21/09/2026
متل اولت مبارح من ٤١ سنة اجيت هي الدنيا ..اول عشرين سنة ما كنت مسيطر عحياتي كتير بعدين مسكت زمام المبادرة ...
هاد يلي تعلمتوا بهال41 سنة ...
الشغف هو الوقود الوحيد يلي بيخلينا ماشين بهالدنيا عالصعيدين الشخصي والعملي..اي شي عم تعملوا خارج الشغف رح يوقف يوما ما
الانضباط هو الشي الوحيد يلي بيخليك توصل لاهدافك من دون الانضباط مافي شي بيكتمل
المحيط يلي حواليك بيخليك تعيد تعريفك لحالك دوما خلي محيطك ايجابي وناجح وعالم مرتبة ..العالم السلبية حظرها فورا ...
خليك ماشي بهدفك يلي انت حطيتوا لحالك واسمع راي الخبراء والناس الطيبة يلي بتحبك لكن ما حدى رح يعرف يقيم الوضع يلي انت فيه احسن منك خليك قلبك دليلك واتكل عالله ...
الانسان ما بيتعلم حرفيا الا من كيسو لازم تغلط لحتى تعرف شو يعني الصح اغلط قد ما بدك واخسر فلوس كمان صدقني مارح تتعلم غير هيك ...
العائلة اولا ودائما بغض النظر عن اي مشاكل معهم ..
عادي انت تغير هدفك كل فترة حتى لو ما وصلت للهدف يلي قبلو ممكن توصل للهدف الجديد اسرع ...
اقعد مع حالك كل يوم ساعة وانتقد حالك وتحدى الشخص التاني يلي جواتك لحتى تدربوا وتطلع احسن ما عندك ..
الرياضة هي عنصر كتير مهم وبدونها رح تكون حياتك اصعب ...
الاكل الصحي اطيب من الاكل العادي بس تتعود عليه ..
ما تقبل يمضى يوم جديد بدون ما تكون متعلم شي جديد ..
الناس بتفتحلك بواب بس انت الوحيد القادر تمشي فيه واذا ما قررت ونفذت مارح تستفاد شي...
انت المسؤول الوحيد عن حياتك وكل شي ببصير فيها ما دخل الظروف ولا العائلة ولا الرفقات ..
كل ما حققت هدف حط هدف اكبر واصعب
رح تجيك كتير فرص انت مفكرها فرص حقيقية شوفها لا تكبها لكن ممكن تطلع فقط تشويش عم يأخرك عم تحقيق هدفك ومع ذلك مارح تقتنع غير لتجرب ...
بالنهاية شكرا لكل الناس يلي تذكرت عيد ميلادي لحالها وعايدتني.
شكرا الكم وايامكم كلها اعياد ومحبة وفرح ونجاح
