13/04/2026
څوک ګټونکی شو !!؟
د امریکا او ایران ترمنځ په روان کړکېچ کې د سپینې ماڼۍ اهداف او د تهران مقاومت.
لیکوال :قریشي بدلون
دا خبره واضحه شوه چې امریکا د اسرایلو او منځني خلیج یو شمیر هیوادونو په ملاتړ سره وهڅول شوه ترڅو په ایران برید وکړي، له برید څخه د یادو هیوادونو د نورو ګڼو اهدافو ترڅنګ یو هدف داو چې د ایران نظامي قوت صفر کړي .
یادو هیوادونو د ایران له نظامي جوړښت څخه په تشویش کې دي، او ایران د ځان لپاره لوی خطر بولي، د ایران نظامي قوت هغه مهال ښه ښکاره شو چې کله په تیر کال کې د اسرایلو او ایران ترمنځ د هوایي بریدونو څپه پېل شوه ، ایران په اسرایلو او نیژدې هیوادونو کې ګڼ اهداف وویشتل چې ډیری هیوادونو یې طمعه نه درلوده ، دغې لڼډمهالې جګړې د ایران له نظامي قوت څخه پرده پورته کړه.
لدې جګړې روسته ټرمپ اړ کړای شو چې د ایران مهارولو لپاره منځي خلیج ته سفر ترسره کري ، ټرمپ سعودي عربستان ، عرب امارات او قطر کې پراخې لیدنې ترسره او په ډېرو مواردو له بحث روسته یې له اړونده هیوادونو سره ښکاره او پټې هوکړې لاسلیک کړې .
امریکا+اسرایل او خلیجي هیوادونو لاندې اهدافو تر لاسه کولو لپاره په ایران برید ترسره کړ .
د ایران رهبري ختمول .
حکومت یې منحل کول .
د ایران هوایي او توغندیز ځواک ختمول .
یورانیم یې تر لاسه کول .
هرمز تنګي کنترول اخیستل .
د ایران تېلو او نفتي موادو ته لاس رسی پیداکول .
په ایران کې د خپلې خوښې اداره رامنځته کول .
ایران په وهلو سره سیمه کې د امریکا نور دښمنان ویرول .
دغو موخو ترلاسه کولو لپاره امریکا د اسرایل او منځي خلیج هیوادونو په ملاتړ په ایران پراخ بریدونه وکړل،امریکې په شاوخوا څلوېښت ورځنۍ جګړه کې د ایران په سترو ښارونو کې شاوخو دولس زره ملکي او نظامي اهداف وویشتل ، امریکا خپل ټول قوت سره په ایران کې اهداف په نښه کړل او خپله ټوله نوې ټیکنالوجي و ازمایله ، اټکل له مخې امریکا تر دا مهاله پدې جګړه کې شاوخوا شل ملیارده ډالر مصرف کړي .
خو ایران له دومره پراخو بریدونو سره بیا هم تسلیم نشو، دوی مهم مشران د ایت الله خامنی په شمول د برید په لومړيو ورځو کې له لاسه ورکړل.
خو د هرې ورځې برید په ځواب کې ایران سمدستي کلک ځواب امریکا او اسریلو ته ورکړ ، ایران په فارس خلیج کې د امریکا لویې نظامي اډې د بالاستیک توغندیو پرمټ وویشتې چې شاوخوا اوه سوه امریکایي نظامایان یې پکې ووژل .
په هرمز تنګي یې واک د پخوا په پرتله پراخه کړ او په نړیواله کچه یې د نفتي موادو بیعه لوړه کړه .
د خپلو کم مصرفه ډرون الوتکو پر مټ یې په اسرایل او سیمه کې پراخې ویجاړۍ رامنځته کړې ، را پورونو له مخې یواځې په اسرایلو کې یې شاوخوا درې زره اسرایل ټپیان او ووژل.
اوس پوښتنه دا ده چې ایران دومره لوی مقاومت پرڅه وکړ تر شا یې پټ او ښکاره راز څه دی !؟
تر ټولو مهم راز یې د نظام پراخ ولسي ملاتړ و ، له کومې ورځې چې پر ایران برید شوی له هغې ورځې تر دې دمه ایرانی ولس په پراخه کچه د نظام په ملاتړ لویو واټونو ته راوتی او د خپلې خاورې دفاع او د نظام لپاره شعارونه بدرګه کوي .
۲: بله داچې ایران په عصري ټیکنالوژی سمبال منظم هوایي او بحري ځواک لري ، دغه لوی نظامي قوت جګړه او بېړنی حالات خورا ښه مدیریت کړ ، د امریکا او اسرایلو ګڼ شمیر بریدونه یې شڼډ کړ او همدا راز یې خپل اهداف په پراخه کچه په ډیر لوړ مرال سره وویشتل .
۳: ایران په ډیر مهارت سره رسنۍ مهار کړې ، تر اوسه پورې په هیڅ رسنۍ کې د ایران پراخې نظامي ویجاړۍ د دولت له هماهنګۍ پرته خپرې نشوې ، ټول ملت یې داسې مهار کړ چې د هیڅ یو شخص له سوشل مډیا څخه کومه ویډیو یا انځور نشر نشو .
۴: ترټولو مهمه دا ده چې د جګړې له پایله تر پایه د ایراني چارواکو بهرنی دریځ ډیر غښتلی و ، او تل یې په سمدستي ډول د امریکا ولس مشر هرې خبرې ته د پام وړ غښتلی دریځ ښودلی، که امریکا د جګړې شدت خبره کوله دوی هم هماغسې ځواب ور کاوه ، که امریکا د دیپلوماسۍ خبره کوله دوی ځواب هم ورته هماغسې و ، په ټوله کې بهرنی دریځ یې تر دا مهال دښمن پر وړاندې ډیر پیاوړی او د ټولو لوړ رتبه چارواکو دریځ یې یو ډول دی ، له مشره تر کشره یې خبره یوه ده .
۵: د سیمې په کچه د امریکا برید ته غبرګونونه او د ایران نا اعلان شوی ملاتړ هم ددې لامل شو چې ایران لا د جګړې په میدان کې ډاډه کړي ، د روس او چین یو څه نظامي او استخباراتي ملاتړ یې ښه مثال دی .
زما په فکر پورته پنځه مهمې نقطې دي چې ایران تر اوسه په جګړه کې له ماتې سره ندی مخ شوی او دا دی تر اوسه ښه مقاومت کوي.
په ورستیو کې باید یادونه وکړم چې هر هېواد که غواړي په نظامي او نورو برخو کې هيواد له نورو سره سیال کړي ، باید ولسي ملاتړ ولري ، نوې جګړیزه ټکنالوژۍ تر لاسه کړي ، نړیوال دوستان ولري ، او تبلیغاتي دستګا یې کنترول او په بشپړ ډول د حکومت په لاس کې وي .
اخره کې وایم راځئ چې د سیمې لدې جګړو څخه زده کړه وکړو ، شته فرصتونه ضایع نکړو او د هیواد ساتنې او پرمختګ لپاره شپه او ورځ په ځان یوه کړو .
وَمَا عَلَی٘ناَ اِلاَّالبلاغ
