01/11/2026
လွန်ခဲ့သည့်လပိုင်းက နဂါးအဖွဲ့မှ သုဘရာဇာဆိုတဲ့တပ်ဖွဲ့ဝင်တယောက်၊ ပကဖတွေ လမ်းကြေးအခွန်ကောက်ခံတဲ့နေရာကိုသွားပြီး NUG ကို နင်ပဲငဆ ဆဲရေးတိုင်းထွာတယ်။
ထိုနယ်မြေကို ၎င်းတိုက်ခိုက်တဲ့အတွက် အခွန်ကောက်ခံခြင်းမပြုရဆိုပြီး ညစ်ညမ်းစွာဆဲရေးတိုင်းထွာပြောတယ်။ တော်လှန်ရေးအဖွဲ့အချင်းချင်း စိတ်ကွယ်ရာအရပ်မှာ ရှင်းလင်းပြောဆိုခြင်းမပြုဘဲ အခွန်ဆောင်နေတဲ့ ကားသမားများရှေ့မှာပဲ ဂိတ်စောင့်ပကဖတွေကို မချေမငံပြောဆိုတယ်။ ကားသမားကို အခွန်မပေးနဲ့ဆိုပြီးပြောတယ်။ အနီးရှိကားသမားမှာ ဘယ်သို့ဘယ်ပုံပြုရမည်မသိ၊ ကြားညပ်နေတယ်။
အဆိုပါကားသမားက ကျနော်ကျေနပ်လို့ပေးတာပါလို့ပြောတယ်။ ထိုမျှနှင့်မပြီးသေး၊ NUG ကိုပဲ ထပ်ကာထပ်ကာ ဆဲရေးတိုင်းထွာတယ်။ စစ်မတိုက်ဘဲ ဆက်ကြေးကောက်နေတဲ့အဖွဲ့ဆိုပြီး သုဘရာဇာက ဒေါမာန်ထကာပြောတယ်။ တိုက်ရသူက ၎င်းဖြစ်ပြီး NUG က ဆက်ကြေးကောက်စားတယ်လို့ပြောတယ်။
ဒီအရာတွေကို ကိုယ်တိုင် ဗီဒီယိုရိုက်တင်ပြီး ပြည်သူအကြား ထင်ရောင်ထင်မှားဖြစ်ဖို့ လိုင်းပေါ်တင်တယ်။ သို့သော် ဘယ်ပြည်သူကမျှ အလေးထားခြင်းမရှိခဲ့ဘူး။ ထိုဗီဒီယိုဖိုင်ကို ကြည့်ရှုရတဲ့အတွက် ကိုယ့်ထမင်းကိုယ်စားပြီး ဘော်လံတီယာတော်လှန်ရေးသမားဖြစ်မယ် ထင်မြင်ခဲ့မိတယ်။ ထိုသို့ဆိုလျှင် ထိုသူသုဘရာဇာပြောစကားများသည် အမှန်တရားချည်းဖြစ်တယ်။
ကိုယ်အားကိုကိုးပြီး နယ်မြေစိုးမိုးမှုရှာဖွေ တော်လှန်တိုက်ထုတ်ထားပါလျှက် သက်ဆိုင်ခြင်းမရှိတဲ့ ပကဖတွေက ဝင်ရောက်အခွန်ကောက်ခံခြင်းဆိုတာ မြစ်သင့်ဘူး။ သို့သော်လည်း ဇန်နဝါရီလ (၉) ရက်နေ့ဖြစ်တဲ့ ယနေ့ထွက်ရှိလာတဲ့သတင်းများကို တွေ့ရှိလိုက်သည်မှာတော့ အထင်နှင့်အမြင် အလွန်ကွဲပြားမှုရှိတယ်ဆိုတာ တွေ့မြင်လိုက်တယ်။
နဂါးရဲ့ ဝါးတားဂိတ်တွေကို NUG တပ်ဖွဲ့တွေက ဝင်ကောက်စီးနင်းခဲ့ပြီး ထိုဝါးတားဂိတ်တွေကို ဖယ်ရှားခဲ့တယ်လို့ဆိုတယ်။ ထိုသို့ဆိုလျှင် အထက်က သုဘရာဇာဆိုသူရဲ့ ပြုမူချက်များသည် နယ်မြေလုမှုဖြစ်တယ်။ ငါပဲဆက်ကြေးကောက်မယ် ၊မင်းတို့မကောက်နဲ့ပုံစံမှာရှိတယ်။ နိုင်ငံလုံးအတိုင်းအတာနှင့် စုဖွဲ့မှုပြုလုပ်ထားတဲ့ MOD PDF များနှင့် နယ်မြေလုနေကြတဲ့သဏ္ဍာန်မှာရှိတယ်။
