17/09/2026
لو شلنا من سيرتك كل الشهادات والمسميات… أنت بتضيف شنو؟
خلينا نجرب حاجة بسيطة.
تخيّل إننا شلنا من سيرتك الذاتية:
الشهادات
المسميات الوظيفية
عدد سنوات الخبرة
وأسماء الجهات الاشتغلت معاها.
وبعدين سألتك :
طيب … إنت بتضيف شنو؟
ممكن تلقى نفسك محتار شوية.
وده طبيعي، لأننا اتعودنا نعرّف نفسنا بالحاجات البنعملها
" أنا Marketing Specialist."
"أنا عندي شهادة في كذا."
"اشتغلت 3 سنين في المجال ده."
لكن دي بتقولينا إنت عملت شنو …
ما بالضرورة بتقول إنت بتضيف شنو.
خلينا ناخد مثال:
زول شغال في كتابة المحتوى.
ممكن يقول:
" أنا Content Writer وعندي خبرة 3 سنوات. "
طيب .. كويس.
لكن لو سألناه :
" شنو القيمة البتقدمها من خلال كتابة المحتوى؟ "
ممكن تكون إجابته :
" بساعد الشركات توصل رسالتها للناس بطريقة واضحة، وأحوّل المعلومات المعقدة لمحتوى سهل ومقنع. "
هنا بدأنا نفهم الفرق.
المسمى قال لينا إنت شنو.
لكن القيمة بتورينا إنت بتعمل شنو للناس أو للشغل.
وعشان تعرف قيمتك، ما محتاج تخترع كلام كبير عن نفسك.
ارجع لشغلك واسأل:
شنو المشكلة البحلّها؟
شنو الحاجة البسهّلها؟
شنو الحاجة البقدر أعملها بصورة كويسة؟
ولمن أعملها، شنو البتغيّر؟
مثلاً:
بدل ما تقول :
"عندي مهارة في إعداد العروض التقديمية."
جرّب تقول:
"ببسّط المعلومات وبرتبها في عروض تخلي الفكرة أسهل للفهم."
هنا المهارة بقت عندها قيمة واضحة.
جرّب التمرين ده:
اختار مهارة واحدة عندك، وكمل الجملة:
أنا بساعد ............. على ........... من خلال .......... .
ما تستعجل في الإجابة.
لأن معرفة قيمتك ما بتبدأ من سؤال:
"أنا شاطر في شنو؟"
أحيانًا السؤال الأهم هو:
"الشطارة دي بتفيد منو؟ وبتفيدو كيف؟"
📌 اكتب إجابتك للجملة دي في التعليقات، حتى لو لسه ما وصلت للصياغة نهائية.
