05/05/2023
ازاى تقدر تزود قاعده عملائك !
هنحاول نعرض بعض النصايح اللى هتساعدك انك تزود قاعده عملاء البيزنس بتاعك
📌 حاول انك تقدم خصومات وعروض ترويجيه للعملاء الجديده
المستهلك الفتره دي بيبحث بشكل كبير على قيمه وصفقه فى نفس الوقت . فانت حاول انك تغريهم بنشاطك من خلال انك تقدملهم خصومات تمهيديه فى الاول , او مثلا عروض زي انك تشتري حاجه وعليها حاجه هديه او بنص السعر او عرض مجاني لاول 3 عملاء هيشتروا . النوع دا من الترويج بيجذب عملاء جديده ممكن انهم يتعاملوا معاك بشكل كبير لكنهم محتاجين منك الحافز اللى يشجعهم علشان يشتروا . ثم تتابع معاهم بعد كدا وتحاول تشوف بيشتروا ايه ثم تستهدفهم من خلال رسائل تسويقيه فيها تحفيز لانهم يشتروا منك تانى ويزيد درجه الولاء ليك وللبيزنس بتاعك .
📌 اطلب تقييمات من عميلك
بمجرد ما تحس ان العميل بتاعك بقي عنده درجه ولاء ليك ولنشاطك , اطلب منه تقييم على طول .
العملاء الحاليين دول افضل مصدر للعملاء الجديده . لكن متستناش ان العميل هو اللى يجي يقولك عايز اقيم البيزنس او الخدمه بتاعك .
حاول تعمل لنفسك منهج او خطه منظمه بيحث توصل لعميلك اللى راضى عن عملك وتقدر تاخد منه التقييم وتخليه يرشحك لناس قريبه منه زي اصحابه او عائلته وهكذا ..
لما تبني نظامك علشان توصل لرضا العملاء , متنساش انك تتباع معاهم بعد ما يشتروا المنتج او الخدمه بتاعك , فحاول انك تتباع معاهم بعد ما اشتروا المنتج من خلال مكالمه او رسائله تتاكد انهم راضيين عن المنتج بتاعك , لان دا بيفرق جدا , ولو حسيت انهم راضيين فعلا حاول تطلب منهم انهم يقيمو المنتج الخاص بيك .
📌 اتواصل مع عملائك القدام
حاول انك ترجع لقايمه الارقام الخاصه بعملائك القدام اللى اشتروا منك , لكنهم بقالهم فتره مشتروش , وهنا حاول انك تعمل نظام جدول مثلا كل 3 شهور , وحدد العملاء اللى مشوفتهمش بقالك 3 شهور , حاول انك تبعتلهم رسايل او تتواصل معاهم بمكالمه , توصلهم رساله انك مفتقد لعميلك دا , ولو تواصلوا معاك حاول تعملهم خصم او عرض خاص بيهم يحفزهم مره تانيه .
📌 تحديث الموقع الخاص بيك بشكل مستمر
اكتر طريقه الناس بتبحث بيها سواء المستهلكين او الشركات علشان يوصلوا لاحتياج جديد , انهم بيبدأو يبحثوا على جوجل .
فدا معناه ان الموقع بتاعك لازم يكون بيتحدث بشكل مستمر ويظهر فى الصفحات الاولى لمحركات البحث علشان العملاء يقدروا يوصلولك بشكل اسهل واسرع , فانت تبدأ تحاول انك تحسن موقع الويب الخاص بيك وتخليه سهل الاستخدام .
لان شكل الموقع وسهوله استخدامه وسرعه تحميله بتفرق جدا , فالصور المتحركه والرسومات بتأثر بشكل كبير على موقعك وبتخلى سرعه تحميله بطيئه جدا . فلو انت معندكش الخبره الكافيه انك تنشئ وتحسن موقع الويب الخاص بيك ممكن تستأجر شركه تصمملك الموقع وتحسنلك ظهورك على محركات البحث (SEO) .
📌 اتعاون مع شركات تكمل البيزنس بتاعك
التعاون مع شركات مماثله لنفس نشاطك ويعتبر ليها نفس قاعده العملاء بتوعك , ولكن الشركه مش قادره تنافس بشكل مباشر , فتبدأو تحطوا استراتيجيه لى ازاى تبدأو تسوقوا العملاء لعبض علشان تفتحوا لبعض طرق جديده للتعاون , طريقه ذكيه جدا بتجذب عملاء جديده مع عدم انفاق مبالغ كبيره , فعلى سبيل المثال لو انت كنت شركه بتبيع ملابس اطفال وبدأت تتعاون مع شركه بتبيع ملابس للامهات هتبقي شراكه جميله جدا .
📌 سوق وروج لخبرتك فى المجال
من خلال عرضك لخبرتك فى المجال اللى انت فيه , هتبدأ تجذب وتجلب اهتمام الناس اللى مهتمه بالبيزنس بتاعك , واللى هتساعدك انك تجيب عملاء جديده وتحصل على اعمال من العملاء الموجوده حاليا .
فانت مثلا لو بدأت انك تطوع علشان تتكلم فى حاجه من الصناعه بتاعك او تعمل حتي ندوه او ورشه عمل او فيديو مباشر على الانترنت او انك تتكلم فى مجموعات بينتمي ليها العملاء اللى مهتمين بالمجال بتاعك , بالطرق البسيطه دي بتقدر انك تسيب انطباع عند العملاء دي وبتحولهم لعملاء محتملين , والطريقه دي كويسه جدا مع الشركات اللى بتشتغل ( B2B ) او حتي ( B2C ) .
📌 استفيد من التقييمات على الانترنت والمواقع الاجتماعيه
فى اى مجال بتلاقي ان الاولويه الاولى للمستهلك انه بيخش يشوف التقييمات الخاصه بيك , وخاصه اذا مكنش ليهم تعامل معاك قبل كدا او اول مره يتعرفوا عليك . علشان كدا خليك دايما مراقب التقييمات ورد عليها ولو فى شكاوي حاول تتواصل مع العميل وتحلها
وابدأ انك تحقق استفاده كبيره من التقييمات دي سواء من خلال انك تنشرها على الموقع الخاص بيك او البيدج الخاصه بنشاطك علشان تشجع العملاء الجديده , لان الدليل الاجتماعي دا بيكون قوي جدا والعملاء الجديده بتكون عندها رغبه اكتر انها تجرب اللى بتقدمه لو شافوا اراء ناس تانيه ايجابيه .
