хэлэлцүүлэг амжилттай явагдлаа.

🔹Арга хэмжээний төгсгөлд ангийн захирагч хурандаа Г.Чулуунзагд цугларалтын үр дүнг дүгнэж, олж авсан мэдлэг, туршлагаа өдөр тутмын үйл ажиллагаанд хэрэгжүүлэн, сахилга хариуцлага, албаны бэлэн байдлыг өндөр түвшинд ханган ажиллах үүрэг чиглэл өглөө.

🔹Мөн цугларалтад идэвх санаачилгатай, үр бүтээлтэй оролцсон тусгай салбарын захирагч нарт дурсгалын зүйл, сертификат гардуулж, цаашдын ажил албанд нь өндөр амжилт хүсэн ерөөв.

#ТусгайСалбар #ЗахирагчНарынЦугларалт #Манлайлал #МэргэжлийнБэлтгэл

10/06/2026

ЖЕНДЭРИЙН ТАЛААРХ МЭДЛЭГЭЭ НЭМЭГДҮҮЛЭВ

🔹Зэвсэгт хүчний 065 дугаар анги “Бүтэн бүлээн” ТББ-тай хамтран ангийн бүрэлдэхүүн болон тусгай салбарын удирдах албан тушаалтнуудтай “Жендэрийн эрх тэгш байдал, байгууллагын жендэрийн мэдрэмжтэй бодлого ба хандлага” сэдэвт сургалтыг зохион байгууллаа.

🔹Сургалтыг сургагч багш Д.Батхишиг, Э.Энэрэл, Ж.Батхишиг нар удирдан явуулж, “Жендэр гэж юу вэ?”, “Жендэрийн хэвшмэл ойлголт гэж юу вэ?”, “Жендэр эрчүүдийн асуудал болох нь” зэрэг сэдвээр мэдээлэл хүргэн, оролцогчидтой санал солилцон хэлэлцүүлэг өрнүүлэв.

🔹Энэхүү сургалт нь албан хаагчдын жендэрийн талаарх мэдлэг, ойлголтыг нэмэгдүүлэх, байгууллагын дотоод харилцаанд тэгш, хүндэтгэлтэй хандлагыг төлөвшүүлэх, ялгаварлан гадуурхалт болон өрөөсгөл хандлагаас урьдчилан сэргийлэхэд чиглэсэн үр өгөөжтэй арга хэмжээ боллоо.

10/06/2026

ЗАЛУУС ЗАНГИАГҮЙ УУЛЗАЛТАД

📌 “Залуу офицеруудын хөгжлийн жил” -ийн төлөвлөгөөт арга хэмжээний хүрээнд Зэвсэгт хүчний залуу офицеруудын “Эерэг ажлын орчин ба офицерын сэтгэл зүй” сэдэвт уулзалт, хэлэлцүүлэг явагдаж байна.

📌Зэвсэгт хүчний Жанжин штабын дарга дэслэгч генерал С.Ганбямба ТУС уулзалтад оролцож буй төлөөлөгчид болох тэргүүний залуу 80 гаруй офицеруудтай зангиагүй уулзалт хийж, тэдний шинийг эрэлхийлсэн үзэл бодол, дуу хоолой, санал санаачилгыг сонсож, өөрийн залуу офицер байх үеийн дурсамжаасаа хуваалцан шинэ зууны залуу офицеруудын манлайлал, ажлын арга барил, өөрийгөө хөгжүүлэх боломж зэрэг өргөн хүрээнд нээлттэй ярилцлаа.

📌Залуу офицерууд мэдлэг, туршлагаасаа өөр хоорондоо хуваалцан нөхөрлөхийн зэрэгцээ мод тарьж, илтгэл хэлэлцүүлэн, Чингис хааны музейгээр зочлон үндэсний бахархалт түүхийн хосгүй өв соёлтой танилцав.

📌Тэд энэхүү арга хэмжээнд төлөөлөгчөөр оролцож, эрч хүч, бүтээлч сэтгэлгээгээ улам баяжуулан хамтын ажиллагаа, нөхөрлөлийг бэхжүүлж, Зэвсэгт хүчнийхээ хөгжилд бүтээлч оролцоогоо нэмэгдүүлэх чухал алхам болж байгааг онцолж, Зэвсэгт хүчний удирдлагад талархаж байгаагаа илэрхийллээ.

