23/04/2026
Waxaa Magaalada Baydhabo ka dhacday munaasabad balaaran oo musharaxnimada xilka Madaxweynaha Koonfur Galbeed uu ku shaacinayay Cabdifataax Ibraahim Maxamed ( Geesay) kaas oo ka tartamaya xisbigga SINCAD.
Munaasabaadaan oo ka dhacday Danbar Baydhab waxaa kasoo qayb-gallay boqolaal qof oo isugu jira madaxda xisbigga, siyaasiyiin, dhalinyaro, haween, dhalinyaro iyo qaybaha kala duwan ee bulshada.
Ugu h**eyn madaxda xisbigga ee dawlad goboleedka Koonfur Galbeed, ayaa bulshada usoo bandhigay aragtidda siyaasadeed ee xisbigga iyo mida musharax Cabdifataax Maxamed Geesay.
Qaybaha kala duwan ee bulshada Koonfur Galbeed ayaa boggaadiyay xisbigga SINCAD, waxay sidoo kale amaan u jeediyeen musharax Cabdifataax Geesay kaalintiisa la xiriirta waxqabadkii uu ka gaystay Koonfur Galbeed mudadii uu xilalka kala duwan hayay.
Xoghayaha guud ee Xisbigga Cabdifataax Xasan Afraz ayaa sheegay in Xisbigga SINCAD uu reer Baydhabo saaxiib la yahay, wuxuu xusay in musharax Geesay uu ku yimid rabitaanka shacabka reer Koonfur Galbeed, codkooda uu madaxweyne ku noqonayo.
Gudoomiyaha Xisbigga SINCAD Eng Maxamuud Khaliif Jabiye oo hadlay ayaa sheegay in xisbigga SINCAD uu waayo-aragnimo u leeyahay arimaha doorashada. wuxuu sheegay in Musharax Geesay iyo reer Koonfur Galbeed, ay yihiin dad is yaqaan. shacabka ayuu ugu baaqay inay codkooda kula soo baxaan dad matali-kara.
Musharax Madaxweyne Cabdifataax Geesay ayaa khudbad dheer jeediyay wuxuu sheegay inuu wax ka qaban doono baahiyaha bulshada reer Koonfur Galbeed, Midnimada iyo xoojinta wadajirka amnigga, wuxu ka hadlay xaaladaha ka taagan Koonfur Galbeed gaar ahaan arimaha siyaasadda isaggoo sheegay inuu saxayo khilaafaadka siyaasadeed ee jira.