07/06/2026
HUSTISIA
MINISTER DI HUSTISIA TA TUMA MEDIDA TEMPORAL DI VISA PA MOTIBU DI OUTBREAK DI EBOLA
PUBLIKÁ RIBA 07 YÜNI 2026
Willemstad, 7 di yüni 2026, – Minister di Hustisia a disidí temporalmente no emití Visa Karibense na aplikantenan for di paisnan ku pa outoridatnan internashonal i nashonal kompetente a wòrdu identifiká komo área di haltu riesgo relashoná ku e outbreak aktual di Ébola.
Motibu di e medida ta e situashon di emergensia internashonal den kuido di salú públiko deklará pa Organisashon Mundial di Salú (WHO). Apesar ku na momentu aki no tin kaso di Ébola konfirmá na Kòrsou, gobièrnu ta konsiderá ku ta nesesario pa aktua na tempu i di manera responsabel komo medida preventivo pa protehá salú públiko.
E desishon a ser tuma den kuadro di e Lei Rijksvisumwet, ku ta permití rechasá petishonnan di visa si tin riesgo pa salú públiko. E proseso di evaluashon i emitimentu di Visa Karibense ta tuma lugá via representashonnan diplomátiko Hulandes ku ta enkargá ku ehekushon di e maneho di visa pa e region Karibense.
E medida temporal ta apliká, entre otro, na petishonnan di visa for di Repúblika Demokrátiko di Congo, Uganda, Ruanda, Tanzania, Angola i Sudan di Sur. E lista di paisnan involukrá por ser adaptá si e situashon epidemiológiko kambia òf si nobo konseho di organisashonnan internashonal di salú duna motibu pa hasi esaki.
Promé ku tuma e desishon, a tin koordinashon ku Ministerio di Salubridat, Medio Ambiente i Naturalesa (GMN). Ademas, e outoridatnan involukrá ta mantené kontakto estrecho ku partnernan internashonal i instansianan di salú pa sigui e desaroyonan relashoná ku e outbreak. Basá riba análisis aktual di riesgo, lo evaluá si tin mester di implementá medidanan adishonal òf flexibilisá e medidanan eksistente.
Minister di Hustisia, mr. Shalten Hato, a deklará: “Esaki ta un medida preventivo. Na momentu aki no tin kaso di Ébola na Kòrsou, pero gobièrnu ta mira komo nesesario pa aktua na tempu i di manera responsabel pa protehá salú públiko. Seguridat i salú di nos poblashon ta bini promé.”
Protekshon di e poblashon di Kòrsou ta un prioridat pa gobièrnu. Mediante akshon preventivo, gobièrnu ke limitá tantu ku ta posibel e riesgo di introdukshon i propagashon di enfermedatnan infeksioso serio. Ora e situashon epidemiológiko permití, lo evaluá si e medida por ser adaptá òf eliminá.
