17/06/2026
رویټرز په یو تحلیلي راپور کې له ایران سره په جګړه کې د ډونالډ ټرمپ د اعلان شویو موخو او د هغوی د پوره کېدو کچه څېړلې ده.
د سرخط د راپور له مخې او د رویټرز په حواله، د امریکا ارزونې ښيي چې په وروستۍ جګړه کې د اسلامي جمهوري د توغندیزو، ډرون او دودیزو پوځي وړتیاوو لویه برخه زیانمنه شوې ده، خو د واشنګټن اصلي موخې لا تر اوسه په بشپړه توګه نه دي ترلاسه شوې.
د دغه راپور پر بنسټ، امریکا ادعا کوي چې د ایران په زرګونو توغندي او ډرون الوتکې ویجاړ شوي یا له عملیاتي دورې څخه ایستل شوي او د اسلامي جمهوري د دفاعي او سمندري سیسټمونو لویه برخه هم په نښه شوې ده.
له دې سره سره، د اتومي انرژۍ دوسیه لا هم بې برخلیکه پاتې ده. رویټرز لیکي چې د امریکا استخباراتي اټکلونه ښيي چې اتومي وسلو ته د لاسرسي لپاره د ایران اړین وخت د جګړې د مخکې په پرتله کوم د پام وړ بدلون نه دی کړی او دا موضوع اوس د دواړو لوریو ترمنځ د خبرو اترو په اصلي محور بدله شوې ده.
د راپور په یوه بله برخه کې راغلي چې په سیمه کې د اسلامي جمهوري دولت د متحدو ډلو نفوذ او عملیاتي ځواک کم شوی، خو تهران لا هم د دغو ډلو ملاتړ کوي او په دې برخه کې د محدودیتونو منلو ته چمتو شوی نه دی.
رویټرز دغه راز لیکي چې د ټرمپ یو له لومړنیو موخو څخه په ایران کې د چلند بدلون یا حتی د واک د جوړښت بدلول وو، خو اسلامي جمهوري دولت لا هم په واک کې پاتې دی او دا موخه هم په بشپړه توګه نه ده ترلاسه شوې.
په ټوله کې، د دې راپور پایله دا ده، چې امریکا د اسلامي جمهوري دولت د پوځي ځواک په کمزوري کولو کې لاسته راوړنې لرلې دي، خو د اتومي دوسیې، د تهران د سیمه ییز نفوذ او خپلو اوږدمهالو سیاسي موخو په برخه کې لا هم وروستۍ پایلې ته نه ده رسېدلې.
Sarkhat #سرخط
