07/04/2026
في عندك 4 مؤشرات أساسية بتعرف من خلالهن إذا مشروعك عم يتقدم فعلًا أو واقف محلّه.
وكل مشروع دخله فوق 30,000 لازم يبلّش يراقب هاي الأرقام بجدية:
1) معدل البيعة للزبون الواحد
كيف بتحسبه؟
بتاخذ إجمالي المبيعات في آخر الشهر، وبتقسمه على عدد الصفقات.
هذا الرقم بيفيدك تعرف متوسط قيمة كل بيعة، وبيعطيك صورة أوضح عن مستوى البيع عندك وعند فريقك، ومن خلاله بتقدر تشتغل على تحسين الأداء ورفع قيمة الصفقة.
2) معدل التحويل – Conversion Rate
هذا المؤشر بوضحلك: من أصل كل الـ Leads أو الرسائل اللي دخلت عليك، كم صفقة سكرت فعليًا؟
يعني إذا دخل عندك 500 رسالة أو استفسار، كم واحد منهم تحوّل لزبون؟
هون بتعرف إذا عندك مشكلة في جودة الاستهداف، أو في طريقة المتابعة، أو في الإغلاق البيعي.
3) العائد على الإعلان – ROI
لا تقيّم الإعلان بشكل يومي وتتوتر من كل رقم صغير.
أكيد لازم تتابع الحسابات بشكل مستمر، لكن التقييم الأدق والحقيقي لربحية الإعلان، خصوصًا في Meta، يكون على مدى 3 أشهر وليس فقط بشكل شهري.
لأن في مشاريع نتائجها تظهر على المدى القصير، ومشاريع ثانية تحتاج وقت حتى يبان أثر الإعلان الحقيقي على صافي الربح.
4) مقارنة أداء نفس الشهر من سنة لسنة
قارن نفس الشهر في كل سنة:
شو عملت في 2025؟ وشو عم تعمل في 2026؟
هاي المقارنة بتعطيك صورة أوضح من المقارنة الشهرية العادية، لأنها بتساعدك تفهم إذا في نمو حقيقي في المشروع، أو إذا أنت فقط عم تدور في نفس المكان.
الخلاصة:
المشروع اللي ما فيه نظام، ما بقدر يكبر ولا يتوسع.
وهذا واحد من القوانين الأساسية في لعبة البزنس.
