21/09/2026
ESTRENO TA LANTA BUELO PA
SELEBRÁ 50 AÑA DI KARNAVAL
Destinashon: Mei Siglo di Estreno
WILLEMSTAD, KÒRSOU — Pa Karnaval 2027, Estreno Carnival Group ta invitá pueblo di Kòrsou pa subi abordo di un buelo hopi speshal. Bistí komo tripulashon di kabina i kapitan, Estreno lo hiba e públiko riba un biahe den tempu, ku un solo destino dilanti: 50 aña di Estreno.
E konsepto ta selebrá mei siglo di historia, kreatividat, dedikashon i Karnaval. Mas ku solamente un tema, e biahe akí ta un tributo na tur hende ku a yuda konstruí Estreno i ku a kontribuí na e lugá ku e grupo tin awe den Karnaval di Kòrsou.
Durante 50 aña, un gran kantidat di mannan a traha tras di kortina i un kantidat inkontabel di persona a kana, baila, toka i selebrá huntu ku Estreno. Miembronan di direktiva di pasado, kosedónan, miembronan, músikonan, DJs, bandanan, diseñadónan, ayudantenan, boluntarionan, famia i amigunan, tur a karga un parti di Estreno durante e biahe.
Karnaval 2027 ta dediká na nan.
E historia ta ser kontá atrabes di mundu di aviashon. Miembronan di Estreno ta bira tripulashon di kabina i kapitan di e buelo di aniversario, miéntras ku kayanan di Kòrsou ta bira e pista pa un biahe atrabes di sinku dekada di rekuerdonan.
E trahenan ta duna bida na e konsepto ku diferente elemento rekonosibel di aviashon, manera avion i pechi di tripulashon, kombiná ku e koló ku ta representá e gran selebrashon akí: oro.
Detayenan i asesorionan koló di oro ta forma parti importante di e trahenan, simbolisando e aniversario di oro di Estreno. Sinkuenta aña. Mei siglo. Un momento históriko ku no ta representá solamente kuantu tempu Estreno ta eksistí, sino tambe generashonnan di trabou duru, kreatividat, amistat i amor pa Karnaval. Kada detaye ta konektá e selebrashon di awe ku e biahe ku a trese nos te aki.
Un Biahe Atras den Tempu
E biahe a kuminsá durante e Costume Reveal ofisial di Estreno, djasabra 19 di sèptèmber 2026 na Dome – Capital Ç. Pa un anochi, invitádonan a check in i eksperensiá e prome parti di e buelo di aniversario di Estreno. Pero promé ku wak dilanti pa Karnaval 2027, Estreno a wak bèk promé.
Komo parti di e eksperensia, un Museo spesial di Estreno a presentá trahenan i rekuerdonan di añanan anterior, tresiendo pida di historia di e grupo huntu den un espasio.
E museo a sirbi komo un rekordatorio ku e trahenan presentá pa 2027 no a bin di un dia pa otro. Nan ta parti di un historia ku a wòrdu skibí durante dékadanan pa generashonnan di
Estrenista. Kada trahe di pasado ta representá su mes aña, su mes grupo di hende, su mes músika, su mes selebrashonnan i su mes rekuerdonan.
Huntu, nan ta konta e historia di Estreno.
50 Aña Ta Mas Ku Un Anochi Estreno su aniversario di oro lo no ta limitá na e Costume Reveal òf e paradanan di Karnaval
so. Durante e lunanan promé ku Karnaval 2027, e grupo lo sigui ku su biahe den pasado, rebish*tando momentunan spesial di su historia i rekonosiendo e hendenan ku a yuda forma Estreno durante tur e añanan.
Historianan, potrètnan, trahenan, selebrashonnan i momentunan inolvidabel lo trese diferente kapítulo di e historia di e grupo bèk den spotlight.
E ta un oportunidad pa rekorda di unda Estreno a bin, honra esnan ku a yuda konstruí esaki i introdusi un generashon nobo na e legado ku nan ta hiba dilanti awor.
Pasobra nunka un grupo di karnaval ta wordu konstruí pa un persona, un direktiva òf un generashon. E ta wordo konstruí aña tras di aña, trahe tras di trahe, parada tras di parada.
Nos Destinashon: 50 Aña di Estreno
Ora Estreno subi kaya pa Karnaval 2027, e pasaheronan kantu di e ruta lo no simplemente mira tripulashon di kabina, kapitan, avion i oro. Nan lo mira 50 aña di Estreno ta move den kayanan di Kòrsòu. Nan lo mira e trabou di e kosedónan ku a dediká hopi oranan dunando bida na trahenan. E
kompromiso di miembronan di direktiva ku a yuda guia e grupo. E músikonan i bandanan ku a duna Estreno su himno. E ayudántenan ku a traha tras di kortina. E miembronan ku
orguyosamente a bisti e trahenan. I e famianan, sostenedornan i mirones ku a hasi e trayekto posibel.
Karnaval 2027 ta un selebrashon di nan tur.
E buelo di aniversario di Estreno a kuminsá ofisialmente.
Nos destinashon: 50 aña di historia.
Nos biahe: e legado di Estreno.
Nos selebrashon: Karnaval 2027.
Bon Bini abordo.
Estreno Carnival Group
Selebrando 50 Aña.
