15/03/2026
سکھر (رپورٹ ارشاد ڈنڈھن) میونسپل کمیٹی روہڑی میں انتظامی بے ضابطگیوں اور کرپشن کے سنگین الزامات سامنے آ گئے ہیں، جہاں مبینہ طور پر پوری میونسپل آفس ایک ٹھیکیدار کے حوالے ہونے کی باتیں گردش کر رہی ہیں۔ ذرائع کے مطابق میونسپل کمیٹی روہڑی میں عمران نامی ٹھیکیدار کا اثر و رسوخ اس قدر بڑھ چکا ہے کہ اکاؤنٹ آفیسر، آفس سپریڈینٹ اور سی ایم او بھی اس کے رحم و کرم پر ہیں۔ ذرائع کا کہنا ہے کہ میونسپل کمیٹی میں روزانہ دس لاکھ روپے سے زائد کرپشن ہونے کے بھی الزامات لگائے جا رہے ہیں، جبکہ ترقیاتی کاموں اور دیگر معاملات میں بھی ٹھیکیدار کا اثر و رسوخ نمایاں نظر آ رہا ہے۔ دوسری جانب منتخب چیئرمین کے بارے میں بھی کہا جا رہا ہے کہ انہوں نے میونسپل آفس میں بیٹھنا چھوڑ دیا ہے اور مبینہ طور پر اپنے ذاتی بنگلے سے ہی میونسپل معاملات چلا رہے ہیں۔ ذرائع کے مطابق چیئرمین کو ذاتی رہائش گاہ پر بیٹھ کر کروڑوں روپے کے بلوں پر آنکھیں بند کر کے دستخط کرنے کے اختیارات حاصل ہیں، جس کے باعث ادارے کی شفافیت پر سوالات اٹھ رہے ہیں۔ جبکہ منتخب وارڈ کونسلرز کا کہنا ہے کہ وہ بلا قصور بدنام ہو رہے ہیں جبکہ اصل فیصلے اور اختیارات چند مخصوص افراد کے ہاتھوں میں ہیں۔ اس صورتحال کے باعث کئی ملازمین کو سالانہ انکریمنٹ اور ڈیفرنس بھی نہیں دیا جا رہا اور صرف سفارشی ملازمین کے کام کیے جا رہے ہیں۔
ذرائع کے مطابق 2018 میں نوکری سے فارغ کیے گئے دو سو سے زائد لوئر اسٹاف میں سے چند ملازمین کو 2022 میں دوبارہ بھرتی کر کے ایک سال بعد سالڈ ویسٹ کے حوالے کر دیا گیا، جبکہ ان ملازمین کی جگہ سفید پوش بھنگیوں کو نوکری پر رکھا گیا جن کی تنخواہوں کے بل مبینہ طور پر عمران ٹھیکیدار کے نام پر بنائے جاتے ہیں، اور بعد ازاں لاکھوں روپے سفید پوش سینیٹری ورکرز سمیت بعض افسران کی جیبوں میں چلے جاتے ہیں۔ اسی طرح مشینری کی مرمت اور تیل کی خریداری میں بھی کروڑوں روپے کے بل بنائے جانے کے الزامات ہیں۔ ذرائع کا مزید کہنا ہے کہ میونسپل افسران، ملازمین، سیاسی بااثر افراد اور من پسند لوگوں میں ہر ماہ لاکھوں روپے کے پیٹرول کی بھی مبینہ طور پر تقسیم کی جاتی ہے۔ نتیجتاً سات کروڑ روپے سے زائد ماہانہ بجٹ، دکانوں کے کرائے اور ٹیکسوں سے حاصل ہونے والی رقم کے باوجود میونسپل کمیٹی روہڑی کی جانب سے شہر میں معیاری ترقیاتی کام نظر نہیں آ رہے۔ روہڑی کے شہریوں اور سماجی حلقوں نے سندھ حکومت اور متعلقہ حکام سے مطالبہ کیا ہے کہ میونسپل کمیٹی روہڑی میں مبینہ کرپشن اور انتظامی بے ضابطگیوں کا نوٹس لے کر شفاف تحقیقات کرائی جائیں تاکہ اصل حقائق سامنے آ سکیں۔
