10/02/2020
اول مرة اروح عمرة.. كنت فاكر بقي الكعبة زي الل بتيجي 24 ساعة ع قناة السعودية قرآن وخلاص انا شايفها قدامي ف التلفزيون علطول ..
اول ما روحت وقفت قدامها - زُهلت - ايه الحجم دا !! عيطت ف ساعتها عشان الاحساس اللي هتحسه ساعتها مينفعش يتوصف، جسمي كله اترعش .. احنا ف بيت ربنا !! احنا فعليا عند الكعبه 💙
بتدعي ف البيت وانت مطمن ، بتطمن اكتر لو تدعي ف المسجد ، تطمن اكتر لو بتدعي ف مسجد المدينة ثم الختام.. الدعوة التي لا تُرد " بيت ربنا "
نزلت كام خطوة .. بدأنا نطوف .. و حاولت نطوف لجوا عشان نحاول نلمسها ♥️
هنلمس الكعبة ! لا مش هقدر
شوية .. بقي عندي فضول
كل مااقرب .. اتصدمت ان الكسوة اصلا مش سادة ومكتوب عليها .
لحد ماجت الفرصة ولمستها .
المفروض ساعتها تدعي ! بس انا تفكيري اتشل .
انا لامس الكعبة
بصيت لفوق .. عالية جداً مش مكعب صغير زي ما بيجي ف التلفزيون فوق اكتر ..
اول شوطين ف الطواف مكنتش بدعي .. قد ما كنت مذهول بكل الل حواليا
هو إحنا فعلاً في بيت ربنا ❤ !
الهوا ريحته مختلفة،
صوت الدعاء خارج من كل حد حواليك.
السما شكلها مختلف تماماً عن السما اللي عارفينها.
جنبك حد متشعلق ف كسوة الكعبة ومن قهرته بيقوله : سامحني
حد تاني قهرته اعلي : يارب اهديني انا تعبت .
بتبدأ تستوعب ان دي الفرصة الاخيرة ليك .
سجودك ف الصحن بيخليك عايز تموت هنا ..
" انا عايزه أموت هناك ❤ ". احساس انك بتصلي وانت شايفها قدامك.. لحظة بلحظة .. انت مش بس ف خشوع ! انت من كتر هيبتها بتبكي بشكل لا ارادي ف الصلاة
" بتوحشك " ❤
هتحسها شخص بتحبه جدا كل ما تبعد عنه بتشتاقله.. ♥️♥️
متموتش قبل ما تشوف الكعبة وتلمسها، وتتوضى هناك وتشرب من مياة زمزم.. وتمشي ع السيراميك الساقع، وتصلي الفجر ورا ماهر المعيقلي وتسمع خطبة الجمعة ف الحرم .. وتجرب مشاعر مش هتحسها تاني ❤
🌸♥️
