https://www.facebook.com/481751315012429/

MarketOlogy, Abu Hail (2026)

21/03/2025

القصة دي حصلت قدامي وبجد ضحكتني
قاعدين في لمة كدا وبحكو عن زول يادووب فتح محل كريب ووافل قرر يسوق ليهو براهو قعد مع نفسو وقال التسويق دا حاجة ساهلة ياخ شنو يعني بس بعمل بوست بقول عندي أحلى كريب في السودان وخلاص

قام نزل أول بوست كاتب فيهو

⭐ أقوى كريب في السودان جربه هسي ⭐

الصورة كريب في علبة استايروفوم الكاميرا مقلوبة شوية 😂
التفاصيل لا سعر لا موقع بس *Inbox for details*
الهشتاقات #أقوى #أحلى

بعد ٤٨ ساعة لا طلبات لا تفاعل بس تعليق واحد من صاحبو : "ورينا المحل وين؟"

اها الغلط وين؟؟
التسويق دا ما بوست وخلاص المفروض يكون عندك خطة واضحة عشان العملا يلقوك ويطلبوا منك ما تعتمد على الحظ

فااااااااااااااااا لازم تحدد عملائك مو.. انت بتبيع لطلاب ولا موظفين ولا ناس بتحب الحلويات
اهتم بالمحتوى خلي يكون صور مرتبة فيديوهات توضح طريقة تحضير الكريب وقصة مشروعك
وفر تفاصيل واضحة العنوان الأسعار مواعيد العمل

اختار طريقة تسويق ذكية مثلا اعمل عروض توصيل المجاني لأول طلب ولا حتى ضواقة (تذوق) مجانية لأول ١٠ عملا

جرب الإعلانات الممولة واستهدف منطقتك عشان توصل للناس الصح (لو انت برا السودان)

القصة ما بوست والسلام ولا هاشتاقات ساي لو داير مشروعك ينجح خطط واشتغل صاح ولا ح تلقى خالتك بس هي العميل الوحيد

20/03/2025

الليلة كنت لافي الفيس لقيت واحد ببيع حاجات من حسابو الشخصي
ويدي اكلتني وقلت اكتب ليكم كلمتين خفاف لطاف عن ليه تعمل صفحة بزنس
وانا هنا بتكلم عن البيع والشرا.. ما عن بناء علامتك التجارية

الحساب الشخصي معمول للونسة وقصصك وشكاويك من سخانة السودان والضبان😂
لكن صفحة البزنس معمولة للبيع وبتنظم ليك الشغل
يعني الزول البخش يشوف حاجتك ما بيلقى صورتك قبل ٥ سنين لابس جلابية العيد

الفيسبوك عندو قوانين فاهمة عشان كدا فصل الحساب والصفحة
الحسابات الشخصية ما مفروض تكون للبيع ولو بقيت تعمل إعلانات كتيرة ولا تسوّق منو
ممكن مارك بتاع الفيس يصحى الصباح ويقول ليك مع السلامة
ويقفل حسابك وقلبك يكون واقع وانت بتجري عشان ترجّعو 💀
لكن صفحة البزنس مفتوحة ليك كل الفرص إعلانات تحليلات وإدارة محترفة للعملاء

والحاجة الأهم لو عندك صفحة بزنس بتقدر تربطها مع واتساب بيزنس تخلي الطلبات منظمة
وحتى لو عندك زول يساعدك في الردود تقدر تضيفو بسهولة
الحساب الشخصي يا ترد براااك يا العميل يمشي يشتري من زول غيرك

فلو عاوز شغلك يكبر افتح صفحة بزنس نظم المحتوى وخليك واضح وما تخلي الناس تتعب عشان تشتري منك
والليلة لو انت بتبيع من حسابك الشخصي امشي أعمل صفحة وابدأ شغلك صح وعشان ما تقول ما نصحتك
اعمل تاق لي صفحتك ووري الناس الشغل المحترم والناس الشغالة صاح 😎

