13/11/2022
جمله واحده فقط " غيرت حياتي 180 درجه "
قبل دخولي الجامعه من سنين فاتت , كنت بتشرف ان ليا صديقه كانت اكبر مني بسنين وكانت بتجمعنا علاقه صداقه علي الانترنت بنتبادل فيها النصائح والخبرات .
وبعد تقديمي لورق الجامعه وقبولي وخلاص هتبدأ دراستي .
سالتها كالعاده " إيه هيا النصيحه اللى ممكن تقدمهالي للفتره اللى انا مقبل عليها " ؟
ردها ليا :
" اكتر حاجه ممكن تستفيد بيها فتره الجامعه , هو وقتك اللي ملكك , أستغل الوقت دا بأكبر قدر ممكن وطور واستثمر في نفسك علي اد ما تقدر , لان معظم اللى بيخصلوا كليات بيطلعوا دايخين ومش فاهمين هما مقبلين علي إيه , بالإضافه إنهم بيحتاجوا تأهيل وكورسات تاني , كإنهم محتاجين يتعلموا من الاول , ودا بسبب ان المسار التعليمي في مصر قاسي للعقول وملوش علاقه بسوق العمل ولا يمت ليه بصله , فانت محتاج تكون واحد من الناس دي والا محتاج تطلع تلاقي الامور سهله ؟
في الحقيقه , الكلام بتاعها موضحليش برهانه الا لما اخدت تقريبا ترم كامل داخل الكليه وعملت علاقات كبيره جدا مع ناس اكبر مني وناس متخرجه وناس في سني .
وشوفت الصوره بعينيا بشكل كامل .
ومن هنا بدأت رحله الكفاح في تطوير النفس والذات وفي المجال اللي حبيته وبحبه دلوقتي بعد بحث ودخول في اكتر من مجال علي مدار سنين .
ومن المكان والوضع اللى انا فيه دا حابب أشكر صديقتي اللي اختفت من سنين وتدوم نصيحتها وذكراها ليا ولسه فاكر اسمها ومحفور في ذاكرتي متنساش .
وخليني هنا انا اقولك نصيحه إضافيه زياده علي النصيحه العظيمه اللى فوق .
بس قبلها هحكيلك القصه دي :
صديق ليا كان تقريبا 28 سنه خريج تجاره وكان شغال في الـ Customer Service في بنك من البنوك .
في الفتره دي قرر إنه حرفيا هيبدأ في دراسه الـ Programming وكانت بتربطني علاقه صداقه بيه لاني كنت بدرس نفس المسار الكام سنه اللى فاتوا , كان بيخلص شغله ويرجع البيت يذاكر .
ثم بدأ في منحه جوجل واتقبل فيها , وكان من الاوائل فيها , فحصل علي منحه الـ Nano Degree وخلصها ونجح فيها , ثم بدأ شغل في شركه في مصر اخد منها خبره شويه بجانب شغل الـ Freelancing
وبعد فتره قدم علي شغل برا مصر, وسافر الامارات , ومن الامارات سافر المانيا واستقر هناك واتزوج وحياته اتغيرت 180 درجه في خلال سنه وشويه .
فالحكمه اللى عايزك تاخدها من هنا والنصيحه اللى عايز انصحهالك
لو انت حتي مش في مرحله الدراسه الجامعيه وعديت حتي بمرحله العشرينيات وفي مرحله الثلاثينيات او اي عمر كان , وحابب تغير من وضعك وتحسنه في ظل الظروف اللى انت فيها .
" سنه كامله من تطوير الذات والدراسه في مجال معين وبخطه محكمه, قادره انها تغير مسار حياتك بالكامل "
ودا من تجربتي وتجربه صديقي .
" العمر مش هو اللى يحكمك , انت اللى تقدر تتحكم في نفسك ووضعك "
" أفضل استثمار ممكن تعمله , وهو إنك تستثمر في نفسك "
دمتم بخير
