17/06/2026
𝐖𝐀𝐑-𝐒𝐀𝐗𝐀𝐀𝐅𝐀𝐃𝐄𝐄𝐃
Fadhigii 65-aad ee Shirka Golaha Wasiirrada Jamhuuriyadda Somaliland oo uu Shir-guddoominayey Madaxweyne ku-xigeenka JSL ahna ku-simaha Madaxweynaha, Mudane Maxamed Cali Aw Cabdi ayaa ka qabsoomay Qasriga Madaxtooyada JSL.
Qodobbada lagaga wada hadlay Fadhiga 65-aad ee Shirka Golaha Wasiirrada Jammhuuriyadda Somaliland waxa ka mid ahaa:
𝟏) 𝐖𝐚𝐫𝐛𝐢𝐱𝐢𝐧𝐭𝐚 𝐗𝐚𝐚𝐥𝐚𝐝𝐝𝐚 𝐆𝐮𝐮𝐝 𝐞𝐞 𝐀𝐦𝐧𝐢𝐠𝐚 𝐃𝐚𝐥𝐤𝐚:
Wasiirka Arrimaha Gudaha iyo Amniga Qaranka JSL, Mudane Cabdalle Maxamed Carab ayaa Golaha Wasiirrada uga xog-warramay xaaladda guud ee amniga dalka, isaga oo xaqiijiyey in guud ahaanba amniga iyo xasilloonida Qaranka JSL ay sugan tahay, isla markaana aanay jirin wax qalalaase ama amni-darro ah.
Wasiirku waxa uu sheegay in Hay’adaha Amniga Qaranku ay heegan buuxa ku jiraan oo ay xoojiyeen tallaabooyinka lagu sugayo amniga, isaga oo bulshada Jamhuuriyadda Somaliland ugu baaqay in xilligan iyo marxaladda cusub ee uu dalkeenu galay ay si buuxda uga qayb qaataan ilaalinta nabadda iyo xasilloonida dalka.
𝟐) 𝐖𝐚𝐫𝐛𝐢𝐱𝐢𝐧𝐭𝐚 𝐗𝐚𝐚𝐥𝐚𝐝𝐝𝐚 𝐆𝐮𝐮𝐝 𝐞𝐞 𝐃𝐡𝐚𝐪𝐚𝐚𝐥𝐚𝐡𝐚 𝐃𝐚𝐥𝐤𝐚:
Wasiirka Wasaaradda Maaliyadda iyo Horumarinta Dhaqaalaha JSL, Mudane Cabdilaahi Xasan Aadan ayaa Golaha Wasiirrada uga xog-warramay wada-shaqaynta wanaagsan ee ka dhaxaysa Wasaaradda iyo Baanka Adduunka, isaga oo tilmaamay habsami-u-socodka mashaariicda badan ee uu maalgeliyo Baanka Adduunku.
Wasiirku waxa kale oo uu Golaha la wadaagay booqashadii uu dalka ku yimid Wakiilka Baanka Adduunka ee Somaliland, Mr. Hideki Matsunaga, kaas oo ku bogaadiyey Xukuumadda JSL iyo Wasaaradda wada-shaqaynta wacan iyo masuuliyadda ay muujiyeen, isla markaana booqday Dekedda Berbera iyo Berbera Free Zone-ka si uu ugu kuurgalo horumarka ka socda kaabeyaasha dhaqaalaha dalka.
Dhinaca kale, Wasiirka Maaliyaddu waxa uu Golaha Wasiirrada uga warramay saamaynta dhaqaale ee ka dhalatay xiisadaha Bariga Dhexe iyo carqaladaha ka jira Marrin-biyoodka Hormuz, kuwaas oo sababay kor u kac ku yimi qiimaha shidaalka, kharashaadka gaadiidka badda iyo caymiska, isla markaana horseeday sicir-barar iyo culays dhaqaale oo saameeyey nolosha bulshada.
𝟑) 𝐖𝐚𝐫𝐛𝐢𝐱𝐢𝐧𝐭𝐚 𝐗𝐚𝐚𝐥𝐚𝐝𝐝𝐚 𝐆𝐮𝐮𝐝 𝐞𝐞 𝐂𝐚𝐚𝐟𝐢𝐦𝐚𝐚𝐝𝐤𝐚 𝐃𝐚𝐥𝐤𝐚:
Wasiirka Wasaaradda Horumarinta Caafimaadka JSL, Mudane Dr. Xuseen Bashiir Xirsi ayaa Golaha Wasiirrada si faahfaahsan uga xog-warramay xaaladda guud ee caafimaadka dalka, isaga oo si gaar ah diiradda u saaray dadaallada ay ku jirto Wasaaradda Horumarinta Caafimaadku ee lagula tacaalayo xanuunnada Xummadda Dengue iyo Chikungunya oo uu Wasiirku sheegay in uu muuqdo hoos u dhac balse loo baahan yahay feejignaan caafimaad iyo ka hortag degdeg ah.