10/06/2026

МОНГОЛ УЛСАД БАТЛАН ХАМГААЛАХЫН АТТАШЕГИЙН ОЛОН УЛСЫН ДАМЖАА ЭХЭЛЛЭЭ

Монгол Улсын Батлан хамгаалах яам, Үндэсний батлан хамгаалахын их сургууль болон Geneva Centre for Security Policy-ийн хамтын ажиллагааны хүрээнд Батлан хамгаалахын атташегийн олон улсын дамжаа 2026 оны 6 дугаар сарын 10-ны өдөр Улаанбаатар хотноо эхэллээ. Дамжааны нээлтийн ажиллагаанд Батлан хамгаалах яамны удирдлага, Үндэсний батлан хамгаалахын их сургуулийн төлөөлөл, гадаад, дотоодын оролцогчид оролцов.

Тус дамжаанд Швейцар, АНУ, Канад, Их Британи, Япон, БНХАУ, Лесото, Польш, Египет, Вьетнам, Швед, Намиби, Австри, Нигери, Герман, Румын, Финланд, Монгол зэрэг 18 орны нийт 35 цэргийн алба хаагч, батлан хамгаалахын атташе болон батлан хамгаалах, дипломат салбарын төлөөлөгчид оролцож байна.

Дамжааны хүрээнд аюулгүй байдал ба дипломат ажиллагаа, батлан хамгаалахын хамтын ажиллагаа, мэдээлэл боловсруулах арга зүй, хямралын үеийн шийдвэр гаргалт, хэлэлцээ хийх ур чадвар, дипломат ёс зүй зэрэг сэдвээр сургалт, хэлэлцүүлэг зохион байгуулагдах бөгөөд оролцогчдын мэргэжлийн мэдлэг, ур чадварыг дээшлүүлэх, харилцан ойлголцол, итгэлцэл, олон улсын хамтын ажиллагааг бэхжүүлэхэд чухал хувь нэмэр оруулах юм.

09/06/2026

ЗЭВСЭГТ ХҮЧНИЙ ЗАЛУУ ОФИЦЕРУУД ЧУУЛЖ БАЙНА

📌Монгол Улсын Ерөнхийлөгч, Зэвсэгт хүчний Ерөнхий командлагчийн ивээл дор хэрэгжүүлж буй “Залуу офицеруудын хөгжлийн жил” арга хэмжээний хүрээнд Зэвсэгт хүчний залуу офицеруудын “Эерэг ажлын орчин ба офицерын сэтгэл зүй” сэдэвт туршлага солилцох уулзалт, хэлэлцүүлэг 2026 оны 06 дугаар сарын 09,10-ны өдрүүдэд Зэвсэгт хүчний 311 дүгээр анги болон Сургалтын нэгдсэн төвийн байрлалд амжилттай зохион байгуулагдаж байна.

📌Арга хэмжээнд Батлан хамгаалах яам, Зэвсэгт хүчний Жанжин штаб, Төрлийн цэргийн командлал, удирдах газар, нэгтгэл, анги, салбаруудын тэргүүний 80 гаруй залуу офицерууд оролцож байна. Уулзалт, хэлэлцүүлгийн хүрээнд Монгол Улсын Ерөнхийлөгч, Зэвсэгт хүчний Ерөнхий командлагчийн нэрэмжит 2026 оны Марш-тусгай бэлтгэлийн аварга шалгаруулах цогцолбор тэмцээний гарааны өмнөх ажиллагаа, нээлтийн үйл ажиллагаатай танилцаж, “Залуу офицер-80” мод тарих арга хэмжээг зохион байгууллаа.

📌Түүнчлэн залуу офицеруудын бэлтгэсэн шилдэг найман илтгэлийг хэлэлцүүлж, алба хаагчдын хөгжил, манлайлал, ажлын орчныг сайжруулах чиглэлээр туршлага, санал санаачилгаа солилцов.

📌Тус арга хэмжээний хүрээнд залуу офицерууд Зэвсэгт хүчний Жанжин штабын даргатай хийх зангиагүй уулзалт, Чингис хааны музейгээр зочлон үндэсний түүх, төрт ёсны үнэт өв, бахархалт уламжлалтай танилцах, хамтын ажиллагаа, нөхөрлөлийг бэхжүүлэхэд чиглэсэн олон талт арга хэмжээнд оролцох юм.

