24/04/2022
NIC❤️D
شهدادڪوٽ
شهدادڪوٽ جي گهرج
NIC❤️D شهدادڪوٽ
عمير سولنگي ........
انگن اکرن جي مطابق دل جي مختلف بيمارين جو سبب پاڪستان ۾ تقريبن ساڍا ٽي لک ماڻهو ساليانو موت جو شڪار بڻجن ٿا. جڏهن ته هڪ ڏهائي ٻارن کي مستقبل ۾ دل جي مرض کي منهن ڏيڻو پوندو. دل جي مرض جي بنيادي نشانيءَ ۾ سيني، خاص طور تي ٻانهن ۾ سور، ساهه کڻڻ ۾ مشڪل، مٿي کي چڪر اچڻ، دل جي ڌڙڪڻ جو تيز ٿيڻ وغيره شامل آهن. جيڪڏهن ڪنهن ماڻهوءَ ۾ هي نشانيون ظاهر ٿين ته جلدي سڃاڻپ کان پرهيز نه ڪريو. هڪ تحقيق جي مطابق عورتن ۾ دل جي مرض جي شروعات چيلهه ۽ ڪنڌ جي سور کان ٿئي ٿي. جڏهن ته مردن ۾ سيني کان سور شروع ٿي ساڄي ٻانهن تائين ڦهلجي ويندو آهي. عورتن جي نسبت مردن ۾ هن سور جي شدت گهڻي ملندي آهي. جيڪڏهن بنا ڪنهن سبب جي چڪر اچڻ، الٽي ٿئي يا جسماني محنت کان پوءِ ٿڪا وٽ جو احساس ٿئي، ته هي ان ڳالهه جي واضح نشاني آهي ته اوهان جي دل صحيح طريقي سان پنهنجو ڪم سرانجام نه ڏئي رهيو آهي. صحت مند دل جو تعلق مرد يا عورت جي عمر سان هوندو آهي. جيتوڻيڪ هر عمر جي لحاظ سان دل جو خيال رکڻ گهرجي.
هن قانون ۾ ڪجهه اهم ڳالهيون اهي آهن ته سٺي خوراڪ جو استعمال،
باقاعدگي سان هلڪي ڦلڪي ورزش ۽ معمولي طريقي سان زندگي گذارڻ گهرجي.
دل جي سٺي صحت جي لاءِ سمهڻ، جاڳڻ جي وقت جي پابنديءَ کان علاوه سٺي سوچ رکڻ به ضروري آهي. دل جي مرض جو سبب جنهن کي “ رسڪ فيڪٽرس” به چوندا آهن. رت جو دٻاءُ شگر ڪوليسٽرول جو وڌڻ، سگريٽ پيئڻ ورزش جي گهٽتائي، ذهني دٻاءُ وغيره شامل آهن.
پر افسوس جو اسان جي ايڏي وڏي شهر ۾ دل جي بيمارين جو ڪو به خاص علاج نہ ٿو ڪيو وڃي ، اُھو مرض جيڪو اڄ ڪالهه هر اِنسان اُن جي خطري ۾ آهي ، اُن لاءِ ڪو به ادارو يا ڊاڪٽر ڪونهي .........
چيو وڃي ٿو ته اسان آزاد آھيون ، اسان جدوجھد ڪري آزادي ورتي آهي , اُن ڪري عوام آزاديءَ مان فائدو وٺي رھيو آھي ، پر مونکي اهي سڀِ دعوائون ڪوڙيون ،ٻٽاڪون ، فريب لڳنديون آهن ،
اڄ اسان جي مِلڪ تي اھڙن ماڻھن جي حڪومت آهي جيڪي نه اسلام کان واقف آهين نه ئي وري انسانيت کان ، اڄ 21 صدي عيسويءَ هلي رھي آھي ، دُنيا چنڊ ،مريخ تي پهچي وئي آهي ، اسان وٽ ترقي بيل گاڏي جي رفتار کان به سست پئي هلي .
جتي دُنيا ۾ انسانن جو علاج جديد مشينن سان پيو ٿئي ته اُتي اسين بنيادي صحت جي سھولت کان به محروم آھيون ،
انسان جي زندگي ڪيتري قيمتي آهي ؟
اُهو سوال اُنھن ماڻھن کان پڇو جن پنهنجن پيارن کي سرڪاري اسپتالن ۾ بنا دوا جي سهولت جي تڙپندي ڏٺو .جن تڙپي تڙپي ساهه ڏﻧﻮ . ۽ هو پنهنجن پيارن جا لاش کڻي آيا ،
اسان جو شھر شهدادڪوٽ جيڪو لکن کان مٿي جي آبادي تي مشتمل وسيع شھر آھي اتي صحت جي ڪا به سهولت نه هجڻ جي برابر آهي ، خاص ڪري دل جي مرض جي جيڪو اڄ ڪالهه عام جام آهي .
اللهِ پاڪ هر اِنسان کي پنهنجي حفظ امان ۾ رکي ،
اگر ڪنهن کي ايمرجنسي جي حالت ۾ دل جو دورو ٿو پئي يا ڪو حادثو ٿو ٿِئَي ته ھُن کي وڏي شھر موڪليو ٿو وڃي جيڪو گهٽ ۾ گهٽ به ڪلاڪ جو فاصلو آھي ، اُهو هِڪُ ڪلاڪ مريض زندگي موت جي سخت ڪشمڪش ۾ تڙپندو رهندو آهي جتي ھُن لاءِ هِڪَ هِڪُ منٽ تمام قيمتي ھوندو آھي ، الائي ڪيترا شھر واسي وقت سر طبيعي امداد نه ملڻ ڪري زندگي جي جنگ هارائي ويا ،
الائي ڪيترين دلين مايوس ٿي ڌڙڪڻ ڇڏي ڏنو ....
هر ڏينھن وڌندڙ مهانگائي ، بيروزگاري ، بُک ، اِنسان جي اھڙي تہ حالت خراب ڪري ڇڏي آهي جو انسان ڪنهن ڪنهن سان منھن ڏئي ؟
پيٽ جي باھ وسائي ؟
ٻچڙن کي تعليم ڏئي ؟
يا پنهنجي ٿڪل يا اوجاڳيل اکين ۾ زندگي جا حسين خواب ڏسي ؟
غير معياري کاڌا ، گندگي ماحول جي آلودگي ايترين ته بيمارين کي جنم ڏنو آهي جو هر انسان ڪنهن نه ڪنهن مرض ۾ ضرور مبتلا آهي ، آءٌ حڪومت کي گذارش ڪندس ته ھِن سنگين مسئلي تي ڌيان ڏين ، ۽ وس وارن کي به اپيل ڪندس ته گڏجي پنهنجي شھر جي ڀلائي ڪو بھترين ادارو ٺاهين تہ جيئين غريب مسڪينن ماڻھن کي ڪُجھ رليف ملي ، انساني زندگين سان جيڪو وڏين اسپتالن ۾ مذاق ٿو ٿِئَي تہ اُن کان هو بچي وڃن .....
هر انسان جي دل آزاديءَ سان ڌڙڪي جنهن تي ڪو به دٻاءُ نه هُجي .....
هِڪُ خوش ، صحتمند دل صحتمند انسان رکندي آهي ،
آءٌ اها اميد رکان ٿو ته جلدي شھدادڪوٽ شهر کي دل جي بيمارين جو ڪوئي بهترين ادارو ملي ويندو ،
منهنجي آس اِھا ڪڏهن ڪرائيندي ڪوٽ کي .........