19/03/2025

البوست دا جاي لي ناس السعر في الخاص او DM FOR PRICE 😂🔥

العميل: السلام عليكم.. السعر؟
صاحب الشغل: السعر في الخاص 💌
العميل: طيب ممكن توريني هنا؟
صاحب الشغل: لا رسل خاص 🤫
العميل (في الخاص): بكم؟
صاحب الشغل: انت من وين؟
العميل: الخرطوم
صاحب الشغل: الخرطوم وين بالضبط؟
العميل: المعمورة
صاحب الشغل: طيب السعر يختلف حسب المنطقة!
العميل: اها بكم؟
صاحب الشغل: 20 ألف
العميل: شكرا بسأل ساي 🙂

وفي الاخر العميل يكون شرد وانت لسه بتعمل كوبي بيست لرد السعر 😂

السعر ما رقم سري الناس بتكره الحركات دي لأنها بتحسسهم إنو في لف ودوران.
خلّي السعر واضح عشان توفر وقتك ووقت الزبون

الا لو كنت زول فاهم وعندك سستتم وبتجمع داتا العملاء عشان تستفيد لي قدام.

18/03/2025

واحد قال عندو ستور اونلاين وعندو داتا اكتر من 700 شخص في واتساب لكن الطلبيات ما بتتعدى الـ20 شخص
يعني 680 زول قاعدين يتفرجوا ساكت وما بطلبوا

بالصدفة لقيت السوال دا في جروب وحسيت لازم اشارك معاكم القصة دي عشان ناس كتار ممكن يكونو واقعين في نفس المشكلة

قام عمل تخفيضات وامكن وصل لمرحلة يبيع بأقل من راس المال
وبرضو الطلبات ما زادت

اها يلا القصة دي ما قصة سعر المشكلة في التسويق والطريقة البيقنع بيها الناس..
ودا الحل لكل زول عندو نفس المشكلة

1️⃣ داتا بدون تفاعل؟ زي تلفون بدون شاحن 🔋🙄
الـ700 شخص في واتساب ما حيطلبوا ساي كدا لازم تخليهم يحسوا إنهم جزء من المجتمع بتاعك
بدل ما تبيع ليهم ساي اسالهم "شنو الحاجة البتخليكم مترددين تطلبوا؟"
خلي ردودك على الرسائل تكون مرنة وجذابة ما بس "السعر كدا والدفع مقدم".

2️⃣ ليه الزول يطلب منك؟ شنو البتقدمو ليهو غير الطلب؟
هسي انت بتجيب من شي إن او امازون.. طيب ليه الزول ما يطلب براهو؟
هل إنت بتوفر عليهم الجمارك؟
هل بتساعدهم في اختيار المنتجات؟
هل بتجمع ليهم الطلبيات في شحنة واحدة عشان تقلل التكلفة؟
لو ما وضحت القيمة المضافة بتاعتك.. ما تتوقع الزبون يفضل يطلب منك بدل ما يمشي يطلب براهو او يشوف غيرك..

3️⃣ انت محتاج تحفز العملا اكتر
جرب تعمل عروض زمنها محدود.. زي مثلا "آخر فرصة للطلب قبل يوم الجمعة"
او هدايا تحفيزية مثلا "أطلب بـ10 ألف وخد شحن مجاني أو منتج مجاني".

4️⃣ مشكلتك الأساسية الناس بتحب تطلب من أماكن فيها زحمة 😂
لو ما شافوا ناس طلبت قبليهم حيترددوا
فاااااااا نززززززل صور وفيديوهات Unboxing من زبائنك
شجع الزباين يرسلو ليك بعد ما يستلموا طلباتهم
اعمل مسابقات وجوائز تخلي الناس تتفاعل معاك

خلي الناس تحس انها بيستفيد لما تطلب منك..

