23/06/2026
Marka laga reebo Puntland oo muddo ku dhow soddon sano jirta, Galmudug waxay maanta noqotay mid ka mid ah maamullada ugu horreeya Soomaaliya marka laga hadlayo dhinacyada horumarka, xasilloonida iyo dhismaha hay’adaha dowladda. Guulahaas, Alle ka sokow, waxaa door weyn ku leh Madaxweynaha Galmudug, Mudane Axmed Cabdi Kaariye (Qoor Qoor).
Maanta, Galmudug waxaa suurtagal ah in baabuur lagu maro inta u dhexeysa Matabaan iyo Gaalkacyo iyadoo aan la dareemayn cabsi amni oo weyn, isla markaana aan loo baahnayn waardiyayaal ama ilaalo gaar ah oo ku wehelisa safarka. Tani waa isbeddel weyn marka loo eego xaaladihii amni iyo kala qaybsanaanta ee deegaannadaasi h**e u soo mareen.
Sidoo kale, Galmudug waxay hirgelisay nidaam canshuureed oo mideysan, waxayna leedahay wasaarado badan oo ku shaqeeya xarumo dowladeed oo casri ah oo si wanaagsan loo dhisay. Waxaa socda mashaariic muhiim ah oo ay ka mid yihiin ballaarinta iyo dhismaha garoonka diyaaradaha, dhismaha waddooyin laami ah oo casri ah, iyo sameynta marinnada biyaha roobka si looga hortago fatahaadaha xilliyada roobka.
Dhanka kale, maamulka ayaa xoogga saaray dib-u-heshiisiinta bulshada, xoojinta wada shaqeynta hay’adaha amniga, iyo dhisidda kalsoonida shacabka iyo dowladda. Arrimahan ayaa saldhig u noqday xasilloonida iyo koboca maanta laga dareemayo deegaannada Galmudug.
Xaqiiqdu waxay tahay in Galmudug ay ka soo gudubtay marxalad adag oo ay dadkeedu kala xirnaayeen, deegaan walbana uu maamul u gaar ah sheegan jiray, isla markaana ay adkayd isu socodka iyo wadajirka bulshada. Caqabadahaas waxaa si tartiib tartiib ah looga gudbay dadaal, dulqaad iyo hoggaan joogto ah.
Wax badan ayaa weli dhiman, laakiin lama dafiri karo in Madaxweyne Qoor Qoor uu door muuqda ka qaatay in Galmudug gaarto heerka ay maanta joogto. Waxaa la dhisay saldhig wanaagsan oo lagu sii ambaqaadi karo horumarka, si Galmudug u noqoto maamul xasilloon, horumarsan, isla markaana shacabka u adeega.
