01/01/2026
کوہستان کے عوام کو لاوارث نہیں چھوڑیں گے، حق ملنے تک جدوجہد جاری رہے گی: ملک سربلند خان
حکومت مطالبات مانے ورنہ کراچی پریس کلب پر بھرپور احتجاج ہوگا، سابق رکن اسمبلی کی وارننگ
کراچی ( اسٹاف رپورٹر) کوہستان ویلفیئر آرگنائزیشن کے چیئرمین اور سابقہ حقیقی رکن سندھ اسمبلی ملک سربلند خان نے کہا ہے کہ کوہستان کے عوام اپنے بنیادی انسانی حقوق، صحت، تعلیم اور رابطہ سڑکوں سے آج بھی محروم ہیں، جو اس جدید دور میں سراسر ظلم ہے۔ ان خیالات کا اظہار انہوں نے عثمان غنی محلہ عبدالرحمن میں کوہستانی فضل خان بن کھٹری کی میزبانی میں منعقدہ ایک اہم مشاورتی اجلاس سے خطاب کرتے ہوئے کیا۔
مظاہرین سے اظہارِ یکجہتی ملک سربلند خان کی صدارت میں ہونے والے اس اجلاس میں رنولیہ اور کنڈیا کے مظاہرین سے مکمل اظہارِ یکجہتی کیا گیا۔ انہوں نے کہا کہ کوہستان کے مظلوم عوام کئی دنوں سے شدید سرد موسم میں سڑکوں پر بیٹھے ہیں، لیکن حکومت کی بے حسی افسوسناک ہے۔ انہوں نے واضح کیا کہ رنولیہ اور کنڈیا کے عوام خود کو تنہا نہ سمجھیں، پوری برادری ان کے پیچھے کھڑی ہے۔
حکومت کو الٹی میٹم اجلاس میں متفقہ طور پر فیصلہ کیا گیا کہ اگر حکومت نے 28 دسمبر تک کوہستان کے عوام کے جائز مطالبات تسلیم نہ کیے اور سڑکوں کی تعمیر سمیت اسپتالوں و تعلیمی اداروں کی بحالی کا اعلان نہ کیا، تو اتوار 4 جنوری کو سہ پہر 3 بجے کراچی پریس کلب پر ایک عظیم الشان احتجاجی مظاہرہ کیا جائے گا۔