ياخ الموضوع كلو في التفاصيل الصغيرة.. والناس بتحب احساس الزحمة 😂
اشتغل على التفاعل والمحتوى الصح وشوف كيف الطلبات حتزيد

17/03/2025

ناس كتير بتفكر تبدh مشروع إكسسوارات موبايلات بس بسيطين البعرفوا يديروهو بطريقة تخليهو ناجح ومستمر
لو انت واحد من الناس العندها الفكرة لكن ما عارفة من وين تبدا ركز معاي
لأن البوست ده حيوريك الطريقة الصح خطوة بخطوة

1. اهم حاجة قبل ما تبدأ هي تعرف الطلب في السوق
شنو أكتر الإكسسوارات المطلوبة؟ الشواحن السريعة؟ السماعات اللاسلكية؟ الكڤرز العصرية؟
عشان تعرف شوف الناس بتسأل عن شنو في الجروبات
امشي السوق وشوف أكتر الحاجات البتمشي، وخليك قريب من تجار الجملة عشان تعرف الترند الجديد قبل أي زول.

2. اوع تعمل سعر عشوائي احسب التكلفة كويس (سعر الجملة، التوصيل، مصاريف التشغيل)، وبعدها شوف أسعار المنافسين.
حاول توفر خيارات بأسعار تنافسية ودايماً خليك جاهز بعروض وخصومات، خاصة للزبائن المداومين.
ما تنسى إن السعر القليل بدون جودة كويسة ممكن يدمّر سمعتك.

3. وين تبيع؟ الموقع ولا السوشيال ميديا؟
حسب رأس مالك، عندك خيارين:
لو رأس مالك بسيط ركز على البيع أونلاين، عبر فيسبوك، واتساب، وتيك توك. أنشئ صفحة محترفة، نزّل صور بجودة عالية،
واستخدم الإعلانات المدفوعة (لو بتوصل خارج السودان) لاستهداف جمهورك الصح.
- لو عندك رأس مال متوسط افتح كشك صغير في مكان حيوي زي الأسواق أو المولات، معتمد على البيع المباشر وأيضاً التوصيل للطلبات الأونلاين.

- اعمل محتوى تفاعلي نزل فيديوهات قصيرة عن كيفية استخدام المنتجات بطريقة عملية. الناس بتحب تشوف المنتج في الواقع قبل ما تشتري.
- خليك قريب من الزبائن ورد على التعليقات والرسائل بسرعة، وعامل الزبائن كأنهم أصحابك. كل ما كنت سريع ومهتم، كل ما ضمنت ولاءهم.
- استغل الأعياد والمناسبات خلال رمضان، العيد، أو حتى موسم المدارس، سوي عروض مناسبة للوقت ده وخلي الناس تتحمس للشراء.

4. اكيد في زبائن حيكونوا مزعجين أو في ناس حتحاول تساومك بأسعار غير منطقية
- خليك واضح في سياسة الأسعار وما تخفض الأسعار بشكل مبالغ فيه.
- تعامل بأدب لكن بثقة وما تخلي أي زول يستغلّك.
- لو في مشكلة في الطلبية حاول تحلها سريع وقدم خيارات للزبون (استبدال/تعويض).

لكن لو التزمت بالخطوات دي، حتشوف فرق كبير في مشروعك

نسينا حاجة؟؟ عندك تجربة مع بيع الإكسسوارات؟

16/03/2025

اصحاب المشاريع دايما في حالة انهم عايزين يشيلوا الشغل كله فوق راسهم
بتعمل كل حاجة بنفسك (تجهيز، رد على العملا، ترتيب الطلبات)
وطوالي زهجان تعبان وما قادر تواصل 🤦‍♂️

الشغل الكتير بيقلل إنتاجيتك
مافي بزنس ناجح قايم على زول واحد بس..

✅ وزع المهام بدل ما تخلي كل حاجة فوق راسك.. يعني لو عندك اصحاب شاطرين في التوصيل.. خدمة العملاء.. التسويق.. التصميم.. خلّيهم يساعدوك. لو ما عندك شوف فريلانسرز بأسعار بتناسبك.

✅ ركز على اهم جزو في شغلك بدل ما تضيع يومك كله في حاجات جانبية... ركز على الحتة البتخلي مشروعك يكبر فعلًا.

✅ استفيد من أصحاب الخبرة اسأل واستشير ,اتعلّم من تجارب غيرك عشان ما تعيد نفس الأخطاء.

