Nazim Nouail

31/12/2025

الحمد لله الذي بنعمته تتم الصالحات ...

08/12/2025

SMART SELLERS SUMMIT Special Edition le 14 15 et 16 Decembre 2025 a l'hotel sheraton

19/07/2025

28/02/2025

♦️ مهما تعلمت فالدنيا راح تبقى دايما تتعلم
♦️ وكل يوم هو درس جديد فالحياة
♦️ ولازم دايما تبقى واع بلي فوق كل ذي علم عليم
⚡️والنهار لي تحط في راسك بلي خلاص راك وصلت => هذاك هو نهار نهايتك 💥

15/01/2025

♦️ اذا راك حاب تولي تبيع بزاف لازمك طور مهاراتك في ثلاث نقاط اساسية والرابعة اخطيك منها بالرغم انها تجيب نتائج جيدة : 👇👇👇

✅️ مهارة الإتصال : مهمة جدا لأنك بها راح تقدر تتواصل مع العملاء المحتملين وفن الاتصال يوصلك للبعيد سواء فالبيع او حتى حياتك بصفة عامة.

✅️ مهارة الإقناع : هذي ايضا مهارة ماش ناس بزاف يتقنوها والأغلبية يخلطو بين أنو يثبت على رأيو وبين يقنع الناس يرأيو ماش كيف كيف ودير في بالك انها من أصعب المهارات لان البشر صعب جدا أنك تبدلهم معتقداتهم وتغيرلهم رأيهم ومايحبوش يستعرفو بانو كاين رأي احسن وأصح من رأيهم ، والانبياء والرسل خير دليل على ذلك مع الاقوام لي كانو عايشين فيهم.

✅️ فهم بسيكولوجية البشر :
هذي المهارة راح تخليك تفتح وتسهل صعوبات المهارة لي قبلها لي هي الإقناع وترجعك ايضا تتواصل بسلاسة يعني تعززلك المهارة الاولى

❌️ مهارة الخداع والكذب :
هذي المهارة يستعملوها الكثير من البياعين والمسوقين بحيث توصلهم للنتيجة المبتغاة بسرعة وفعالية كبيرة ، وتجيبلك واش راك حاب حقيقة وعليها الكثير وأقولها الكثير يستعملها ولكن للاسف الخداع حبلو قصير

ركز على الثلاثة الاولى وراح تنجح ✅

09/01/2025

❌️ ما تلصقش الفشل تاعك في العوامل الخارجية لي ماعندكش عليهم تحكم مباشر كيما شركة التوصيل والزبون.

👎 والفنا كيما تنجحش الحاجة أو ماتمشيش كما مخطط لها نلقاولها 1000 عذر باش نبررو الفشل هذاك 💥

ولكن الحقيقة أنو المشكل راهو فيك انت وحدك وليس غير ♦️
انت لي خيرت المنتج ⚡️وانت لي درت الاشهار ⚡️وانت لي طلقت الاشهار ⚡️وانت لي خيرت شركة التوصيل ⚡️وانت لي خدمت الفريق لي معاك (ويلا راك وحدك مانحكيوش)

✅️ تعلم تتحمل مسؤوليتك وبركاك من إلقاء اللوم على الغير من شركات وزبائن
✅️ اتعلم تلقى الحلول للمشاكل لي تصادفك يوميا بلا ماتبقى تحاول تتحجج بالغير
✅️ اخرج من دور الضحية قبل ماتغرق في بحرو ومن بعد تكملها فاشل طول حياتك

08/01/2025

✅️ البزنس رحلة او مغامرة تخوضها مع ناس آخرين (شركاء ، عمال ، موردين ، عملاء........)
والعمل لايرتكز عليك وحدك 🤔
يعني حتى وانت غائب العمل يبقى يمشي بالطريقة الصحيحة والمخرجات بالجودة اللازمة 🔥
وباش توصل للمستوى هذا عمل كبير لازمو يكون فالمناجمنت الداخلي والخارجي للشركة ♦️
وهذو وحدهم مواضيع عميقة تحتاج محتوى معمق
راح نشوفوهم مستقبلا.

