31/12/2025
ٹوبہ ٹیک سنگھ (محمد آصف حسین رانا سے) ضلع ٹوبہ ٹیک سنگھ پولیس کی سالانہ کارکردگی رپورٹ کے مطابق سال 2025ء کے دوران ضلع بھر میں مجموعی طور پر 14876 مقدمات درج کیے گئے، جن میں 13761 ملزمان کو گرفتار کر کے 37 کروڑ روپے سے زائد مالیت کی ریکوری عمل میں لائی گئی، ضلع بھر میں 1331 اشتہاری مجرمان گرفتار کیے گئے جبکہ 225 عدالتی مفروران کو بھی پابندِ سلاسل کیا گیا، ناجائز اسلحہ کے خلاف کارروائی کرتے ہوئے 526 مقدمات درج کیے گئے اور اتنی ہی تعداد میں ملزمان کو گرفتار کر کے ان کے قبضے سے 55 بندوقیں، 15 کلاشنکوف، 19 رائفلیں، 431 پسٹل، 4 ریوالور اور 1301 راؤنڈ برآمد کیے گئے، منشیات کے خلاف 540 مقدمات درج کر کے ملزمان کے قبضے سے 8 من 14 کلوگرام چرس، 28 کلو 647 گرام ہیروئن، 16590 لیٹر شراب، 21 چالو بھٹیاں، 2721 لیٹر لاہن اور 1 کلو 79 گرام آئس برآمد کی گئی، ٹوبہ ٹیک سنگھ پولیس نے سال 2025ء کے دوران 408 مقدمات میں ملوث 54 گینگز کے 167 ارکان کو گرفتار کیا جن کے قبضے سے 23 گائیں، 187 بکرے بکریاں، 65 موٹر سائیکلیں، 24 موبائل فون، 26 پسٹل، 88 گولیاں، گھریلو سامان اور نقدی برآمد ہوئی، نیشنل ایکشن پلان کے تحت ضلع بھر میں 679 مقدمات درج کیے گئے، ڈسٹرکٹ پولیس آفیسر ٹوبہ ٹیک سنگھ عبادت نثار کے احکامات پر سال 2025ء کے دوران 4503 سرچ آپریشنز کے دوران 116228 افراد کی تصدیق کی گئی، سال 2024ء کے مقابلے میں سال 2025ء کے دوران قتل کے مقدمات میں 25 فیصد، ڈکیتی رابری معہ قتل میں 75 فیصد، ڈکیتی میں 80 فیصد، رابری میں 40 فیصد، سرقہ موٹر وہیکل میں 15 فیصد، وہیکل چھیننے میں 31 فیصد کمی واقع ہوئی جبکہ اشتہاری مجرمان کی گرفتاری میں 107 فیصد اضافہ ریکارڈ کیا گیا، ترجمان ٹوبہ ٹیک سنگھ پولیس کے مطابق عوام کے جان و مال کے تحفظ اور جرائم کے خاتمے کے لیے اقدامات کا سلسلہ تسلسل کے ساتھ جاری رکھا جا رہا ہے۔