Wasiirku waxa uu sheegay in Wasaaraddu ay xoojisay ololaha Wacyigelinta Bulshada, isla markaana ay si joogto ah u baahiso farriimo ku saabsan ka hortagga kaneecada faafisa xanuunnadan, iyo muhiimadda ay leedahay in bulshada iyo hay’adaha deegaanku iska kaashadaan xakamaynta fiditaanka cudurrada.
Dhinaca kale, Wasiirku waxa uu Golaha la wadaagay habsami-u-socodka Ololaha Qaran ee Dhiig-bixinta oo socda 14–18 June 2026, kaas oo lagu dhiirri-gelinayo ka-qaybgal ballaadhan ee shacabka JSL si loo xoojiyo Kaydka Dhiigga Qaranka ee xarumaha caafimaadka dalka, loogana jawaabo baahiyaha degdegga ah ee bukaanada.
Ugu dambayn, Wasiirku waxa uu xusay qorshaha istiraatiijiga ah ee Wasaaradda ee 2027, oo ah ka mid dhismaha Xarunta Kaydka Dhiigga Qaranka, taasi oo noqon doonta tallaabo muhiim ah oo kor loogu qaadayo tayada adeegyada caafimaadka dalka.
𝟒) 𝐖𝐚𝐫𝐛𝐢𝐱𝐢𝐧𝐭𝐚 𝐖𝐚𝐬𝐚𝐚𝐫𝐚𝐝𝐝𝐚 𝐊𝐚𝐥𝐥𝐮𝐮𝐦𝐚𝐲𝐬𝐢𝐠𝐚 𝐢𝐲𝐨 𝐊𝐡𝐚𝐲𝐫𝐚𝐚𝐝𝐤𝐚 𝐁𝐚𝐝𝐝𝐚:
Wasiirka Kalluumaysiga iyo Khayraadka Badda Jamhuuriyadda Somaliland, Mudane Cali Jaamac Faarax (Buureed), ayaa Golaha Wasiirrada warbixin guud ka siiyey in xaaladda guud ee kalluumaysiga dalka ay soo hagaagayso, isla markaana bilihii u dambeeyey uu kordhay wax-soo-saarka kalluunka iyo iibkiisa suuqyada magaalooyinka waaweyn.
Wasiirku waxa uu tilmaamay in korodhka isticmaalka kalluunku uu la xidhiidho qiimaha hilibka oo sare u kacay iyo saamaynta abaaraha ee xoolaha taas oo kordhisay baahida kalluunka ee magaalooyinka waaweyn.
Dhinaca kale, Wasiirku waxa uu xusay in weli wax-soo-saarka kalluunka dalka uu hooseeyo, isla markaana loo baahan yahay in la kordhiyo si loo daboolo baahida gudaha iyo suuqyada dalalka jaarka ah.
Ugu dambayn, Wasiirku waxa uu sheegay in Wasaaraddu ku hawlan tahay fududeynta helitaanka shahaadadda caafimaadka ee caalamiga ah ee kalluumaysatada, si loo xoojiyo dhoofka kalluunka loona ballaadhiyo suuqyada gobolka iyo caalamkaba.
𝟔) 𝐇𝐚𝐝𝐚𝐥𝐤𝐚 𝐆𝐮𝐧𝐚𝐚𝐧𝐚𝐝𝐤𝐚 𝐌𝐚𝐝𝐚𝐱𝐰𝐞𝐲𝐧𝐞 𝐤𝐮-𝐱𝐢𝐠𝐞𝐞𝐧𝐤𝐚:
Gabagabadii Shirka Golaha Wasiirrada, Madaxweyne ku-xigeenka JSL ahna ku-simaha Madaxweynaha ayaa Golaha ku adkeeyey muhiimadda ay leedahay ilaalinta midnimada iyo wadajirka shacabka Somaliland, isaga oo ku baaqay in la xoojiyo wacyigelinta bulshada ee ku saabsan ilaalinta amniga iyo xasilloonida Qaranka, gaar ahaan marxaladda xasaasiga ah ee uu dalku marayo, gaar ahaan aqoonsiga Somaliland ee dalka Israa’iil oo Cadowga Somaliland godadka ka soo wada baxay.
Sida oo kale, Madaxweyne ku-xigeenku waxa xusay carrabkana ku adkeeyey muhiimadda ay leedahay feejignaanta iyo iskaashiga shacabka si looga hortago cid kasta oo wax u dhimaysa danaha Qaranka.
𝐀𝐋𝐋𝐀𝐀 𝐌𝐀𝐇𝐀𝐃 𝐋𝐄𝐇
𝐗𝐮𝐬𝐞𝐞𝐧 𝐀𝐚𝐝𝐚𝐧 𝐂𝐢𝐠𝐞 (𝐃𝐞𝐲𝐫),
𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝
