28/05/2026
Dowladda Federaalka ayaa wada dhaq-dhaqaaqyo ciidan oo xoogan oo ku wajahan magaalada Dhuusamareeb, iyadoo halkaasi la gaarsiinayo ciidamo dheeraad ah iyo saanad ciidan, sida ay sheegayaan xogaha laga helayo gudaha dowladda.
Ciidamo ku sugnaa deegaanka Xananbuure oo dhowaan tababar loo soo xiray ayaa la qorsheynayaa in hub la siiyo, si ay uga qeyb qaataan sugidda amniga iyo qorshaha dowladda ee la xiriira arrimaha doorashada.
Ciidamadan ayaa katirsan Qeybta 21-aad, waxaana laga kala keenay deegaano ka tirsan Hiiraan, Mudug iyo Galguduud. Ilo xog ogaal ah ayaa sheegaya in qorshuhu yahay in ciidamadaasi toddobaadka soo socda si rasmi ah ula wareegaan amniga magaalada Dhuusamareeb, halkaas oo Villa Somalia ay doonayso in lagu qabto munaasabadda JSP, isla markaana ay gaaraan xubnaha guddiga doorashada ee haatan kasoo ambabaxay Baydhabo.
Dhanka kale, Madaxweynaha Galmudug Axmed Cabdi Kaariye (QoorQoor) ayaa la sheegay inuu ka biyo diidan yahay hannaan doorasho oo lamid ah kii ka dhacay Koonfur Galbeed, iyadoo weli ay socdaan dadaallo siyaasadeed oo is barbar socda, dhinac walbana uu isku dayayo inuu xaqiijiyo ajandihiisa siyaasadeed.
Waxaa sidoo kale sii xoogeystay dhaq-dhaqaaqyada siyaasiyiinta iyo dhex-dhexaadiyeyaasha ku howlan arrimaha doorashada.
