01/04/2021
لغة الماركتينج ... رقم (2)
هنتكلم النهاردة عن 3 كلمات هم محور الماركتينج بمفهومه الشامل و اللى هنشرحه المرة الجاية ان شاء الله ...
و هم اللى بيقوم عليهم أى بيزنس و لازم تبقى فاهمهم و حاسسهم و شاربهم كويس قوى..
التلات كلمات هم:
Needs , Wants , Demand
الإحتياج – الرغبة – الطلب
أول كلمة Need
الحاجة هى شعور بالحرمان أو نقص شئ معين أو فقدانه و هو ده المولّد اللى بيدى الإنسان طاقة تحركه لإشباع الإحتياج ده. و الإنسان طبعا ليه احتياجات أساسية مادية و معنوية زى الإحتياج للأكل و الملبس و السكن و التزاوج و الأمن و الترفيه و الحب و العلم و المعرفة و تحقيق الذات .....الخ
و هو ده المفهوم الكامن أو المبدأ الضمنى جوه كلمة تسويق و هو ده الأساس اللى بيقوم عليه أى بيزنس و هو تلبية الإحتياجات البشرية و إشباعها يعنى مثلا مطعم يشبع الاحتياج للأكل .... جامعة تشبع الإحتياج للعلم .... و هكذا.
و هنا فى نقطتين مهمين لازم تعرفهم عن ال Needs:
- أولاً: ال need مش بيتم خلقها أو إختراعها من خلال الماركتينج أو البيزنس لأ هى موجودة أصلا و إحنا علينا البحث عنها و توفير منتج أو خدمة يشبعها .. و علينا زيادة شعور العميل بالإحتياج ده و أهمية إشباعه و الجدوى من دفع مقابل مادى مقابل المنتج أو الخدمة اللى هيشبع الاحتياج.
- ثانيا: ال Needs بتاعت البشر محدودة جدا يعنى لو بصيت هتلاقى إنك بتعافر عمرك كله علشان تشبع مجموعة احتياجات تتعد على الصوابع تتعلم كويس و تاكل كويس و تلبس كويس و يبقى عندك سكن كويس و وسيلة انتقال كويسة و تحب و تتجوز و تتحق ذاتك...إلخ
- ثالثاً: نفهم كده من أولاً و ثانياً إن الإبتكار و الإبداع فى التعامل مع ال Needs صعب و غالبا بيكون من خلال الإكتشافات العلمية و الإختراعات و اللى طبعا بيتبناها كيانات عملاقة و تكون بداية بيزنس عملاق .. زى مثلا إحتياج الإنسان للسفر و الإنتقال فييجى إختراع السيارات و القطارات و الطائرات ..... هكذا الكمبيوتر و الموبايل و غيره و غيره.
؟؟ طيب إذا كانت الإحتياجات محدودة وأغلبها تم إشباعه بالفعل إحنا هنعمل إيه؟؟ ده ياخدنا للكلمة التانية و اللى فيها الشغل كله و هى Wants
الرغبات أو المتطلبات
ال want هى الصورة اللى بتاخدها ال need بناء على عوامل شخصية يعنى مثلا أنا جعان ده Need و إشباع الجوع فى ذهنى دلوقتى متمثل فى صورة فراخ مشوية و رز و سلطة و طحينة هو ده ال want
نقدر نقول إن ال want هى شروط و مواصفات الشئ اللى هيشبع ال Need
و بالتالى إذا كانت ال Needs محدودة و تتعد على الصوابع زى ما قلنا فال wants غير محدودة و تكاد تكون لا نهائية.