أما التبزنيس فهو أنك حاط روحك مداير بزنس ولكن كل شي راكب عليك وحدك وانت اصلا وحدك وحتى اذا كان معاك 2 ولا 3 عباد ولكن كون تخطي انت كل شي يحبس ضربة وحدة 😢
وكاين المثال الثاني تع التبزنيس لي يكون مع جماعة مدايرة بزنس وهو بلاطاي فقط لا قيمة مضافة له ، هذا ثاني مايطولش ويلقى روحو وحدو يتكركر 😫

07/01/2025

راك حاب تتعلم كيفاش دير بزنس ولا راك حاب تبزنس فقط ⁉️⁉️

الطريقين في الظاهر كيف كيف ولكن صدقني جوهرهما مختلف تماما 😮

البزنس قائم على ضوابط وعقلية خاصة وتفكير ناضج ورؤية على المدى المتوسط والبعيد 👍

أما التبزنيس فعقليته واضحة ونشوفوها يويما :

الربح السريع ، الفائدة ولاغير ومهما كان ، رؤية لحظية تحت شعار : منا غدوة بعيد لحال 🤣
والمهم والأهم أنو مايهمش الزبون لأنهم كاينين بزاف والخطأ فيهم ماش فيك على خاطر علابالو بلي المنتج جيد والزبون لي مايستاهلش 😅

خمم مع روحك وخير وين راك حاب تكون بلا ماتكذب على روحك ❌️

كي تخير موراها نحكيو في أمور أخرى 🔥

06/01/2025

⚠️ قانون الإعلانات على الأنترنت اللذي لن يستطيع أي أحد شرحه ولكنه أحسن قانون :

⚡️تاست ،⚡️ تاست ،⚡️ تاست ........

💥التاست وحده السبيل للوصول الى نتائج جيدة

😅 يعني دير كرياتيف واحد ولا زوج ومن بعد تقول راني خادمهم مليح وصارف عليهم دراهم بصح مكان والو يعني المنتج مش خدام 👎

لا راك ربما غالط ❌️ بالاك المنتج جيد وانت ماعطيتوش حقو هذا مكان 🤔

ليكرياتيف والتاست هوما لي يوصلوك للنتيجة
خلي الزبون يقولك ماش انت لي تقرر في بلاصتو ✅️

ماتنساش :
⚡️تاست ⚡️ تاست ⚡️ تاست ......

05/01/2025

✅️ النجاح فالديجيتال قبل كل شيء قضية امتلاك عقلية صحيحة تفكر بيها
😫 نسمع ناس بزاف يقولك واش هي التقنية الأحسن باش نتيستي منتج فالفايسبوك ، واش هي أحسن طريقة باش نسكايلي ، واش هي احسن طريقة باش يهبطلي الثمن الاعلاني.........😢

👍الحاجة الاولى كون جيت تفهم بلي هذيك راي منصة اعلانية والاعلان كاين قبل ما هذوك المنصات يكونو اصلا ، يعني كون تفهم كيفاش تعلن من وراها افهم كيفاش تستعمل المنصات الاعلانية وراح تشوف نتائج عجيبة.🥳

المهم واش حبيت نقولك اليوم : 🧩
كي تفهم الأصل تع الحاجة تقدر تفهم كيفاش تتعامل معاها وكي تكون عندك هذ العقلية راح تروح بعيد 🎯
ماتبقاش حاصل فالتقنيات وتقول أي ماتمشيش لأنو الديجيتال جاء باش يزيد المردودية ماش باش يعوضها💪

04/01/2025

♦️اذا راك حاب تبيع منتج ملموس
علاش راك دور بزاف على الموضوع ودير في هوك تاع سينيما وتبقى طول فالحكاية 🤔
🎯 خير الزاوية تاعك مليح ودير هوك طول بالمشكل
من بعد خرج المنتج وابرز الفايدة تاعو باش يحل هذاك المشكل .
✅️ وكي تكمل ماتنساش تقول للزبون باش يشري على خاطر السلعة راهي مكانش واذا راطا الفرصة درك مايجيش يبكي غدوة

⛔️ التفلسيف الزايد هو لي يطلعلك ثمن الاعلان ويوسوس الناس مايشريوش عليك

راك في دزاير ما تنساش على روحك 😉

02/01/2025

اذا حاب تنجح فالتجارة الالكترونية (سواء منتجات ملموسة او منتجات رقمية )

اتفكر دايما هذي القاعدة : 👇👇

♦️منتج غير جيد + تسويق جيد = دراهم قلال

♦️منتج مغشوش + تسويق جيد = دراهم بزاف بصح حرام

♦️منتج جيد + تسويق سيء = دراهم قلال

♦️منتج مغشوش + تسويق سيء = دراهم حرام وقلال

♦️منتج جيد + تسويق جيد = دراهم بزاف وحلال