📌Энэхүү уулзалт, хэлэлцүүлэг нь залуу офицеруудын дуу хоолойг сонсож, үзэл бодол, санаачилгыг бодлого, үйл ажиллагаанд тусгах, Зэвсэгт хүчний хөгжилд шинэ эрч хүч, бүтээлч оролцоог нэмэгдүүлэх чухал алхам болж байгаагаараа онцлог юм.

09/06/2026

ЗЭВСЭГТ ХҮЧНИЙ 065 ДУГААР АНГИЙН ХАРЬЯА ТУСГАЙ САЛБАРУУДЫН ЗАХИРАГЧ НАРЫН ЦУГЛАРАЛТ ЭХЭЛЛЭЭ

🔹2026 оны 06 дугаар сарын 08-ны өдөр Зэвсэгт хүчний 065 дугаар ангийн харьяа тусгай салбаруудын захирагч, албадын дарга нарын цугларалт эхэллээ.
🔹Тус цугларалтын зорилго нь 2025-2026 оны сургуулийн жилийн эхний хагас жилийн үйл ажиллагааны үр дүнг дүгнэж, штабын бэлтгэлийг дээшлүүлэх, захирагч, офицеруудын мэргэжлийн мэдлэг, ур чадварыг нэмэгдүүлэхэд чиглэж байна.
🔹Цугларалтын хүрээнд нисгэгчгүй нисэх хэрэгслийн хэрэглээ, онолын мэдлэгийг олгох сургалт, цахим залилангаас урьдчилан сэргийлэх чиглэлийн сургалтыг зохион байгуулж, өнөөгийн аюулгүй байдлын орчин, түүнтэй холбоотой эрсдэл, сорилтын талаар захирагч нарт мэдээлэл хүргэлээ.
🔹Мөн бага насны хүүхэд, гэр бүлийн хөгжлийг хамгаалах тухай хууль, хүүхэд хамгааллын асуудлаар сургалтыг зохион байгуулж, удирдах бүрэлдэхүүний эрх зүйн мэдлэгийг дээшлүүлэв.
🔹Түүнчлэн зэвсэглэл, техникийн бэлэн байдал, ашиглалт, хамгаалалтын асуудлаар “Эрдэм шинжилгээний бага хурал” зохион байгуулагдаж, шүүгчээр БХЭШХ-ийн Инноваци, дамжуулалтын төвийн дарга, доктор (Ph.D), хурандаа Ц.Дунгармаа, Агаарын цэргийн командлалын Удирдлага, төлөвлөлтийн хэлтсийн дарга, цэргийн ухааны магистр, хурандаа Ж.Одсүрэн, ҮБХИС-ийн Агаарын цэргийн тэнхимийн дарга, цэргийн ухааны магистр, хурандаа Б.Батмөнх нар ажиллалаа.
Эрдэм шинжилгээний бага хурлын дүнгээр:
🥇 Тэргүүн байрт Зэвсэгт хүчний 065 дугаар ангийн 281 дүгээр тусгай салбарын захирагчийн зэвсэг, техник хариуцсан орлогч ахлах дэслэгч Ц.Хас-Очир;
🥈 Дэд байрт 104 дүгээр тусгай салбарын мэдээ боловсруулах салааны захирагч дэслэгч Г.Бямбабат;
🥉 Гутгаар байрт 085 дугаар тусгай салбарын радиолокаторын салааны захирагч дэслэгч Г.Бямбарагчаа нар тус тус шалгарч амжилттай оролцож, эхний хоёр байрт шалгарсан офицеруудад цэргийн мэргэжлийн III зэрэг олгох батламж гардууллаа.
🔹Цугларалт энэ сарын 08-11-ний өдрүүдэд зохион байгуулагдах бөгөөд эхний өдөр шинэ мэдлэг, мэдээлэл олгосон, ажил хэрэгч, үр бүтээлтэй болж өндөрлөсөн бөгөөд захирагч, офицеруудын мэргэжлийн ур чадварыг хөгжүүлэх, харилцан туршлага солилцох, цаашдын үйл ажиллагааны үр өгөөжийг нэмэгдүүлэхэд чухал ач холбогдолтой арга хэмжээ боллоо.

Зэвсэгт хүчний Агаарын цэрэг Mongolian Air Force

15/06/2026

14/06/2026

14/06/2026

12/06/2026

12/06/2026

10/06/2026

10/06/2026

10/06/2026

09/06/2026

09/06/2026

Address

Website

Alerts

Shortcuts

Share

Category