ထိုအခြေအနေဖြစ်ပေါ်လျှင် မည်သူမှန်လဲ၊ မည်သည့်ဘက်ကမှားယွင်းလဲဆိုတဲ့ အမှန်တရားရှာဖွေဖို့ပင်မလိုတော့ဘူး။ အလုံးစုံလွတ်မြောက်ဖို့၊ ဖက်ဒရယ်ပြည်ထောင်စုဖြစ်ပေါ်ဖို့ အခြားသောတော်လှန်တပ်ဖွဲ့များနှင့်ပူးပေါင်းပြီး NUG က လုပ်ဆောင်နေတယ်။ ထိုသို့ဆောင်ရွက်နေတဲ့အဖွဲ့ကို ဒေသန္တရမျှအဖွဲ့အစည်းတခုက လိုက်လံနယ်မြေလုတယ်။
တိုင်းရင်းသားအချင်းချင်း နယ်မြေအငြင်းပွားမှုဖြစ်လျှင်သော်မှ ရှုမြင်တင့်တယ်ခြင်းမရှိတဲ့အခင်းအကျင်းမှာ ဒေသန္တရအဖွဲ့က ငါ့နယ်မြေဆိုပြီး ကြားကာလအစိုးရအဖွဲ့အစည်းတခုရဲ့ လက်အောက်ခံတပ်တွေကို မောင်းထုတ်ခြင်းပြုသည်ကတော့ မည်သည့်ရှုထောင့်မျှပင် လက်ခံ၍မရဘူး။ တော်လှန်ရေးရှည်ကြာမည်က ဒုတိယအချက်မျှဖြစ်ပြီး ထိုဒေသနေပြည်သူများအတွက် အတိဒုက္ခဖြစ်တယ်။ လုံခြုံရေး စိုးရိမ်မကင်းဖွယ်ဖြစ်တယ်။ သုဘရာဇာရိုက်ကူးထားတဲ့ ဗီဒီယိုဖိုင်ထဲက ကားသမားကဲ့သို့ မည်သူ့အဖေခေါ်ရမည်မသိ၊ လမ်းပျောက်ကြရတယ်။
ဒါကြောင့် နဂါးရဲ့ ဝါးတားဂိတ်တွေကို စီးနင်းဖျက်စီးခြင်းသည် ဖြစ်သင့်ဖြစ်ထိုက်တဲ့ ဆောင်ရွက်မှုဖြစ်တယ်။ ထိုထက်သာလွန်လျှင် ပူးပေါင်းတဖွဲ့တည်းဖွဲ့နိုင်လျှင်ဖွဲ့၊ မဖွဲ့နိုင်လျှင် ပုလဲနယ်အတွင်း လက်နက်ကိုင်တော်လှန်တပ်ဖွဲ့ဆိုတာ တဖွဲ့တည်းပဲရှိသင့်တယ်။ NUG မရှိစေလိုသည်လား၊ နဂါးအဖွဲ့မရှိစေလိုသည်လားဆိုသည်ကတော့ ဒေသခံပြည်သူများရဲ့ နိုင်ပွဲဆာလောင်မှုနှင့် နိုင်ငံရေးရေချိန်ပေါ်မှာ မူတည်တယ်။
ကြားကာလအစိုးရအဖြစ် တော်လှန်ရေးတပ်ဖွဲ့အားလုံး၊ အထူးသဖြင့် ERO အများစုလက်ခံထားကြပါလျှက် ပုလဲနယ်ပြည်သူများက လက်မခံဘူးဆိုလျှင်တော့ အဲဒါ ကိုယ်တိုင်သမိုင်း ရေးထိုးကြခြင်းသာလျှင်ဖြစ်တယ်ဆိုတာပဲ။
တော်လှန်ပြည်သူအားလုံးကတော့ NUG ကို ကြားကာလအစိုးရအဖြစ် အသိအမှတ်ပြုထားတယ်။ စစ်ဘုရင်တွေ ပေါ်ပေါက်ခြင်းမရှိဖို့ တခုတည်းသော COC ကို ယုံကြည်ထားကြတယ်ဆိုတာပဲ။ တခုတော့ရှိတယ်။ တော်လှန်ဖျက်မျဉ်းအုပ်စုကတော့ ဆန့်ကျင်ဘက်မှာရှိလိမ့်မယ်။
#မြန်မာ့သတင်း #ပုလဲနဂါး