يعنى لو احنا 10 أفراد ماشيين فى شارع و عايزين ناكل يبقى كده ال need واحدة و هى الجوع و لكن واحد عايز ياكل فراخ و واحد عايز ياكل كشرى و واحد عايز ياكل كبدة و سجق و واحد عايز ساندويتش جمبرى....الخ
يبقى ال wants إختلفت مع إن ال need واحدة
و هو ده اللى بيكون الشغل كله فيها يعنى اختراع واحد بيشبع need واحدة تفضل الشركات تطور و تنوع فى تلبية ال wants لنفس ال need لمدة سنين أو عشرات السنين أو ربما مئات السنين
يعنى من عشرين سنة كنا بنقول أنا جبت "موبايل" و بس! لأننا بنتكلم عن اختراع جديد فكل الشغل و الكلام على ال need و هنا خلاص ال need دى اتوفرلها اختراع يشبعها فييجى دور ال wants تبدأ الشركات تشتغل عليها لعقود من الزمن فتلاقى النهاردة واحد ماسك نفس الاختراع بتصميم رائع و كاميرا عالية و بروسيسور محترم و بعدين صاحبه يتنك عليه و يقولوا بس مشكلته إن كاميرا السيلفى بتاعته 16 ميجا بيكسل بس!! لأن ال wants كل يوم عمالة تزيد و تتغير.
بس زى ما اتفقنا قبل كده فى الكلام عن أنواع الماركت إن ال interest لوحدها مش كفاية و لازم يكون فى موارد و فلوس و ظروف شخصية و أهلية قانونية علشان تتم عملية الشراء.
و ده ياخدنا للمصطلح الثالث و هو ال Demand يعنى الطلب
نقدر نقول ببساطة إن ال wants لو إقترنت مع القدرة الشرائية يعنى القدرة على دفع فلوس مقابل الخدمة أو المنتج هنا تتحول ال wants إلى طلب على المنتج و تعالوا ناخد مثال يوضح أكتر:
** مثال:
نفرض إن ال 10 أفراد الجعانين اللى اتكلمنا عليهم من شوية ال wants بتاعتهم كالتالى:
3 أفراد عايزين ياكلوا جمبرى و سمك و سى فود
5 عايزين ياكلوا فراخ
2 عايزين ياكلوا كشرى
و الشارع متوفر فيه الثلاث مطاعم
سعر أكلة كشرى 25 جنيه
سعر أكلة فراخ 50 جنيه
سعر أكلة جمبرى 100 جنيه
و هنا نيجى للقدرة الشرائية للعشر أفراد
الثلاثة افراد عايزين ياكلوا جمبرى فيهم واحد بس معاه 100 جنيه و واحد معاه 50 جنيه و واحد معاه 25 جنيه يبقى واحد بس اللى هياكل جمبرى و واحد هياكل فراخ و واحد هياكل كشرى
الخمس أفراد اللى عايزين ياكلوا فراخ فيهم ثلاثة معاهم 50 جنيه و اتنين معاهم 25 جنيه هيتحولوا للكشرى
و الاتنين اللى عايزين ياكلوا كشرى معاهم 25 جنيه هياكلوا كشرى ما فيش مشاكل.
يبقى النتيجة النهائية:
الجمبرى: (Wants=3) (Demand=1)
الفراخ: (Wants=5) (Demand=4)
الكشرى: (Wants=2) (Demand=5)
طبعا المثال بسيط للتوضيح لكن الموضوع أعمق من كده لأن الموضوع مش فلوس بس الموضوع يدخل فيه عوامل تانية زى ما قولنا قبل كده عوامل شخصية و نفسية و إجتماعية و قانونية و سياسية و إقتصادية....إلخ كلها بتأثر على الطلب على المنتج أو الخدمة بتاعتك.
هنتكلم ان شاء الله بشكل أعمق و خاصة لما نتكلم على الإعلانات و اقولكم ان فى اعلان ناجح بيلعب على ال needs بس و فى إعلان بيلعب على أوتار ال wants و فى إعلان هدفه الوحيد زيادة ال demand
أهم حاجة نطلع بيها بس دلوقتى من المقال ده هو معنى الثلاثة مصطلحات علشان بعد كده فى أى مقال أو فيديو أستخدمهم براحتى نكون عارفين معناهم
ما تنسوش تعملوا شير و إنتظروا البوست القادم إن شاء الله