✅ خفف الضغط النفسي لانو الضغط والتوتر بيقلل إنتاجيتك وبدل ما تطور مشروعك بتلقى نفسك مرهق وزهجان.

نجاحك ما معناها إنك تشيل الحمل كله براك.. بالعكس
ما تخاف من طلب المساعدة لأنو البزنس البقوم على زول واحد بينهار أسرع مما تتخيل

بس عموما كدا اكتر حاجة بتحسها بتضغطك في شغلك؟

15/03/2025

بتفكر تعمل مشروع شحن طلبات Shein للسودان
كيف تتميز في سوق مليان منافسة؟ 📦

شحن الطلبات من Shein للسودان سوق (Red Ocean) يعني مليان وسطاء ومنافسة قوية

فلو داير تدخل وتكسب لازم تشتغل بذكاء وتقدم حاجة مميزة تخليك مختلف عن الباقين.. كيف؟ خليني اوريك كيف

1. ما كل الناس في السودان بتشتري بنفس الطريقة بدل ما تحاول تخدم الجميع
ركز على شريحة محددة وقدم ليها خدمة مخصصة، مثلاً:
-طالبات الجامعة وفر ليهم عروض خاصة، لأنهم دايماً بيشتروا الموضة والإكسسوارات.
-محبي الجمال والعناية بالبشرة روج لخدماتك في جروبات البنات المهتمات بالكوزمتكس.

✅ التخصص يخليك مميز أكثر من إنك تحاول تستهدف كل الناس

2. الناس بتكره الانتظار، ولو عندك سرعة في الشحن وتوضيح تام لكل تفاصيل الطلب، أكيد العملاء حيختاروك بدل غيرك
-حدد مدة واضحة للتوصيل "طلباتكم حتوصل في 20-25 يوم كحد أقصى" ده أحسن من "والله على حسب الظروف".
-اعمل خدمة "طلب مستعجل" بسعر أعلى لو في زبون مستعد يدفع زيادة عشان يوصله الطلب بسرعة، وفر ليه الخيار ده.
-وفر نظام تتبع الطلبات حتى لو عن طريق رسائل واتساب أو تيليجرام، عشان العملاء يحسوا بالراحة وما يفضلوا يسألوا كل يوم "وصل ولا لسه؟".

3. الأسعار التنافسية لكن كمان لازم تعرف كيف تسعّر بدون خسارة
-اعمل تخفيضات على الطلبات الكبيرة لو زبون عنده أكتر من 3 قطع، ممكن تخصم ليه جزء من العمولة.
-نظام نقاط الولاءكل ما يطلب أكتر، ياخد خصم مستقبلي أو شحن مجاني لطلب معين.
-عروض شهرية أو موسمية زي "خصم خاص لفترة العيد" أو "عرض الجمعة البيضاء".

4. تسويقك هو اللي بيحدد نجاحك، ما بس الخدمة نفسها عشان تتميز
-اعرض تجارب عملائك الناجحة وانشر صور العملاء لما يستلموا طلباتهم، وخليهم يشاركوا تقييماتهم.
-صور وفيديوهات Reels محتوى تعليمي زي "كيف تختار المقاس الصحيح في Shein؟"، "كيف تفرق بين المنتج الأصلي والتقليد؟".
-خليك متفاعل في جروبات الفيسبوك ما بس تروج لنفسك، لكن ساعد الناس بمعلومات مفيدة عن الطلبات والاستيراد.

5. وفر خيارات دفع أسهل للعملاء
بعض العملاء بتكون مشكلتهم الأساسية إنو ما عندهم وسيلة دفع جاهزة، فلو وفرت خيارات مرنة، أكيد حيفضلوا خدمتك:
-قبول الدفع بالتحويل البنكي أو النقدي.
-خدمة "ادفع جزء مقدم والباقي عند الاستلام" لبعض الطلبات الغالية.

