02/05/2026
‼️‼️
ХРИСТИЙН МОНГОЛ НОМЛОГЧИД ХЯТАДЫН ШОРОНД ХОРИГДОЖ БАЙСНАА НУУДАГ!
Хятад пастор Зин Шаожий /Zhang Shaojie/ 12 жил шоронд хоригдсоны эцэст суллагдлаа. Түүний “хийсэн хэрэг” нь хүчирхийлэл, луйвар, хулгай эсвэл хүн амины хэрэг биш. Харин бүртгэлгүй, гэр чуулганыг удирдаж, христ, библийг сурталчилсан хэргээр 2013 онд анх хоригджээ. Хятадын Ардын шүүхээс Зин Шаожийг “Сайн мэдээ” тарааж, Христийн шашныг хууль бусаар сурталчилсан хэрэгт 12 жилийн хорих ял ноогдуулжээ. Зин пасторын хууль бусаар байгуулсан чуулган нь хурдацтай өсөж, түүнд олон хүн христийн итгэгчээр нэгдэж байсан нь шүүхээс олон жил торны цаана суух үндэслэл болсон байдаг. Арван хоёр жил гэдэг урт хугацаа. Бүхнийг дахин тунгаахад, засарч хүмүүжихэд хангалттай урт хугацаа. Гэвч Зин Шаожий нь шоронд “Ардын бурхан” нэр авч хоригдол хүмүүст христийн “Сайн мэдээ”-г тарааж, олон зуун дагалдагчид, итгэгчдийг араасаа дагуулжээ. Үүнээс болж Зин пасторыг гурван удаа чанга дэглэмтэй шоронд шилжүүлж байсан ч тэрбээр христийн итгэлээсээ хэзээ ухраагүй гэнэ. Тэрбээр хоригдлуудад тэсвэр, тэвчээр, найдвар итгэл, хайрын тухай номлосоор өнгөрсөн 2025 оны сүүлээр эрх чөлөөт амьдралд эргэн иржээ. Зин пастор шиг Хятадад зөвшөөрөлгүй христийн сайн мэдээ тарааж яваад цагдаа нарт баригдаж, шоронгийн хаалга татсан Монголын олон арван номлогч, итгэгчид байдаг. Хятадын шоронд хоригдсон монгол хүн гэхээр л бид эрүүгийн гэмт хэрэг үйлдсэн, хар тамхи зөөсөн, зарсан хүмүүсийн тухай боддог. Тэгвэл Христийн итгэгчид Хятадад баривчлагдаж, эрүүдэн шүүлт, тамлал амсаж, мөн шорон, гянданд хоригдож байгаа олон баримт бий. Цаст Түвдэд “Сайн мэдээ” тарааж явсан христийн номлогч Батбаяр гэх залууг түвдүүд “Буруу номын бүрэлвээ” хэмээн дарамталж, зодож гэмтээсэн бол Шинжаан уйгарт “Библи” тарааж яваад ор сураггүй алга болсон монгол бүсгүй ч байна. Хөх хотод гэр цуглаан байгуулан христийн урсгалыг сурталчилж явсан Дашням гэх номлогч залуу 2017 онд баривчлагдаж, 5 жилийн хорих ялаар шийтгүүлэв. Дашням орон нутагт өвөр монгол хүмүүст христийн сүмд номлол хийснийхээ төлөө Хятадын мөрдөнд тамлуулж байсан тухайгаа ярьжээ. Дашнямын гар хөлийг хөдөлгөөнгүй хүлээд толгой дээр нь устай сав байруулуулан, савны доод хэсгийг зүүгээр цоолов. Цоолсон савны ус түүний дагзан дээр тусна. Эхэндээ юу ч мэдрэгдэхгүй ч, удаан хугацааны дараа усны дусал түүний дагз, мэдрэлийн системийг цочроон асар их өвдөлт мэдрүүлдэг. Усны ганц дусал бүр толгой руу нь 1 кг туухайгаар цохиж байгаа мэт өвддөг тухай тэрбээр ярьсан байна. Хятадын цагдаа түүнээс “Хэнээс даалгавар авч ирсэн. Хэн хэнийг сүмдээ элслүүлсэн бэ?” хэмээн байцааж, нэр усыг нь хэлэхийг шаарджээ. Гэвч Дашням өөрийн гэр цуглааны гишүүдийнхээ нэрийг хэлэлгүй тэвчиж чадсан гэнэ. “Сайн мэдээ” тарааж яваад энэ мэт хятадын мөрдөн, шоронд тамлуулсан итгэгчид олон байдаг ч тэд энэ талаар нийгэмд ярихаас эмзэглэдэг. Учир нь нэгэнт тус улсын хуулийг мэдсээр байж зөрчсөн учраас тэр биз ээ.
Хятадад харийн шашин зөвшөөрөлгүй сурталчилах нь хуулиар хориглодог бөгөөд эрүүгийн хуулинд тэнсэн харгалзах ялгүй, 3-15 жилийн ялаар шийтгүүлдэг. Харин шашны гаж урсгал, терроризм, үймээн самуунд бусдыг уриалан дуудсан бол 15-20 жилийн хорих ял, цаазын ялтай байдаг ажээ. Гэвч манай христийн сүмүүдээс Хятадад очиж “Сайн мэдээ” тараах итгэл үнэмшилтэй залуус олон арваараа дугаарлаж байна. Тэд хятадын хатуу чанга хуулиас илүү бурханы хуулийг биелүүлэх чин хүсэлтэй гэнэ шүү.
