18/06/2025
Iran iyo Israa’iil waxay isku tuurayaan gantaallo, duniduna wey daawanaysaa,laakiin haddii Maraykanku si toos ah ugu biiro dagaalkan, waa maxay waxa la filan karo?
Mareykanku weligiis wuu ka fiirsadaa dagaalka tooska ah, laakiin duruufaha haatan taagan k**a duwana kuwo horay uga dhigay inuu dagaallo galo. Waxaa jira cadaadis ah in uu difaaco Israa’iil – xulafada ugu dhow ee uu gobolka ku leeyahay – taasoo hadda si cad ula kulmeysa weerarro toos ah oo uga imanaya Iran. Taageerada la’aanta Maraykanka waxaa dhici kartaa in ay curyaamiso sumcadiisa amni, ayna muujiso in aanu diyaar u ahayn inuu difaaco xulafadiisa marka la garaacayo.
Haddii Mareykanku go’aansado inuu weerar ku qaado Iran, khasaaraha dagaalkaas laga dhaxli karo ma noqon doono mid gobolka ku kooban. Iran si sahlan uma jabto,waa qaran leh ciidan tiradiisu badan yahay, awood gantaal, xiriiryo wakiillo ciidan ah oo ka howl-gala gobolka, iyo karti dagaal oo aan la dhayalsan karin.
Iran waxay u arkaysaa dagaal kasta oo ay Mareykanka la gasho inuu yahay dagaal nolol iyo geeri ah — taasoo ka dhigaysa inaysan oggolaan wax jab ah, xitaa haddii ay khasaaro badan la kulanto.
Mareykanka, inkastoo uu leeyahay awood ciidan oo aan lala tartami karin, haddana dagaal uu la galo Iran wuxuu noqon karaa mid daba dheeraada, oo u dhigma dagaalladii uu ku lug lahaa ee aan guul cad laga gaarin, sida Vietnam, Afgaanistaan, iyo Ciraaq. Waxaa la filan karaa in Iran ay weerarto saldhigyada Mareykanka ee gobolka, oo ay xirto marinka shidaalka ee Gacanka Xurmuz, islamarkaana ay howlgeliso xulafadeeda sida Xisbullah iyo Xuutiyiinta si ay dagaalka uga dhigto mid baaxad leh oo aan lahayn jiiddo kaliya.
Dagaalkani sidoo kale wuu ka sii fidi karaa gobolka. Dalal sida Suuriya, Ciraaq, Lubnaan iyo xataa Yemen ayaa noqon kara goobaha ay saameynta ugu horreysa ka bilaabato. Suuqa caalamka, gaar ahaan qiimaha shidaalka iyo silsiladda sahayda, waxaa ku dhici kara burbur degdeg ah. Saamiyadu waxay noqon doonaan kuwo hoos u dhac ku yimaado, sicir barar ayaa kordhaya, kalsoonida maalgashiga caalamiga ahna way lumaysa!
Waxaan la iska indho tiri karin doorka Ruushka iyo Shiinaha.
Labaduba waxay u arkaan Iran inay tahay saaxiib muhiim ah oo ay rabaan inaysan lumin. Shiinaha, inkasta oo uusan si toos ah dagaal ugu geli doonin, wuxuu siiyay Iran hub, tamar, iyo taageero dhaqaale muddo dheer. Ruushkuna wuxuu dagaalkan u arki karaa fursad uu ku daciifiyo Mareykanka, isagoo si dadban ama muuqata u taageeraya Iran, si gaar ah marka laga eego dhinacyada sirdoonka iyo qalabka difaaca.
Iran-na si cad ayey u muujinaysaa in aysan ahayn dal diyaar u ah in la caburiyo. Ciidamadeeda sida Quds, waaxyaha sirdoonka, iyo kooxaha qarsoon ee Iran ka tirsan ayaa heysta tababar iyo qorshayaal ay ku beegsan karaan danaha Mareykanka meelo aan looga baran. Waxaan halkaan ka arki karnaa in dagaalka noocan ah aanu noqon doonin mid toos ah oo gantaalaha iyo diyaaradaha lagu xakameeyo, balse uu noqon karo mid daba dheeraada, isugu jira dagaal dhaqaalaha ah, mid sirdoon, iyo weerarro aan laga sii digtoonaan karin.
Dhibaatooyinka ugu culus ee laga filan karo maaha kuwa milatari oo qura. Waxa laga baqayaa in dagaalkan uu beddelo xeerarka caalamka. Waxaa la lumin karaa heshiisyadii ka hortagga nukliyeerka, waxaa burburi kara nidaamkii siyaasadda quwadaha, waxaana laga yaabaa in la galo xilli cusub oo dagaallo joogto ah ay noqdaan xalka la isku afgarto!
Ugu dambeyntii, haddii Mareykanka galo dagaal toos ah oo Iran ah, ma noqonayo kaliya dagaal u dhexeeya laba dal, balse wuxuu noqon karaa dagaal dib u qaabeyn ku sameeya nidaamka caalamiga ah, waxayna su’aasha hortaagan tahay: Mareykanku diyaar ma u yahay inuu barto casharro la mid ah kuwii uu ku qaatay dagaalladii h**e, mise wuxuu wajahaya dagaal uusan xisaabtiisa h**ey u helin?