6. كسب ثقة العملاء في سوق مليان نصب واحتيال المصداقية اهم حاجة
-وضح التكاليف من البداية وما تخلي الزبون يتفاجأ بزيادة في السعر بعد ما يطلب.
-كن واضح في سياسة الاسترجاع أو الاستبدال ولو في مشاكل في الطلب، ساعد الزبون بحلول بديلة بدل ما تتجاهله.
-لو عندك ضغط طلبات، قول ليهم إنو الطلبات الجديدة حتتأخر بدل ما تعمل سمعة سيئة بالتأخير المستمر.

عشان تنجح في الشحن من Shein لازم
- تقدم خدمة أحسن من المنافسين
- خليك واضح
- خلي الأسعار تنافسية
- وقدم تجربة عملاء ممتازة

عشان الناس تختارك كل مرة.

لو عندكم تجربة في طلب المنتجات للسودان، شاركونا في التعليقات

14/03/2025

"الخطوة البتغيّر حياتك"

أحمد كان شغال في وظيفة عادية، نفس الروتين كل يوم، نفس المرتب البسيط، ونفس الإحساس إنو ما ماشي لي قدام. كان شايف ناس كتار بينجحوا، بيكبروا مشاريعهم، وبيحققوا أحلامهم، لكنه كان قايل إنو "لسه ما جاهز".

في يوم، قابل صاحبو خالد، الزول العرفو زمان، لكن الليلة شايفو بطريقة مختلفة… عربيته جديدة، لبستو أنيقة، وثقته في نفسه عالية. سألو:
"خالد، إنت كيف وصلت هنا؟ أنا وإنت بدينا مع بعض!"

خالد ضحك وقال ليهو:
"لأنو إنت قاعد تستنى، وأنا مشيت خطوتي الأولى من زمان."

الكلام ده قعد في راسو طول الليل… فهم إنو الفرق بينو وبين خالد ما كان في الموهبة، ولا في الحظ… الفرق كان في "الخطوة الأولى".

من اليوم داك قرر أحمد يبدأ… ما استنى يكون عندو كل حاجة مثالية بدأ بالمتاح وقع قام وقع تاني لكن المرة دي كان بيقوم أسرع. وبعد شهور، بقى يشوف التغيير الحقيقي… عملاء جدد دخل أعلى وحياة مختلفة تمامًا.

القصة الفرصة قدامك لكن النجاح ما بيجيك لحدي عندك إنت المفروض تقوم وتاخد خطوتك الأولى.

13/03/2025

الزبون ما بشتري المنتج بشتري الشعور

الناس ما بِتشترى منك عشان عندك أحسن منتج بتشترى عشان الإحساس البتحسسهم ليهو شوف البراندات الكبيرة ما ببيعوا منتجات ببيعوا تجارب

🔹 العطور شعور بالفخامة والجاذبية.
🔹 السيارات إحساس بالقوة والهيبة.
🔹 القهوة لحظة راحة ومتعة.

يعني لو داير تبيع صح ما تركز على المنتج براهو خلى الزبون يحس إنو حياتو ح تكون أحسن بيهو 😉🔥

📌 شنو الشعور البِتبيعو لزبائنك؟ 🤔👇

12/03/2025

الزبون ما بحب تحسسو إنك داير تبيع ليهو

أكبر غلطة ممكن تعملها إنك تلاحق الزبون بالكلام عن منتجك وطول الوقت تحاول تقنعو يشتري الزبون بحب يحس إنو هو القرر يشتري ما إنك فرضت عليه الشراء

💡 الحل؟
- خليه يحس بالمشكلة قبل ما تعرض الحل.
- احكي ليهو قصص واقعية تخليهو يتخيل نفسو مستفيد من المنتج.
- قدم قيمة حقيقية قبل ما تفكر تبيع.

🎯 شنو الطريقة البتستخدمها عشان تخلي الزبون يقتنع براهو يشتري؟

MarketOlogy

21/03/2025

20/03/2025

19/03/2025

18/03/2025

17/03/2025

16/03/2025

15/03/2025

14/03/2025

13/03/2025

12/03/2025

Address

Website

Alerts

Shortcuts

Share

Category