18/06/2026
تعارفی سلسلہ: نگہبان آرفن ایج ہوم تلہ گنگ (خواتین ونگ)
پیشکش: میڈیا سیل نگہبان تلہ گنگ
(میڈم ساجدہ نسرین، میڈم زاہدہ صاحبہ، میڈم نگہت سلطانہ صاحبہ، میڈم نائمہ عدیل صاحبہ)
کسی بھی معاشرے کی اصل خوبصورتی اور بقا اس کے فلاحی اداروں اور ان کے پیچھے کارفرما مخلص دلوں سے ہوتی ہے۔ نگہبان آرفن ایج ہوم تلہ گنگ دھرتی کا وہ واحد اور معتبر ادارہ ہے جو یتیم اور بے سہارا بچوں کی کفالت، تعلیم و تربیت، فری رہائش، صحت بخش غذا، لباس اور دیگر صحت مندانہ سرگرمیوں کو ایک باقاعدہ اور منظم شیڈول کے تحت یقینی بنا رہا ہے۔ ان تمام سنگین اور اہم امور کو احسن طریقے سے سرانجام دینے کے لیے جہاں مادی وسائل درکار ہوتے ہیں، وہاں تلہ گنگ دھرتی کی عظیم اور غیور بیٹیاں مردوں کے شانہ بشانہ اپنا بھرپور اور کلیدی کردار ادا کر رہی ہیں۔ یہ معزز خواتین اس خوبصورت گلدستے کے وہ مہکتے ہوئے پھول ہیں جو ہمہ وقت مستحق، یتیم اور نادار لوگوں کی زندگیوں میں رنگ بھرنے کا سوچتی ہیں۔ آئیے! آج نگہبان تلہ گنگ کے خواتین ونگ کی چند انمول شخصیات کا تعارف کرواتے ہیں جن کا وجود اس گلستان کے لیے کسی نعمت سے کم نہیں۔
اس کارِ خیر میں سب سے پہلے ذکرِ خیر لازم ہے میڈم ساجدہ نسرین صاحبہ کا، جو اس ادارے کے اولین ستونوں اور بانی ممبران میں سے ایک ہیں۔ آپ گورنمنٹ گرلز ہائی سکول دودیال کی سابقہ انچارج پرنسپل ہیں اور اب ایک باوقار ریٹائرڈ زندگی گزار رہی ہیں۔ آپ کی شخصیت کا سب سے روشن پہلو یہ ہے کہ آپ کی ڈکشنری میں "نہ" کا لفظ شامل ہی نہیں ہے اور اللہ کے فضل سے کوئی بھی سائل یا ضرورت مند آپ کے در سے کبھی خالی ہاتھ نہیں لوٹا۔ وسائل ہوں یا نہ ہوں، آپ کسی نہ کسی صورت دکھی انسانیت کا مداوا کر ہی دیتی ہیں۔ آپ پچھلے تین سالوں سے سوشل ویلفیئر کونسل تلہ گنگ کی ایگزیکٹو ممبر کی حیثیت سے مستحق خاندانوں کو ماہانہ راشن کی فراہمی میں مصروفِ عمل ہیں، جبکہ نگہبان کی تعمیر اور بچوں کی فلاح کے لیے آپ کے ریگولر عطیات نے ہمیشہ بنیادی کردار ادا کیا ہے۔ خود ایک مخلص ماہرِ تعلیم ہونے کے ناطے آپ کی شدید خواہش ہے کہ نگہبان کے بچے جدید علوم سے آراستہ ہو کر ملک و قوم کا نام روشن کریں اور یقیناً ایک دن آپ کا یہ خواب ضرور شرمندہ تعبیر ہوگا۔ قدرت نے آپ کو نیک اور قابل اولاد سے بھی نوازا ہے؛ آپ کی ایک بیٹی میڈیکل کی تعلیم حاصل کر رہی ہے، دوسری بیٹی بی ایس کے آخری مراحل میں ہے اور بیٹا بیرونِ ملک برسرِ روزگار ہے۔ اللہ تعالیٰ میڈم ساجدہ نسرین صاحبہ اور ان کے تمام فیملی ممبران کو دنیا و آخرت میں سرخرو فرمائے اور صحت و عافیت والی لمبی زندگی عطا کرے۔
میڈم زاہدہ صاحبہ
اس معزز فہرست میں دوسرا نام میڈم زاہدہ صاحبہ کا ہے، جو روشن خیالی، دانش اور خدمت کا استعارہ ہیں۔ آپ کا تعلق تلہ گنگ کے ایک ایسے معزز اور اعلیٰ تعلیم یافتہ خاندان سے ہے جس نے ملکی سطح پر گراں قدر خدمات سرانجام دی ہیں۔ آپ خود بھی سابقہ اسسٹنٹ ایجوکیشن آفیسر (AEO) رہی ہیں اور کچھ عرصے سے نگہبان اور سوشل ویلفیئر کونسل تلہ گنگ کے مشاورتی بورڈ کا ایک اہم اور فعال حصہ بن کر اس کارِ فلاح سے جڑی ہیں۔ آپ کے بھائی ملک تنویر احمد صاحب (ریٹائرڈ کمشنر کسٹم) کسی تعارف کے محتاج نہیں اور وہ ریٹائرمنٹ کے بعد بھی فروغِ تعلیم کے لیے کوشاں ہیں۔ اپنے بھائی کے نقشِ قدم پر چلتے ہوئے میڈم زاہدہ صاحبہ بھی فلاحی سرگرمیوں میں بڑھ چڑھ کر حصہ لیتی ہیں۔ قدرت نے آپ کی گود کو بھی لائق اولاد سے بھرا ہے، آپ کا ایک بیٹا سعودی عرب میں مقیم ہے جبکہ دوسرا بیٹا میڈیکل کی تعلیم مکمل کرنے کے بعد راولپنڈی کے ایک ہسپتال میں بطور ڈاکٹر دکھی انسانیت کے زخموں پر مرہم رکھ رہا ہے۔ نگہبان تلہ گنگ کے لیے میڈم زاہدہ صاحبہ اور ان کی فیملی کی مخلصانہ خدمات کو ہم سلام پیش کرتے ہیں اور دعاگو ہیں کہ پاک پروردگار انہیں اور ان کے اہل خانہ کو ہمیشہ اپنے حفظ و امان میں رکھے۔
میڈم نگہت سلطانہ صاحبہ
تلہ گنگ کی فلاحی تاریخ اس بیٹی کے ذکر کے بغیر ادھوری ہے جو سات سمندر پار دیارِ غیر میں رہنے کے باوجود اپنی مٹی کی خوشبو کو نہیں بھولیں۔ ہم بات کر رہے ہیں میڈم نگہت سلطانہ صاحبہ کی، جو تلہ گنگ کی معروف اور معزز (اگرال) فیملی کی قابلِ فخر بیٹی ہیں اور انگلینڈ میں مقیم ہیں۔ انگلینڈ جیسے مغربی معاشرے میں رہتے ہوئے بھی آپ نے اپنا کلچر، اپنی زبان اور اپنی مشرقی اقدار کو نہ صرف زندہ رکھا بلکہ اپنی اولاد کی رگوں میں بھی اپنی مٹی کا پیار اتارا۔ آپ کے شوہر ملک افتخار اگرال صاحب آکسفورڈ یونیورسٹی میں شعبہ تعلیم و تدریس سے وابستہ ہیں اور ایک بہترین ماہرِ تجزیہ کار ہیں۔ حال ہی میں میڈم نگہت سلطانہ نے واٹس ایپ کے ذریعے رابطہ کر کے نگہبان تلہ گنگ کے بچوں کے روشن مستقبل کے لیے نہ صرف گہرے عزم کا اظہار کیا، بلکہ انتظامی امور میں رہنمائی کی پیشکش کرتے ہوئے تعمیراتی کام کے لیے ایک خطیر عطیہ بھی پیش کیا۔ ہمارے یہ بیٹے اور بیٹیاں جو بیرونِ ملک رہ کر بھی اپنی مٹی کا قرض ادا کرنے کی فکر میں رہتے ہیں، وہ ہمارا حقیقی اثاثہ ہیں۔ اللہ پاک اس محبِ وطن فیملی پر اپنی خاص رحمتیں نازل فرمائے تاکہ دکھی انسانیت ان کے تعاون سے مستفید ہوتی رہے۔
میڈم نائمہ عدیل صاحبہ
آج اس تعارفی سلسلے کے آخر میں میڈم نائمہ عدیل صاحبہ کا ذکر بھی انتہائی ضروری ہے، کیونکہ جب تک فلاح و بہبود کا یہ کارواں جاری رہے گا، ہماری ان تمام ماؤں اور بہنوں کا ذکر تاریخ کے اوراق میں سنہری حروف سے ملتا رہے گا۔ آپ نے ملک نصیر احمد ہستال کی بیٹی ہیں اور درد دل رکھنے والی خاتون ہیں جس نے اپنے والدین کو ہمدردی اور خدمت خلق کا جذبہ ورثہ میں ملا۔ نگہبان آرفن ایج ہوم کی اولین ممبر ہونے کے ناطے آپ نے ہر ممکن اپنا تعاون پیش کیا اور ہر مشکل گھڑی میں ادارے کا ساتھ دیا۔ بچوں کی تربیت کے لیے اپنا قیمتی وقت وقف کرنا اور کسی بھی غیر معمولی صورتحال میں "ہراول دستے" کا حصہ بن کر سب سے آگے کھڑے ہونا آپ کی چند منفرد خوبیوں میں سے ایک ہے۔ آپ کے شوہر ملک عدیل صادق صاحب بیرونِ ملک اپنے ذاتی کاروبار کے سلسلہ میں مقیم ہیں، لیکن آپ کی بہترین ترغیب اور رہنمائی کی بدولت وہ بھی کارِ خیر اور فلاحی کاموں میں ہمیشہ پہل کرنے والوں میں شامل رہتے ہیں۔
نگہبان تلہ گنگ کا میڈیا سیل ان تمام ماؤں اور بہنوں کی عظمت اور بے لوث خدمات کو دل کی گہرائیوں سے سلام پیش کرتا ہے۔ دعا ہے کہ اللہ رب العزت ان تمام معزز ممبران، ان کے بچوں اور ان کے خاندانوں کی حفاظت فرمائے، انہیں صحت و تندرستی سے نوازے اور ان کا سایہ خاندان کے سروں پر سلامت رکھے۔ آمین یا رب العالمین!
